¹ Apa dha kuminemo nako fumu Herodesi gha kambekire nyara dhendi pawa hati hamweya homungirishe podigho eshi ghawa pethe. ² Gha payire Jacobusi mina Johanesi no thimende. ³ Ghopa ghamomine eshi yina washambereritha haJuda, gha rundurukere no gha kwatire Petrusi. Mayuwa gha ghakarire mayuwa ghoghuroto ghothuthunyunyi. ⁴ Munyima dhokumukwata hamuturire munwato, nogha mutapire kumambunga mane gho mashurundate ghamukunge; dodighano eshi gha kumuhokore munyima dhopaska. ⁵ Petrusi ha muturire munwato, ene hamuturire mumandapero kughutho waNyambi kwawaka ngirishe. ⁶ Ghuthiku, kughutho Herodesi gha ka mureta kundhango, Petrusi gha rarire pakatji komashurundate mawadi, ghana pu kughanga nomenge mawadi, oku hakungi ne pathero kuna kukunga kashitiko. ⁷ Yahokokire eshi, popo vene muengeli waNyambi gha hokokire kukwendi nothishe tha mumunekire mungonda dho kashitiko. Gha pyatire Petrusi no kumu pindutha ghu ghamba kwendi eshi, ''Pinduke wangu,'' no menge gha shutukire kumoko ghendi. ⁸ Mu-engeli ghaghambire kukwendi eshi, ''Vate yitere yoye novate yisandari yoye.'' Petrusi gha tendire kemo. Muengeli gha muningire eshi, ''Vate dirwakani dyoye no nikuthe.'' ⁹ Kemo, Petrusi gha kuthire mu-engeli kate kashwagha. Mbadi gha dimukire eyi gha tendire mu-engeli eshi ghushemwa. Gha ghayarire eshi kuna kurota. ¹⁰ Munyima dho kupita mukungi gho kutanga, noghoghuwadi ha kumine kuthero dhothikuvo edhi dha tamba kuthi thitata; dhawa yandhurukere dhathinda. H shwayire ha kayende muthitavura, popo vene mu-engeli gha muthiyere. ¹¹ Apa gha hukire Petrusi mumaghano ghendi, ghaghambire eshi, ''kate popano nadimuka eshi Fumu ghana tumu mu-engeli nanishuture mumoko ghaHerodesi, nokuyoyiheya eyi ha ghayara haJuda.'' ¹² Apa gha yi nongonone yi, gha yendire kundhugho dhaMaria gho nyina Johanesi oyu nga hethanga karo eshi, Marukusi, oku ha pongire hanu ghu raperera. ¹³ Apa gha ngongonine kuthero, mukadhipika gho dina eshi, Rhoda gheyire. ¹⁴ Apa gha nongononine diywi dyaPetrusi, dyamukangire kuyandhurura dikungu pamurandu ghoyi shamberera, mudyango dyo kuyandhurura gha hukire ghutjira mundhugho, gha ka tongwerire eshi Petrusi ne ghaneman pathero. ¹⁵ Awo ha muhuthire eshi, ''Ghuna ghundumuka.'' Ene yene gha konomekire thikuma. Ha ghambire eshi, ''Oyo ne mu-engeli wendi.'' ¹⁶ Ene Petrusi yene gha konomekire kungongona, apa ha yandhure thero, ha mumonine na ha tetukire. ¹⁷ Petrusi ghawa neghedhire nodyoko eshi haporere, no gha wa tongwere eshi ngepi edi ghana mushwayitha Fumu mu ka shitiko. Gha ghambire eshi, ''Mukatongore yinu yi kwaJacobusi no kwawaminendi.'' Gha shwayire po nogha yendire kudyango dimwe. ¹⁸ Apa dyavire diyuwa, mbadi mwakarire nyungango dhongandji mukatji kawa mashurundate koyi ya hokokire kwaPetrusi. ¹⁹ Apa gha mu shanashanine Herodesi mbadi gha muwanine, pogha tangire kwipudhura hakungi no kuwa rawera eshi ha wa paghe. Po gha tundire muJudeya gha yende kuKayesariya no kogha ka karire koko. ²⁰ Munyima dhopo Herodesi gha torokire nawanu homuTyre nomuSidoni. Ha yendire kukwendi nothitambo thofotji, nopakumana kuhongaghura Blasitusi, mughamweni waFumu, gha wa ghamwene, hepurire thiraro yoyishi awo nga ha wananga yidya yawo kwafumu gho ditunga. ²¹ Mudiyuwa edi ha turirepo, Herodesi ghavatire yitere yothifumu nogha hungumanine padipuna; nogha tapire thighamba kukwagho. ²² Hanu ha kuyererire eshi, ''Edi ne diywi dyanyambi no mbadi dyamunu!'' ²³ Popo vene mu-engeli waNyambi gha mwandurire, yoyishi mbadi gha tapire fumwa kwaNyambi; Mavinyo gha mu dire kate kufa. ²⁴ Ene nando dhaNyambi dha kuwedhere nodha yeranine kokuhe. ²⁵ Apa ha manine haBarnabasi naSaghulusi thitambo thagho, ha hukire kuJerusalema, hashimbire Johanesi oyu hethire karo eshi Marukusi.