¹ Kuruku rwa lishampuruko lya Yesusi mu Betelehemu yamu Yudeya mushirugho sha Hompa Herodesa, makura vakafumu vavakonentu ava tundu kughupumeyuva dogoro avayatikire mu Yerusalemu avapura ashi, ² ''Kuni ana kara ogho kava shampuruka ogho ngakaro hompa wava Yuda? Mukondashi atwe katumono ntungwedi yendi kughupumeyuva makura mbyo tunaya tuya tongamene kukwendi''. ³ Hompa Herodesi opo ayuvire yino mbudi, ayi yita kukora kumutjima wendi, kumwe navantu navantje muYerusalema. ⁴ Herodesa ayita mbunga ya vapristeli vavanene navantje ntani navarongi-matjangwa vayaponge, ghuye avapura ashi, ''Kuni nko oku ngava shampurukira Kristus? ⁵ ''Vavo ava limburura ashi, ''Mu Betelehemu yamu Yudeya, ovino mbyo vatjanga vaporofete ashi, ⁶ Ove, Betelehemu, ya mushirongo shaYuda, ove kapishi shitata shashididi mukatji kavitata vya muJuda, mukondashi mumoye mo ngamutundo mupangeli, ogho nga pititiro vantu vande va Israel. ⁷ Makura Herodesa ayita vakafumu vavakonentu mukaholya-holya ava pura ashi shirugho munke kayimoneke yene oyo ntungwedi. ⁸ Makura ghuye ava tumu vayende kuBetelehemu, avatantere ashi, ''Yendenu mukashane nakupupida ogho mukeke. Opo ngamu kamu wana, ngamu katume mbudi kuno kukwande mposhi name nganuyendeko name nganu katongamene kukwendi. ⁹ Tupu amanine kughamba navo Hompa, ava shapuka vakayende na ndjira yavo, makura ntungwedi oyo vamonine kughupumeyuva ayipiti kughuto wavo yiva pititire kumeho yavo dogoro ayi katika palivhango opo akalire mukeke ntani yina kayima. ¹⁰ Opo vamonine yino ntungwedi, avakara na ruhafo rwa runene. ¹¹ Vavo makura ava ngene mundjugho vaka mone mukeke kumwe na vawina Maria. Vavo ava kugandere palivhu makura ava tongamene pa ngoro varaperere kukwendi. Makura ava rongorora limona lyavo na ma ghushwi gha ngorodo, navitutumukita, navinukita lidumba lyaliwa natni nadimurora. ¹² Hompa Karunga atapa marondoro kukwavo kundjodi ashi kapishi vavyuke ko kwa Herodesi, vavo makura ava vapiti ndjira yapeke vavyuke kushirongo shavo. ¹³ Tupu vatundirepo vanya vakayende, muEngeli waHompa amonekere Josef kundjodi kumwe na ku ghamba ashi, ''Rambuka, damuna mwanuke na vavawina, mutjwayukire kuEgipte. Ngamu kakare nkoko dogoro nganu kaghambe nove, mukondashi Herodesi kuna kushana ghuno mwanuke amudipaye.'' ¹⁴ Matiku ngogho Josef arambuka adamune mwanuke kumwe navawina ava dukiri kuEgipte. ¹⁵ Ghuye aka karankoko nkoko dogoro nange ku mfa daHerodesi. Vino kwashorokire mposhi nkango da Hompa ditikiliremo odo aghambilire kupitira muva porofeta ashi, ''Ame kuna kuyita Monande atundemo mu Egipite." ¹⁶ Makura Herodes, opo amonine ashi vakafumu vavakonentu vana mutura muliyome, agarapa unene. Makura atapa dimuragho vadipaye vanuke vavamati navantje vamu Betelehemu kumwe nadimukunda damaparambo vanuke vamwaka mbiri navantje shighurumuke palivhu vakona kufa, vino kwa shorokire kutwara mumbudi oyo awanine kuva kafumu vavakonentu. ¹⁷ Vino kwa shorokire mposhi ditikiliremo nkango odo aghambire muporofete Jeremiya ashi, ¹⁸ ''Liywi lyalinene kuna kutunda muRama, kuna kulira unene na kukema na liguvo lyalinene, Rakele kuna kulilira vana vendi, ghuye ana shwena mukumushengawida, mukondashi kwato ogho ana hupopo.'' ¹⁹ Opo a fire Herodesi, makura, muEngeli waHompa amonekere Josef kundjodi muEgipte na kughamba ashi, ²⁰ ''Rambuka damuna mwanuke kumwe navawina muvyuke kushirongo sha Israel, ovo vashanino kudipagha mwanuke va fa.'' ²¹ Josef arambuka, adamuna mwanuke navawina, makura ava vyuka kushirongo sha Israel. ²² Ano ngoli opo ayuvire ashi Arkelaus ndje ana kupangero muJudeya mulipundi lya vashe Herodesi, ghuye akara naghoma kuyendamo. Muruku Karunga atapa marondoro kukwendi kundjodi, makura ashapuka ayende kushirongo sha Galileya ²³ makura aka tunga mushitata osho vatwenyanga ashi Nasareti. Vino kwashorokire mposhi ditikiliremo nkango odo vaghamba vaporofete ashi, ghuye ngava mutwenya ashi muNasareti.