¹ Mbapira dhaPaghulusi, muapostoli waKristusi Jesusi pamahimeno ghaNyambi, pofotji na muyendhetu Timoteghusi. Kungirishe dhaNyambi dhi dhidi muKorinte, ndani no ko waheya hapokongi waNyambi muthiko tho thihe thaAkayiya. ² Thineke no thiraro thaNyambi ghoWihetu naHekudyetu Jesusi Kristusi thikare nenu. ³ Ha mukughe Nyambi ghoWiha Hekudyetu Jesusi Kristusi. Aye yo Wiha ghomaneke ghomahe, no yoNyambi ghomahengawero ghomahe. ⁴ Aye gha tu hengaghura kumaghukukutu ghetu ghomahe, podiyo eshi natwe tukone kuhengaghura hamweya awa hadi nomaghukukutu. Tuna kuhengaghura hamweya wa no mahengawero agha gha tu hengaghurithire Nyambi. ⁵ Yoyishi thika di yina kukuwedherera yinyanda yaKristusi mumwetu, kemo dyo ghana kukuwedherera mahengawero ghaKristusi mumwetu karo. ⁶ Ene ngeshi gha tunyanda, yi muretere mwe mahengawero no makomweneno; ngeshi tuwane mahengawero twe, yamwe namwe ghana kuhengaghura. Podiyo eshi mukare noghudhughutjima ghokudhidhimeka yinyanda yo kenge yi twanyandire natwe. ⁷ Makurupero ghetu ne mumwenu ghadi, yoyishi tuna dimuka eshi thika di mudi netu mukunyanda, dyomudi netu mumahengawero. ⁸ Mwayendhetu, mbadi tuna himi eshi mudhire kudimuka maghukukutu twa kuwanekere muAsiya. Ghukukutu ghuya wapiterire mangcamu ghetu, kate twa tovohire eshi mbadi mbo tupara karo. ⁹ Ene shemwa, twa wanine matungwero ghokufa. Ene yaningithire yinu yi tudhire kukukurupera twathinda, ene mwaNyambi oyu gha tumuna hafu no kuwapa moyo. ¹⁰ Aye ne gha tu shwayitha muyifa yishokuru, no shime karo mbo ghana tu ghamwena. Mu mwendi twa tura makuruperonghetu eshi mbo ghana tu ghamwena. ¹¹ Nanyi gha tu ghamwene ngeshi mututure namwe mumandapero ghenu. Kemo dyo mbo ha yi tapa ndangi, mukutukwateramo kuthitapa thoneke thi hatupa kupitera mumandapero ghowahe. ¹² Thitambo thoyitanaghura yetu ne thino: ghudimuki wetu kuna kutapa ghushupi eshi yikaritha yetu mukaye ka ne yo ghupongoki ndani no ghukaro ghothinyambi no mutjima ghoghuhe, mbadi makurupero mudighano dyawanu ene pathineke thaNyambi. ¹³ Atwe ne mbadi twamutjangera eyi mwa dhira kutoya nokutjwathana, gho na kukurupera eshi mudiyuwa dimweya ne mbo muna yi tjwathanena yoyihe ¹⁴ thika di mwa tjwathana kamanana, eshi mudiyuwa dyaFumu Jesusi mbo muna shamberera thika di mbo tushamberera natwe. ¹⁵ Yoyishi na kara nothidimuka thi, na hakire kuna mundhingura eshi mbo no mu wane neke paruwadi. Ame nahakire kumupita muruyendo rwange ro kuMesadonia. ¹⁶ Ndani shime karo nahakire karo kunamupita pakahuka kuMesadonia, ndani mwe ne ngo mwa nighamwene mu ni tumene mundhira dhange dhokuJudeya. ¹⁷ Apa nakarire nodighano dino, kwakarire nomatamanyi ndi? Endi ngwa me ne kutetanga yinu muyindhundha yothighunu, podiyo me kughamba eshi, ''Kemo'' ndani ''Mbadi kemo'' paruvedhe rofotji ndi? ¹⁸ Ene shemwa yira momu ghakara shi Nyambi ne muhunga, nando dhetu kukwenu ne mbadi shi ''Kemo'' no ''Mbadi kemo'' vene. ¹⁹ Yoyishi Jesusi Kristusi ghomwana Nyambi, oyu twamuyuvithe naSilivanusi naTimoteghusi ne mbadimo mumwendi ''Kemo'' endi ''Mbadi kemo.'' Ene ye ne kehe pano ''Kemo.'' ²⁰ Matoyendhero ghomahe ghaNyambi ne ''Kemo'' mumwendi. Shime karo kupiterera mumwendi kughamba twe eshi, ''Ameni'' kufumwa dhaNyambi. ²¹ Nyambi thinda gha ghatutura pofotji mwaKristusi nenu, no gha tu pongwera kukwendi, ²² gha tutarekire nothidimukitho thendi noghatupire mupepo ghokupongoka mumitjima dhetu eshi thitureka thi mbo thiya. ²³ Ene, na kwitha Nyambi eshi ngo yo munongononi gho moyo wange eshi thitambo thi napirere kwiya kuKorinte ne nimuthiye ko kuma humbithero ghaNyambi. ²⁴ Mbadi tuna kuninga shi turaghure matawero ghenu. Keho ne kuna kurughana nenu muyihafa yenu, kenge muna kwimana mumatawero ghenu.