¹ Dino ndo nkango daKarunga kwa Jowera mona mukafumu wa Petuweli. ² Yuvenu vino, anwe vakondi, nakutegherera, namuvantje anwe vatungi vamuno mushirongo. Vininke vya kufana ngoli vya shoroka mumayuva ghenu, ndi walye mumayuva gha vadimu venu? ³ Tanterenu vanavenu vino, ntani vanavenu navo vatantere vanavavo, ntani vanavavo na muhoko wavo wakukwamako. ⁴ Lidugi lya shimbonde linatundupo, ano lidugi lya linene kuna kulya; evi linashuvu po limbonde, mpadimpadi vina yili po; evi yi shuvu po mpadimpadi, lihungu lina vili po. ⁵ Rambukenu, anwe va nkorwe, na kulira! Yiyirenu, namuvantje anwe vankorwe vavinyu, mukondashi vinyu vaghutovara vanayiteteko kukwenu. ⁶ Shirongo shinaya palivhu lyande, vayingi nakuvhurashi kuvavarura. Mayegho ghavo ghafana mayegho ghava nyime, ntani vakara na mayegho ghava nyime ghona. ⁷ Vana ghanaura po shindjembere shetu mbya nka vanakweyepo maukuyu ghetu. Ana tjoraura ko dimutavi dasho na kudifukuma; dimutavi dako adikushura. ⁸ Yiyirenu anwe mbunga, yira mukadona oghu ana kuliro mfa da murume ogho hambara a mukware. ⁹ Kudereko rukokotwa ndi ashi vinyu yakudjambera muntembeli; vaPristeli kuna kulira morwa kwato ndjambo yakudjamba. ¹⁰ Mafuva mawoko-woko anakara; livhu kuna kulira morwa rukokotwa runaghanauka po, ano mandjembere anakukuta, na mauywe ana kukuta. ¹¹ Kuyuvenu ntjoni, anwe vandimi, nakulira, anwe vakuni vamandjembere, mahangu na vilya. Morwa muyangu wa mafuva ghuna hanauka po. ¹² Vindjembere na maukuyu vinakukuta po; vitondo vyanyango vinakukuta navintje vina fu. Ruhafo rwa vantu runapu po. ¹³ Dwatenu ntjako mulire, anwe vaPristeli mwa ruwanango kushidjambero! Yendenu muntembeli mulire matiku mudima! Kundereko rukokotwa ndi ashi vhinyu ya kudjambera Karunga wenu. ¹⁴ Tulitenupo unankondo walidiliro; yitenu shigongi! Pngayikenu vayendi na vantu navantje vavaJuda muyende muntembeli ya Hompa Karunga wenu, mulire. ¹⁵ Liyuva lyaHompa pepi linakara; liyuva olyo ngayita munankondo nadintje lihanauko. Hee, udito munke ngaliyita liyuva olyo! ¹⁶ lidjonauko lya muyangu wetu mantjo tupu tunakengeko. Muntembeli ya Karunga wetu muderemo ruhafo. ¹⁷ Mbuto kuna kufera mulivhu lyalikukutu, mahangu gha kuyangura kwato, vishete vyamahoko-hoko vina yunguruka. ¹⁸ Ngombe kuna kukumbaghana dado kuna kuyarara morwa kwato malyero ghado; vihunda vya ndjwi navyo kuna kuhepa. ¹⁹ Kukoye nakulilira, Hompa, morwa malyero navitondo vinakukuta yira moomu yayenda mpire. ²⁰ Navikorama vya muwiya mbyevi kuna kulilira koye, morwa dimukuro dina pwilire.