¹ Mumayuva ghanya, avi yakara ashi Sizari Augustusi ghatumini mpangera yakuvarura shivaro shavantu navantje vamuudjuni. ² Lino ndyo livaruro lyamuhovo varughanine ruvede oro Kiriniyusi ghuye nguuru waSiriya. ³ kehe ghuno mpo ayendire kushitata shendi vakamutjange kulivaruro linya. ⁴ Josefa naye gha kanduka kuGalireya, yamushitata sha Nazareti ayende kuJudeya kushitata shaDaviti. ⁵ Ghayendi nkoko ghakakutjangite naMaria, oghu vamuvandikilire ntani ghuye opo marutu maviri. ⁶ Ghava yakara ashi vavo mpovari nkoko, ruvede gharutiki rwaku wana mukeke wendi. ⁷ A wana mona wamukafumu, mbeli yendi, ntani ghamudingiri pamakeshe ghamare ntani ghamurangeke mushilyero vimuna konda mbyovi ashikapi mwakalire nkonda yavo munda. ⁸ Muruha shirongo munya kwakalire mo vashita ovo va kaliro mumafuva, vakunge utanga wavo matiku. ⁹ MuEngeli waHompa ghava monekere, ntani ghuyerere waHompa aghutwedere kuvakundurukida, ava kara nka vana yura woma waghunene. ¹⁰ Makura muEngeli ava ghambita, '' mwasha kara nawoma'', konda ashi ame kuna muyitiri mbudi yayiwa oyo yikayito ruhafo rwarunene kuvantu navantje. ¹¹ Namuntji muyowoli kuna mushampurukiri vamushitata shaDaviti! ndje Kristusa Hompa! ¹² Shino ntjo shiyivito ngavatapa kukwenu: kumukawana mukeke vanadinga-dingiri pamakeshe ghanararo mushilyero vimuna. ¹³ Mpopo tupu kwakalirepo kumwe namuEngeli nambunga yayinene yakuwiru, ghava tangauka Karunga nakughamba, ' ¹⁴ '' Ghuyerere kwaKarunga wamuliwiru-wiru, ntani, ndi pakare mpora palivu mukatji kavantu ovo ghahafera''. ¹⁵ Ghapaya ruvede oro ghatundirepo muEngeli pavo ghayende muliwiru, vashita ghava kughambita vavene, '' Tokwenu ngoli tuyende kuBetelehemu tukakenge ovyo vinashoroko, ovyo ghana tuyivita Hompa.'' ¹⁶ Ghava kwangura kuyenda makura ghava kawana Maria, Josefa, ntani na mukeke, ogho gharaliro mushilyero. ¹⁷ Kuruku yakumumona, ghava yivita ovyo vavatantilire kuhamena mwanuke ghuno. ¹⁸ Navantje vanya vaviyuviro kwatetukire kovyo vavatantilire vashita. ¹⁹ Ngoli Maria ghuye kwakughayalire ngudu kuvininke vinya ghayuvire ghavi pungura mumutjima wendi. ²⁰ Vashita vanya ghavakavyuka, vavo kuna kuyererepeka nakutanga Karunga kuvininke navintje vayuvire nakumona, moomu tupu vavi vatantilire. ²¹ Opo watikire ghuhura waliyuva lyaghuhambondatu, opo vamu pongwere, avamuruku Jesusa, lidina ghamupire muEngeli kumeho yakumupaka mulira. ²² Opo ghapwire mayuva ghatumbukiliro likenito lyavo, kutwara kuveta daMosesa, avamuyita kuntembeli muJerusalema mukumu tapa kwaHompa. ²³ Yira moomu tupu vavitjanga muveta daHompa, '' Kehe mukafumu wakuharura lira ngava mutulire ntere ghakare waHompa mwene.'' ²⁴ Makura ghava djamba ndjambo kutwara moomu movyo vaghamba muveta daHompa, '' lipando lyavankuti ndi mputukuwaghona mbiri.'' ²⁵ Mpopo tupu, kwakalire mukafumu ghumwe muJeruselema walidina Simioni, mukafumu ghuno kwakalire muhungami ntani mukupakimo. ghuye kwashana-shanine lishengawido lya Israyeli, ntani mpepo mupongoki yakalire pendi. ²⁶ ghayi mushorwere ashi kapi ngamona mfa kumeho ngamone Hompa Kristusa. ²⁷ Mulipititiro lya mpepo, Simioni ghaya muntembeli. Opo vamuyitilire vakurona mukeke Jesusa, ghamuruwane kukwama omu vya wapera paveta, ²⁸ Ghamupaka pamawoko ghendi nakutangauka Karunga, makura aghamba, ²⁹ '' Weno pulitira ngoli mukareli ghoye ayende mumbili, Hompa, kutwara munkango yoye. ³⁰ Mantjo ghande ghana mono liyoworo lyoye, ³¹ Olyo wawapayikira mulikaropo lyavantu navantje: ³² Shite shalitoghoro kuvapagani naghuyerere kuvantu voye vaIsrael''. ³³ Vashe navawina kwatetukire kovi vatantilire kumukeke. ³⁴ Simioni ghava tungiki nakughamba kwaMaria vawina, '' Kenga, mwanuke ghuno kwamutoghorora liwo nalirambuko lyavantu vavangi muIsrael, ntani nakushineghedito shinya vashwena- ntani rufuro oro ngaruka tomono monyo wanaumoye- ³⁵ mpo ashi maghayadaro gha dimutjima dadingi ngagha kare paghukenu.'' ³⁶ Muporofete-kadi walidina Anna mpo ghakalire ghuye kwa parukire namukafumu wendi ghure wamwaka ntambiri kunyima yakupira kukundama mukafumu kwendi, ³⁷ ntani ghuye kwakalire mufita vyendi mwaka rontantatu nane. Kapi katundanga mo muntembeli ngoli kakareranga oku kuna kudilira nandapero, matiku na mwi. ³⁸ Paviri ndjoyo ghava shwenene papepi, makura ghatameke kutapa mpandu kwaKarunga, ntani ghuye ghatantilire kehe ghuno kuhamena mwanuke ghunya lyatatilire liyoworo lyaJerusalema. ³⁹ Opo vamanine navintje ovyo vyawapilire kurughuna kutwara muveta daHompa, ghavavyuka kuGalireya, kumbongi yavavene ya Nazaretha. ⁴⁰ Mwanuke ghaya kuru ntani ghayapama, ukonentu aghukuwederere ntani ghufenkenda waKarunga ghaukara papendi. ⁴¹ Vakondi vendi kehe mwaka kavayendanga kuJerusalema kushilika shapaskwa. ⁴² Opo akalire mwaka ronambiri, ghavayendi nka kuruvede rwavo rwakehepano rwa shilika. ⁴³ Kuruku yakukakarako mayuva ghashivaro shakuyulilira kulifeste, ghava tameke kuvyuka-vyuka kumundi. Ano ngoli mumati Jesusa ghakara muruku muJerusalema vavo vakondi vendi vahana kuviyivira. ⁴⁴ Ghava ghayarere ashi ghuye kwakalire mumbunga yinya vayendire nayo, ghava yendi ruyendo rwa liyuva limwe. Makura ghava tameke kumushana-shana mukatji kava kaliro navaholi. ⁴⁵ Opo vapilire kumuwana, ghava vyuka kuJerusalema vakamushane nkoko. ⁴⁶ Makura papo mayuva matatu ghanapito ghavayamuwana muntembili, ghuye kuna shungiri mukatiji kavashongi, kuna kuvategherera naku vapura mapuro. ⁴⁷ Navantje vanya vamuyuviro kwatetukire kulikwato lighano lyendi ntani kumalimbururo ghendi. ⁴⁸ Apa vamumonine, ava tetuka. Vawina ghava ghamba kwendi, '' Monande, vinke ghuna turuwanene ngoli? Kenga, vasho name kunakukushana-shana nashinka.'' ⁴⁹ Aghamba kwavo, '' Kuntjana-ntjanena nke? kapi munayiva ashi ame ndi nahepa kurughana virughana vyavavava? ⁵⁰ Ngoli vavo kapi vakwatire lighano ovi atambire munkango dinya. ⁵¹ Makura avyuka navo kuNazareth ntani ghava vulikire. Vawina ghava pungura vininke navintje vino mumutjima wavo. ⁵² Ene ngoli Jesus ghatwikiri kukura mughukonentu namutika, ntani ghakuwederere mughuwa naKarunga naVantu.