¹ Pano nizile kuli mwemwe, mwe yanji, ntizile namazwi ayakuvwama pamwi ayakuwachila amano pakuwasimichila ivya nkama yakwe Leza. Amabuku yanono ayampiti ayakulondwa ayachi Giliki yawalike pano nasambilizyanga ivyawumboni wakwe Leza. ² Amuno ntalondanga ukumanya chimwi pano nalinji namwemwe suka Yesu Kilisitu ampela, nkani - nkani imfwa yakwe pawuchingane. ³ Achaleka nalile pano niza kulimwemwe nali ne mtonthe, ninthete nukuzakaza umwili. ⁴ Amazwi yane nukukosola kwane kutalinji ukwakulambilizya nukuchila amano. Kweni, kwalinji ukwakusimichizya ukwa mupasi na maka, ⁵ Ukuti isuwilo linu litize liye mumano ya wanthu, suka mumaka yakwe Leza. ⁶ Kweni tukuvwanga amazwi ayamano kuli yano ayakuzi, kweni yano asamano ya munsi ya pansi yino, pamwi yakwe yakateka yansi ayandakayi, yano yakafwa. ⁷ Kweni tukuvwanga amano yakwe Leza ninkhama ya chumi, amano ya nkama yano Leza wayawumbulile mpiti ukuti tuchindamikwe. ⁸ Pnsi nanti wenga muli yakateka yansi ayandakayi wino wuvwichisizye, ngayatakomile mwene wawuchindame pa wuchingane. ⁹ Kweni muno amazwi yawalikwa, ''chino ilinso lisitela lilole,pamwi ikutwi chino lisitela lyuvwe, numwenzo wa munthu chino wusitela wuchelenganye achili chino Leza wayapekanizizya yano yamukunda.'' ¹⁰ Kwene Leza watuwumbulila vyonsi vino ukupitila mu mumupasi. Amuno umupasi wukakonkola ivinthu vyonsi nivyapansi nkani vino Leza wafisa. ¹¹ Wuzye weni angamanya amelenganyo ya munthu nkandi umupasi wakwe awuno wungamanya? Achili chonga, pansi wino wamanya vyakwe Leza nkandi umupasi wakwe weliwe. ¹² Swenji tutapochelela umupasi uwamunsi ya pansi kweni umupasi uwakufuma kuli Leza, ukuti tungamanya ivinthu vino watupela paluse. ¹³ Tukuvwanga vino tutakuvwanjila mumwazwi yano ayantu yasambilizyanga nkandi yano umupasi wasambilizyanga, pakulondolola ivintu vya mupasi kuli yano yali numupasi. ¹⁴ Umunthu wino asi numupasi atanga apochelele ivintu ivya mupasi ivyakufuma kuli Leza, pamulandu wakuti ivyasile - sile kuli weliwe. Nukuvimanya atanga avimanye pakuti umupasi wa vintu vino uwa mupasi wutupu. ¹⁵ Wino waya nu mupasi akapingula ivintu vyonsi, kweni weni kusi wino angamupingula. ¹⁶ ''Muno aweni angamanya amano yakwe mwene ilyakuti angamusambilizya?'' Kweni twaya na mano yakwe Kilisitu.