¹ Na tokorire eshi kumutara wange eshi mbadi karo nakwiya kukwenu mumaghukaro ghotjitju. ² Ngeshi na muyuvithire tjitju, yidye gho kuni shambereritha ene yoyu ghofotji na yivithire tjitju ndi? ³ Na tjangire dyodi na tendire podigho eshi apa na kwiya kukwenu ne mbadi ha kuna niyuvithe tjitju awa ha roghera kuni shambereritha. Ni di no makurupero gho kuhatera kukwenu mwahe eshi yishamberera yange ne yodiyo yofotji mudi nayo mwahe. ⁴ Na mu tjangere muyinyanda yoyikuru, notjitju dho mutjima, nomaruhodhi ghomengi. Mbadi nashanine kumuyuvitha tjitju. Ene, nashanine mudimuke ghudhungi ghoruhakitho oru nakara naro kukwenu. ⁵ Ngeshi kehe yuno gha mu retedherapo tjitju, mbadi kukwange ngenyu gha dhiretethera, ene mumanaro ghamwe-mbadi kumutura mupango-kukwenu mwahe. ⁶ Ogha mahumbithero ghoya munu mwawengi ne ghana rikanya. ⁷ Mukuninga eshi ngo mbadi mahumbithero, mumu thighererepo no kumuhengaghura. Muyitende yi podigho eshi mbadi yi mungambwathane yitokota. ⁸ Po na kumutjokedha muneghedhe ruhakitho rwenu ro kukwendi. ⁹ Ethi ne thothitambo na tjangere, podigho eshi ngo ni muyereke no kudimuka ngeshi mwa tawedhi muyinu yoyihe. ¹⁰ Ngeshi ha muthigherera kehe yuno, name karo namu thigherera yo munu. Eyi na thigherera-ngeshi na thigherera kehe yino-yina pu kuthigherera pamahimeno ghenu mughukareri waKristusi. ¹¹ Eyi ne kemo podigho eshi Shatani ne mbadi gha tuhongaghure. Atwe mbadi twa topeghera yighayara yendi. ¹² Fero gha dhini yandhwere Fumu apa neyire munurumbara dhaTuroghasi noni yuvithe mbudhi dhodhiwa dhaKristusi. ¹³ Mbadi na yuvire hasha mumupepo wange yoyishi mbadi na ka wanine ko muyendhange Titusi. Nawa thighire nona yendire kuMesedoniya. ¹⁴ Ene matumero ghakare kwaNyambi, oyu mwa Kristusi gha tutwara mukufunda. Kupitera mumwetu gha hokora kunuka kokuwa koghudimuki wendi kehe kuno. ¹⁵ Atwe ne yatwe kwaNyambi twa kunuka kokuwa kwaKristusi, mukatji kowa hapwa kughamwena nowa ha kufa. ¹⁶ Kwawanu awa hana kufa, kunuka kutunda kuyifa no kuyifa. Kwawa hana kupwa kughamwena, kunuka kutunda kughuparo no kughuparo. Yidye oyu gha fumanena yinu yi? ¹⁷ Atwene mbadi yira thingi thawanu awa ha ghurithanga nando dhaNyambi hawane k ndjambi, ene no yighayara yo kukushuka, kughamba twe mwaKristusi, thika edi ha tutuma kutunderera kwaNyambi, mumeho ghaNyambi.