¹ Vavangi vaghupa shirughana shakutura pamwe ghumbangi wavininke evi vyatikiliromo petu, ² yira moomu tupu vavitutantilire vanya vakuntateko vakaliro mbangi dakuvimona namantjo ntani vakareli vankango. ³ mo ngoli vya monikire ghuwa kukwande nka, morwa nakonakonine nawa navintje kutamekera kuntateko, mukumutjangera ghumbangi ghunavyukiliro, shinenepo Tehofilusi, ⁴ Mpo ngoli ashi muvure kuyiva lididiliko lyavininke va mushonga. ^{5 6 7} Mumayuva ghaHerodesi Hompa waJuda pwa kalire mukurona walidina Sakariya wakuntavakani yaAbija; mukamali wendi Elisabeth oghu akaliro naye ntekuru yaAroni. Navantje kwakalire vahungami kushipara shaKarunga, kuyenda vahana ghundjoni muvipango navintje naveta dapatjangwa daHompa. ngoli kapi vakalire namwanuke mbyovi ashi Elisaberth kwakalire ngandje, ntani navantje kwakurupure mumayuva ghano. ⁸ Makura ruvede runya ghuye Sakariya ghuye mulimoneko lya Karunga, mukurughana virughana vyaghukurona mumpangera yalikushuvo lyendi. ⁹ Kutwara ngoli mundjira yawapero kutoghorora ashi mukurona ghunindjepo a rughano, kwa mutoghorolire vavangi mukungena muntembili yaHompa vakashore vyashidumba. ¹⁰ Mbunga nayintje yavantu kwarapilire pandje pavili yakushora vyashidumba ovyo. ¹¹ Makura muEngeli waHompa ghamumonekere ntani ayimana viha kalyo kaHarutare yashidumba. ¹² Sakariya opo amumonine, kapi ayuvire mbili makura ghoma aghumuwana. ¹³ Ano ngoli muEngeli aghamba naye, '' Washa kara naghoma, Sakariya mbyovishi ndapero yoye yina yuvhiki. Mukamali ghoye Elisaberth ngakuyitira mona wamukafumu. Ngaumuruke lidina lyendi John. ¹⁴ Ngaukara naruhafo ntani ruhafo rwakupitakanena, ntani vavangi ngava shamberera lishampuruko lyendi. ¹⁵ Mpo ngoli ashi ghuye ngakara munene mumantjo ghaHompa. Nakadidishi ngakanwa vinyu ndi kehe vinwa vyaghururu, ntani ghuye ngakara wakuyura mpepo mupongoki kutamekera mulira lyavawina. ¹⁶ Shingi shantekuru daIsrael ngadikavyuka kwaHompa Karunga wavo. ¹⁷ Ngayenda kushipara shaHompa pampepo namunkondo daElijah, mukukavyuta dimutjima davasha kuvana ntani vakupira kuvulika kuukonentu wavahungami-mukuka wapayikira Hompa vantu vanamukuwapayikiro.'' ¹⁸ Sakaria aghamba kumuEngeli, '' Weni omunikaviyiva vino? Morwa ame nimukurupe ntani muholikadi wande ghakupita mayuva.'' ¹⁹ Mu Engeli a limburura mukumutantera ashi, '' Ame Gabriel, oghu ayimanango mulimoneko lyaKarunga. Kunantumu niyakutantere, mukukuyitira yino mbudi yayiwa. ²⁰ Kenga! Kuukamwena, nakuvurashi kughamba dogoro liyuva olyo ngavika shoroka vininke vino. Morwa mbyovi ashi ove kapi ghuna pura nkango dande, odo ngadikatikiliramo paruvede rwaghuhunga.'' ²¹ Ruvede rwangoli vantu vavo kuna kutaterera Sakaria. Vatetukire kovi akakalire shitunde shashire muntembeli . ²² Ngoli opo akarupukire mo, kapi avulire kuvaghambita. Mpo vadimbwilire ashi anamono limoneko ruvede runya ghuye muntembeli. Mbyo akalilire kuvaghambita rupurupuru nakumwena teete. ²³ Apa ya ruvede rwapepi nakumana mayuva ghendi aghukareli, ayendi kumundi wendi. ²⁴ Apa apitire mayuva ghano, mukamali wendi Elisabeti akara namarutu maviri ntani kwakalire mwedi ntano dakuvanda. Aghamba, ²⁵ ''Ovino mbyo ana nduwanene Hompa opo a nkengire nauwa mukughupapo ntjoni dande kuvantu.'' ²⁶ Mwedi wautano naumwe, Mu Engeli Gabriel amutumu Karunga kushitata sha Galireya varukire Nazareti. ²⁷ Kwamukamali a piro kugwanekero shimpe namukafumu oghu a vandikulire Mukafumu walidina Josefu, oghu akaliro ntekuru yaDavid, ntani mukamali ghunya lidina lyendi kwa kalire Maria. ²⁸ Aya kwendi nakughamba, '' Moro, ove vahora unene! Hompa nove anakara.'' ²⁹ Ene ngoli akaire ana piyaghana kunkango ntani gharoroka kughayara ashi rumorolito munke runya. ³⁰ Mu engeli aghamba kukwendi, '' Washa tjira, Maria, ove kuna wana uwa naKarunga. ³¹ Kenga, ngaghu wana lira ntani ngaukayita mwanuke wamukafumu, ngaukamuyitita lidina ' Jesusa'. ³² Ngakakara munene ntani nakumutwenya ashi Mona mukawiru-wiru. Hompa Karunga ngamupa lipuna lyamudimu wendi Ndafita. ³³ Ghuye ngakapangera valipata lyaJacobs naruntje, ntani kapi ngakukara uhura wa untungi wendi.'' ³⁴ Maria aghamba kumu Engeli, '' Weni omu ngavikashoroka vino, paruvede oro ame kapi nagwanekera shimpe namukafumu?'' ³⁵ Mu Engeli alimburura nakughamba kukwendi, '' Mpepo Mupongoki ngakaya poye, ntani nkondo damukawiru-wiru ngadi kaya poye. Mo ngoli ashi wakupongoka oghu ngaghu yita ngava mutwenya ashi Mona Karunga. ³⁶ Kenga, mukaliro lyoye Elisabeti naye marutu maviri ghamwanuke wamukafumu muukurupe wendi. Ghuye ghuno mwedi wautano naumwe, ndje ghunya kavatwenyanga ngandje. ³⁷ Mbyovishi kundereko ovyo ngavimuditopero Karunga. ³⁸ Maria aghamba, '' Kenga, ame nimukareli kadi waHompa. Vinkarere ngoli kutwara kumbudi yoye.'' Makura muEngeli a mushuvu. ³⁹ Mayuva ogho Maria arongere ugenda wankwangu ayendi mushirongo shandundu, Mushitata shamuJudeya. ⁴⁰ Ayendi mundjugho yaSakariya ntani amorora Elisabeti. ⁴¹ Pano ngoli ovi vyashorokiro opo ayuvire Esabeti moro yaMaria, mukeke mulira lyendi ghavatuka, ntani Elisabeti gha yura mpepo mupongoki. ⁴² Ayerura liywi lyendi nakughamba kudameka, '' watungikwa pakatji kavakamali, ntani lya tungikwa linyango lyalira lyoye. ⁴³ Konda munke vinantjorokerere ashi nyokwa Hompa wande a ndjere? ⁴⁴ Opo lina were liywi lya moro yoye mumatwi ghande, mukeke mulira lyande kuna vatuka kuruhafo. ⁴⁵ Ghatungikwo ndjeghunya apuro ashi ngakukakara litikiliromo lyavininke vinya atantire Hompa.'' ⁴⁶ Maria aghamba, '' Monyo wande kutanga Karunga, ⁴⁷ ntani mpepo yande kunahafa mwaKarunga muyowoli wande. ⁴⁸ Mpo ngoli akengire mo akalire mukareli-kadi wendi. Kutunda pano maruvaro naghantje ngaghakatwenya mutungikwa. ⁴⁹ Konda ashi ghunya wamunankondo ana nduwanene vininke vyavinene, ntani lidina lyandi kwapongoka. ⁵⁰ Nkenda yendi kwakarererapo tunda ruvaro yenda ruvaro kwava vamutjiro. ⁵¹ Ghuye kuna negheda nkondo dendi nalighoko lyendi; ghuye kuna hanahura vanya vakupandayikiro maghayadaro gha dimutjima davo. ⁵² Anavukumine vana vavahompa palivhu kutundilira kumapuna ghavo ntani ghana yerura vnya vakaro kuntji. ⁵³ Anayuda va ndjara navininke vyaviwa, ngoli vangawo kuna vavyuta muporongwa. ⁵⁴ Ghuye kuna tapa mbatero kwa Israel mukareli wendi, mo nka nakuvuruka kunegheda nkeda, ⁵⁵ ( yira moomu aghambire kwa shetu) Abrahamu na ntekuru dendi panaruntje.'' ⁵⁶ Maria mpo akalire naElisabeti ghure wamwedi ntatu ntani ghavyukire kumundi wendi. ⁵⁷ Ruvede arutikimo rwa Elisabeti ghamone mukeke wendi ntani ghawanine mona wamukafumu. ⁵⁸ Vamusinda navakaliro lyendi vaviyuvire ashi Hompa ghana munegheda nkenda yendi, mpo vayire vaya hafe kumwe naye. ⁵⁹ Liyuva lyauhambondatu ghavaya vaya vambe mwanuke. Ndi kwa murukire '' Sakariya'' , lidina lya vashe. ⁶⁰ Ano vawina ghava limburura nakughamba ashi. Hawe.'' Kutumuruka John.'' ⁶¹ ghava ghamba kukwendi, '' kundereko walikoro lyoye vayititanga lidina lino.'' ⁶² Ghava ghambita vashe rupurupuru vapure ko lidina anashanene kumuruka. ⁶³ Vashe ava pura vavapeko likarata lyakutjangera ntani vatjangire ashi, '' Lidina lyendi ndje John.'' Navantje avavitetuka. ⁶⁴ Mpopo tupu kanwa kendi akayashuka naliraka lyendi alishutuka. Aghambire na kutanga Karunga. ⁶⁵ Woma aghuwana ovo vatungiro pepi navo. Vishorokwa navintje vino kwa kuhaninine mushirongo shandundu da Judea namuntje. ⁶⁶ Navantje vavayuvire ghava vapungura mudimutjima davo, mukughamba, '' Mukaura vinke ngakakara ghuno mwanuke?'' Mbyovi ashi lighoko lyaHompa naye lyakalire. ⁶⁷ Vashe Sakariya ava yura mpepo mupongoki nakuporofeta, mukughamba, ' ⁶⁸ '' Hompa vamutangauke, Karunga wa Israel, mukuya ayavatere ntani anatikitamo liyoworo vantu vendi. ⁶⁹ Ghuye kuna yerura ruvinga rwaliyoworo lyetu mundjugho yamukareli wendi Ndafita, ⁷⁰ ( moomu tupu avi ghambire kare kupitira muvaporofete vakupongoka) ⁷¹ liyowoko kuvanankore vetu nakulighoko lyanavantje vatunyengo. ⁷² Ngavirughana vino mukunegheda nkenda vasha vetu nakuvuruka likwatakano lyendi lyakupongoka, ⁷³ Mughano ghatantilire shetu Abrahamu. ⁷⁴ Aghanine kutupa ovino tuna yawana, tunaya manguruka kutunda kuliwoko lyavanankore vetu ndi tumukarere hana woma, ⁷⁵ Muupongoki namuuhungami kushipara shendi mayuva ghetu naghantje. ⁷⁶ Yii,ntani ove, mwanuke, ngava kutwenya muporofete wamukawiru-wiru, mbyovi ashi ngaghu kayenda kushipara shaHompa mukurongikida ndjira dendi, mukuwapayika vantu kuya kukwendi, ⁷⁷ Mukutapa unongo waliyoworo kuvantu vendi kupitira mulidongwenenopo lyandjo davo. ⁷⁸ Vino ngavishoroka konda yankenda yayinene yaKarunga wetu, konda yamoomu shapumanga shite sha liyuva shibubuke kutunda ghure mukuyatuvatera, ⁷⁹ Mukutwederera vanya vashungiro mumundema namudimundunduma damfa. Ghuye ngavi rughana vino mukupitira mpadi detu mundjira yambili.'' ⁸⁰ Makura mwanuke ghaya kuru nakuyakoka mumpepo, ntani ghakalire mumburundu dogoro liyuva lyendi lyakububukira mbunga ya Israyeli.