¹ Vetenu marumbendo toghonenu katenda muSiyoni. Kankamenu, anwe vambunga yava Juda! Liyuva lyaHompa ntantani liye. ² Ngalikara liyuva lyamundema nadovera, liyuva lya mudumbi na maremo. Mbunga yayinene yava kavaita va limbonde kuna kuyenda kumeho yira momu wakuhanenanga mundema kundundu. Kapi kwakalire vakavita yira mbo, ntani kapi ngavakarako nka, nampili kuruku rwa dimuhoko dadingi. ³ Mundiro ngauveveka po navintje ovyo vya karo kumeho yavyo, ntani navi byakuruku yavyo. Shirongo kwafana yira shikunino sha Eden kumeho yasho, ngoli kunyima yasho mburundu yakudjonauka. Kudereko ovyo ngavivhuro kutunda mo. ⁴ Kumoneka kwendi yira nkambe, kuduka kwendi yira nkambe yavakavita. ⁵ Nangeshi avatauka kundungu yandundu kushayara yira turukara twava kavita; kucukauka kwendi yira mushoni pamundiro, kwafana yira vakavita vanaku wapayikiro vita. ⁶ Omu vana kuyenda ngoli kumeho, kehe uno kumuwana woma; vipara navintje kukutjindja. ⁷ Vavo kurwana yira vakavita; kuronda makuma yira vakavita; namuntje kuvyukilira kuyenda nakuyapuka shi. ⁸ Ndi ashi ayundure ghunyendi; kupita mukatji kamapopero, ngoli navimweshi vyakumukandana. ⁹ Ghuye kuhomokera mo mushitata; aduke aronde makuma, vaduke varonde mundjugho, na kukunduruka mamakenda yira vakawidi. ¹⁰ mukuyenda kwendi livhu kukunyunganga, liwiru kumenga, liyuva na kakwedi kushovagana, ntungwedi kapi dina kutema nka. ¹¹ Hompa kuna kundunduma atape mpangera kumbunga yendi ya vakwayita. Vakavita ovo vamulimburukwango vangi, vavo vana nkondo. Nani udito munke liyuva lya Hompa. Are ogho ngali didimiko? ¹² ''Nampili ngoli''-Hompa kuna kutanta ashi: Kushihurenu nawa-nawa, muvyuke kwande oku kuna kudilira nakukwenauka. ¹³ Shuvenu monyo denu ditape maruntjodi, kutavaura vikoverero vyenu pentjavyo kapi vinagwana.'' Vyukenu kwaHompa Karunga wenu. Ghuye muyogholi ayuro nkenda; ghuye kuyuva kukora, makura atikitemo matwenyidiro ghendi, ghuye akuwapayikira kare kudongonwena po kapishi kupangura pentjako. ¹⁴ Pamwe Hompa Karunga ghoye ngarundurura maghayaro ghendi ngakuragopite nakuvhukita muyangu ghoye, makura ngaghuvhure kumudjambera vilya na vhinyu. ¹⁵ shivenu marumbendo kundundu yaSiyoni, tapenu mpangera yakulilikida, anwe muyite shigongi shakupongoka. ¹⁶ Pongayika vantu; yitenu shigongi sha kupongoka. Pongayika vakurona; pongayika vanuke ntani yamweka vakeke. nava kwali vavape navo vashuve mandjugho ghavo vaye. ¹⁷ VaPristeli ava varuwanenango Hompa pavidjambero na pamavero gha ntembeli valire, vavo varaperere. ''Hompa, kenga mbunga yoye lintjo. Washa shuvilira dimuhoko dapeke ditu dine nakutushwaura muvighamba ashi: 'Karunga wenu oku anakara nka ne kuni?''' ¹⁸ Karunga akalire nalitokomeno kushirongo shendi ntani afelilire nkenda vantu vendi. ¹⁹ Karunga kulimburura vantu ashi, ''Kengenu, ame nganituma rukokotwa, vhinyu yayipe, na maghadi ghandjwe, makura ngamukute, makura namuhoko dapeke kapi ngadimudina nka. ²⁰ Ame nganihupa po vakavita valimbonde ava va tundo kuumboyera makura ngani tjidire vamwe mumburundu. Mbunga yakumeho nganiyitjidira mulifuta lyakufa, ano yakunyima mulifuta lyapakatji. Vimpu vyavo ngavinuka, ame ngani vaharaganita, mukonda yevi namuruwanane. ²¹ "Shirongo ove, washa tjira ngoli hafa, makura ove ghulilikide morwa shi navintje evi akuruwanena Karunga. ²² Vinamwenyo anwe, mwashatjira, malyero ghana kara namushoni waghuteke vitondo vina yimi viyimwa, Ukuyu na mandjembere vina vhuka. ²³ Mbunga yaSiyoni hafenu, na kulilikida kwevi akuruwanene Hompa Karunga woye. Ghuye kwakupa mvhura yakwenye pa Uhungami wendi, mbyo nka shimpe ani kurokitiri mvhura ya pakufu nayi yapakurombo kupitakana yakare. ²⁴ Pamavega gha marupere ngapayura vilya, makwina agha akaro pepi na mavega ghakukamena ngagha pupa vhinyu na maghadi ghandjwe. ²⁵ Ame ngani kuvyutidira evi wakombanita mumwaka edi valire madugi gha limbonde muyangu woye. Ame natumino vakavita vano vayakurwite. ²⁶ Ano ngoli ntaantani tupu ngaukare navi vyavingi vyakulya, ngaukute. Ove ngaghu shamberera Hompa Karunga ghoye, oghu akuruwaneno vininke evi vyakutetukita. Mbunga yande kapi ngava yishwaura nka. ²⁷ Ove Israel mbo ngoli ngaghuyivira ashi ame mukatji kenu nakara. Ame Hompa Karunga wenu kudereko nka wapeke. Mbunga yande kapi ngavayishwaura nka. ²⁸ ''Kunyima yevi, ame ngani powemwena mpepo yande kwa kehe uno; vana venu vavakafumu nava vavakamali ngava yuvita nkango yande; vakurupe venu ngavarota ndjodi; ano vadinkantu venu, ngava mona mamoneko. ²⁹ Pashirugho ntjosho tupu, ame ngani powemwena mpepo yande na kuvapika mbava, vakafumu na vakamali. ³⁰ Liyuva olyo ngani tapa marondo muliwiru na palivhu, liyuva olyo ngakukara liteko honde na mundiro na maremo ghamuti. ³¹ Liyuva ngalishovagana kakwedi ngaka kushintunuka kakageha yira honde lyalyo ngalikara liyuva lyalinene lya Hompa lyakutjilita lya hana kutika. ³² Ngoli navantje ava ngava liliro kwaHompa ava vatere, ngava yowoka. Kundundu yaSiyoni na muJerusalemu ngakukara vamwe ovo ngava dukiro ko, yira moomo avi ghamba Hompa, mukatji kavo ngavaparuko, mbovo atohorora Hompa.