¹ Lino likukwakumo lya lira lya Jesus Kristusa, mona David, mona Abrahamu. ² Abraham kwayitire monendi Isak, ntani mwa Isak ayita Yakopu, ntani Yakopu ayita Juda nava ghuni vendi. ³ Juda ayita Perezi na Zera wavo naTamara, Perezi ayita vaHesroni, ntani Hesroni ayita Ramu. ⁴ Mwa Ramu ayita monendi Aminadabi, Amminadabi ayita Nasoni, ntani Nasoni ayita Salomoni. ⁵ Salomoni ayita Bowasi wavo naRahabu, Bowasi ayita Obedi wavo na Rutu, Obed ayita Jessi. ⁶ Mwa Jessi ayita monendi Davidi wa Hompa, David ayita Solomoni wavo namukamali wendi Uriya. ⁷ Solomon ayita monendi Rehoboyamu, Rehoboyamu ayita Abiya, Abiya ayita Asa. ⁸ Asa ayita monendi Jesefati, Jesefati ayita Joramu, ntani mwa Joramu ayita Usiya. ⁹ Usiya ayita monendi Jotamu, Jotamu ayita Ahasi, Ahasi ayita Hesekiya. ¹⁰ Hesekiya ayita Manasseh, Manasseh ayita Amoni, ntani Amoni ayita Josiya. ¹¹ Josiya ayita Jekoniya kumwe navaghuni vendi pashirugho osho vadirukire vayende kuBabiloni. ¹² Kutunda mughu nkwati wa Babiloni, Jekoniya ayita Seyatiyeli, Seyatiyeli ayita Zerubbabeli. ¹³ Zerubbabeli ayita Abiyudu, Abiyudu ayita Eliyakimu, ntani Eliyakimu ayita Azori. ¹⁴ Azori ayita Zadoki, Zadoki ayita Akimu, ntani Akimu ayita Eliyudu. ¹⁵ Eliyudu ayita mondendi Eliyasere, Eliyasere ayita Matana ntani Matana ayita Yakopu. ¹⁶ Mwa Yakopu ayita monendi Josef mukafumu waMariya, ogho a shampurukiro Jesus, ogho tire Kristusa. ¹⁷ Maruvharo naghantje kutunda kwaAbraham dogoro kwaDavid kwakalire maruvharo murongo-na mane (14), kutunda kwaDavid dogoro kulidiruko ku Babiloni maruvharo murongo-na mane (14), ntani kutunda kulidiruko lyakuBabiloni dogoro kwaKristusa maruvharo murongo-na mane (14). ¹⁸ Lishampuruko lya Jesus Kristusa kwashorokire mundjira yino yina kukwamoko. Vawina, Mariya, kwamu vandikilire nga kware Josef, ano ngoli kumeho vagwanekere kumwe naye, ghuye ava muwana ana kara na lira lyaku tunda ku Mpepo yakupongoka. ¹⁹ Ano ngoli Josef, mukafumu wendi, murume wamuhungami ntani kapi ashanine ku shwaghukita mukamali kumbunga, makura ghuye ashana kushuva mukamali wendi mukahore-hore. ²⁰ Ghuye shimpe kuna kughayara vya kuhamena weno, makura muEngeli waHompa amu monekere kundjodi, nakughamba ashi "'Josef mona David, washa kara naghoma muku ghupa Maria akare mukamali ghoye, mukondashi lira lina karo mumwendi kuna tundu kuMpepo yaKupongoka. ²¹ Ghuye nga shampuruka mwanuke wa mumati, ove ngaghu muruke lidina lyendi Jesusi, ghuye nga yoghora vantu vendi ku ndjo davo." ²² Navintje vino kwashorokire mposhi ditikemo nkango odo aghambire Hompa kupitira mwa muPorofete, ogho aghambo ashi, " ²³ Kenga, mukadona apiro kukara rumwe na mukafumu ngakara nalira makura nga shampuruka mwanuke wamumati, ogho ngava ruka lidina Immanuel'' - lina kutanto ashi, ''Karunga na twe anakara.'' ²⁴ Mpopo tupu Josef a rambuka kuturo makura aruwana yira momu aghambire muEngeli waHompa kukwendi, ghuye aghupa Mariya a kare mukamali wendi. ²⁵ Ano ngoli ghuye kapi agwanikilire naye parutu dogoro ashampuruka mwanuke wamumati. Makura a muruku lidina lyendi Yesusi.