¹ Vunngi chi vu vaa lyiki ku toroka cho ku ichiriinzana kwe zintu zi va izuzirizwa mu kati keetu, ² siina mu va va zi tusiiri, aavo va vati ku ntanzi ni va zi lyi vonena cha menso mane ne ku va vahiikana vo mulaezo. ³ Lyinu naame kwaangu ku vaa lolyeki nenza - mu ku sakisisa ku izwiire kwe izi zichataantu ku zwa ku mataangiro aazo - kuti ni ku ngolyere cha zintu zi vaa chitahalyi cha maziimo a lukeere, uuwe Theophilasi yoo u zimeene cha mazimo malotu. ⁴ Ichi ku chitira kuti u woolye ku iziva vusakusima che zintu zo u vaa rutwa. ⁵ Mu mazuva a Herude, simwiine wa Judea, ku veena mupurisita yaa vaalyi ku sumpwa Zakariya, naa zwa mu ikauhanyo ya Abija. Muihyaavwe a vaalyi umwi wa vaana va Aroni, naa sumpwa Isabeta. ⁶ Va vaa ziimeene cho ku tamalala ha vusu vwe Ireeza, ni va teeka milawo yonse ne itaero ze Ireeza. ⁷ Lyinu ka heena va veena mwaana, mukuti Isabeta ka naa a veena luzaalo, mane naavo chi va vaa supeere mwe icho chivaka. ⁸ Lyinu ku vaa chitahalyi kuti Zakariya e ize ha vusu vwe Ireeza, ku ku chitahaza mitendo ye chipurisita ku ya che ikauhanyo yaa vaalyi ku tendera mu ilyi. ⁹ Kuya che izamaiso yo ku ti njeeni yo u salyiirwa uhi musevezi, a vaa salyiirwa kuti ive iye yo u injira mu Itempere cho ku ka suzirikiza kwe Ireeza. ¹⁰ Ikuunga lyonse lya vantu lyi veena hanze,ni va rapera mweeyo inako yo ku suzirikiza. ¹¹ Lyinu aho ingiloyi lye Ireeza cho ku voneka kwaalyi cho ku ziima ku mbalyi ya malyo e ialutara ye zitavero. ¹² Zakariya chiinga a mu vona, a vaa tiyi mu makando mane ne lyoowa cho ku mu injira. ¹³ Mmi ingiloyi ni lya mu cho kuti, ''Siye ku tiya Zakariya, mukuti itapero yaako i vaa zuweki.Muihyeenu Isabeta ka a ku hwizumukire mwaanaswiisu. Ka mu mu sumpe Johani. ¹⁴ Ka u ve ne vuitumero ne ku sannga, ne vunngi ka vu saangire ku zaalwa kwaakwe. ¹⁵ Ka a ve mukaando mu menso e Ireeza. Ka a lukeri ku nywa vujwara mane ne ku nywa zintu zi kalyi, ka a ku izwiire Luhuho lu Jolola ku ka zwa vulyo mu chivumbiro chi va nnyina. ¹⁶ Vunngi vwa vantu mwa Isiraere ka vu voolye kwa Simwiine Ireeza waavo. ¹⁷ Kaa yende ha vusu vwe Ireeza mu luhuho ne ziho za Elija. Kaa chitire vuti ku saandwiira inkulo zi veesivaana ku vaana vaavo. Ku chitira kuti va zwiire mu nzira va yende mu kutalyifa kwa vashiyami - ku ti ku woolyeke ku vaakanyeza Simwiine vantu va mu lyivereere.'' ¹⁸ Zakariya na itava ingiloyi naati, ''Ichi mu ni chi izive vulye? Ni supeere mane ne muihyeetu u supeere maaswe.'' ¹⁹ Ingiloyi ni lya itaava ni lyiti, ''Njeeme Habariela, yoo u ziima ha luvona lwa Ireeza. Ni va ka tumwa kuti ze ni wambe naawe, ku ku lyeetera anu makande malotu. ²⁰ Vone! ka u tontolye, ne u saa woolyi ku wamba, ku yenda mane iizi zintu ne zi chitahalye. Ichi chi chitwa ne kuti ka heena u vaa zumini manzwi aangu,eeti ni e izuzirizwa mu chivaka chi shiyeeme.'' ²¹ Lyinu, vantu va vaa lyindiire Zakariya. Va vaa komoketwa kuti chinzi haa vaa lyeehete mu itempere. ²² Lyinu chingaa zwiira kunze, a vaa kangwa ku va waambisa. Ni vaa lyemuha kuti a vaa vi ne ku voneswa cho wiina mukati ka itempere. A vaa kweete ku va wambiswa cho ku tondeza cha manza iiye cho ku shaala naa tontweere. ²³ Ni kwaa chitahala kuti mazuva aakwe wo ku tendera chingaa a kwana a voolyi ku nzuvo yaakwe. ²⁴ Mazuva chinga a yenda, mukaakwe Isabeta cho ku va ne muziyo mmi naa lyi wungula myeezi i mana iyaanza. Naati, ²⁵ ''Chinu nchaa va ni chitiri Ireeza chiinga a ni lola che chisemo ku chitira kuti a ni zwiisa insoni ha vuzu vwa vantu.'' ²⁶ Mu mweezi u mana iyaanza ne kaamwiina, ingiloyi Habariele a va ka tumwa ku ka zwa kwa Ireeza ku muzi mukando mwa Galaliya u sumpwa Nazareta, ²⁷ kwa kamwalye yaa vaa veereezwa ne mukwaame yaa vaalyi ku sumpwa Joosefa. A vaalyi we nzuvo ya Daafita, kamwalye iye a vaalyi ku sumpwa Mariya. ²⁸ Na iza kwaalyi cho kuti, ''Rumere! u sunitwa ahulu ku zaamba! Simwiine wiina naawe.'' ²⁹ Lyinu iye naa komoswa ahulu ne manzwi aakwe naa lyivuuza kuti ku rumereswa ko mushovo nzi kwiina vulyo. ³⁰ Ingiloyi ni lya mu cho kuti, ''Zwe mu lyoowa, Mariya, u sunitwa kwa Ireeza. ³¹ Vone, ka wu imite mu chivumbiro chaako cho ku hwizumuka muswiisu. Ka u sumpe izina lyaakwe kuti 'Jeeso.' ³² Kaa ve mukando mane ka a sumpwa Mwaana wo Mukando Si kuiwulu. Simwiine Ireeza kaa muhe vusimwiine vwa isikulwe Daafita. ³³ Ka a vuse mu nzuvo ya Jaakovo kuya ku hi ne kuhi mane keeti ne ku ve ne mamanimani ku muvuso waakwe.'' ³⁴ Mariya naacho ingiloyi naati, ''Ichi ka chi chitahalye vulye cho kuti ka kwiina mukwaame u chi ni vaa laalyi naaye?'' ³⁵ Ingiloyi ni lya itava cho ku mu cho kuti, ''Luhuho lu Jolola ka lu ize mwaako, ne ziho za Simwiine Sikuiwulu ka ziize ha iwulu lyaako. Lyinu uuzu yo u jolola yeeti naa hwizumukwa ka a sumpwa Mwaana we Ireeza. ³⁶ Vone,mukwaako Isabeta naaye a va imiti mwaanaswiisu mu vusupalyi vwaakwe. Unu mweezi waakwe u mana iyanza ne kaamwiina, iiye u ku vaalyi ku teewa kuti keena luzaalo. ³⁷ Mukuti ka kwiina cheeti ni chi kannge Ireeza.'' ³⁸ Mariya naati, ''Vone, ni muhikaanakazana wa Ireeza, ku chitahalye kwaangu ku ya cho mulaeza waako.'' Ingiloyi cho ku zwa cho ku mu siya. ³⁹ Mwaawo mazuuva Cho vu heeruku Mariya naa katuka a ho cho ku zwiira ku inkanda iina ha irundu mu muzi wa Judea. ⁴⁰ A va ka injiri mu nzuvo ya Zakariya cho ku rumeresa Isabeta. ⁴¹ Ni kwaa chitahala kuti Isabeta chingaa a zuwa ku rumereswa kwa Mariya, mwaana yaa veena mu ivumu lyaakwe cho ku chira, mmi Isabeta a va izwiire luhuho lu jolola. ⁴² A vaa nyemuni lyinzwi lyaakwe cho ku wambira ku iwulu naati, ''Wiina mu mikonde ku zamba vaanakazi, mane kwiina mu mikonde chihaantu che chivumbiro chaako. ⁴³ Chinzi ha kwaa ni chitahalyira kuti nnyina a Simwiine wangu a ize kwaangu? ⁴⁴ Mu kuti vone, chinga naa zuwa ku rumeresa kwaako mu matwi angu, lukeke lwiina mu ivumu lyaangu cho ku chira cho ku saanga. ⁴⁵ Wiina mu mikonde iiye yaa va zumini kuti zintu zi va wamvbwa ne Simwiine ka zi chitahalye.'' ⁴⁶ Mariya naa cho kuti, ''Luhuho lwaangu lu temba Simwiine, ⁴⁷ ne luhuho lwaangu lu sangite mwa Ireeza Muhazi waangu. ⁴⁸ Mukuti a vaa lolyi vuche vo muhikaana kazana waakwe. Mu kuti, vone ku zwa hanu zisi zonse ka zi ni sumpe yo wiina mikonde. ⁴⁹ Mukuti iiye mukaando a va ni chitiri zikulu, mane ne izina lyaakwe lyi jolweere. ⁵⁰ Mukuti ku fwiira inse kwaakwe ku zwa mu chisi ku ya ku chimwi chisi kwaavo va mu tiya. ⁵¹ Che iyaanza lyaakwe a va tondeza ziho; a vaa patalaza va lyi hindira ku iwulu che minahano ye inkulo zaavo. ⁵² A vaa soheri vavusi hansi ku va zwiisa mu zipura zaavo zo vusimwiine cho ku nyemwiina ha iwulu ve ziziimo ziina hansi. ⁵³ Va fwa inzala a va vai izuza che zintu zilotu, mmi va lyi kweetere cho ku va tumiza ne va lyi kumbeete. ⁵⁴ Muhikaana waakwe Isiraera, a va mu hi ituso ku chitira kuti a kumbulukwa ku fwiira inse ⁵⁵ (sina mwa a va lwiiri vaisheetu) kwa Aburahama ne vaizukulu vaakwe ku yenda mane ukoo ku seena mamanimani.'' ⁵⁶ Mariya a va ikalyi ne Isabeta myeezi i woola ku va yoo utatwe naa zwa a ho cho ku voola ku nzuvo yaakwe. ⁵⁷ Lyinu chivaka chi vaa siki cho kuti Isabeta a hwizumuke mwaane. A vaa hwizumuki mwaanaswiisu. ⁵⁸ Va ikalyiinseene naavo ne va kwaakwe ni vaa zuwa kuti Ireeza a va mu tondeza inse zikulu, ahulu mmi ni veeza ku ku sanga naaye. ⁵⁹ Lyinu ni kwaa chitahala kuti mu izuva lyi mana iyanza ne tootatwe ni vaa lyeeta muhwiire kuti za ijirikwa mu mupato. Ni va va mu sumpi ''Zakariya,'' ku mi wulyikira ha veesi. ⁶⁰ Mmi nnyina na itava kuti, ''Nee. Mwaa sumpwa Johani.'' ⁶¹ Ni va mu cho kuti, ''Ka kwiina umwi mu vakwaako yo u sumpwa cha ilyi izina.'' ⁶² Va vaa chitiri veesi zishupo zo kuti u saka kuti lukeke lu wulyikwa ani. ⁶³ Isi naa kumbiira ivwe lyo ku ngolyera nna ngola kuti, ''Izina lyaakwe nje Johani.'' Vonse ni vaa komokerwa ichi chintu. ⁶⁴ Hohwaaho vulyo kaholo kaakwe cho ku iwuka ne lulyimi lwaakwe cho ku sumununwa. A vaa wambi cho ku temba Ireeza. ⁶⁵ Lyoowa ni lya injira vonse va va ikeere naavo. Iizi zintu zonse ni zaa patalazwa konsekonse mwe iyo nkanda ya ha irundu ya Judea. ⁶⁶ Vonse va vaa zuwi, ni vaa lyi viika munkulo zaavo,ni vaati ''Uuzu mwaana ka ize ave muntu wiina vulye?'' Mu kuti iyaanza lya Simwiine lyi veena naaye. ⁶⁷ Isi, Zakariya a va izwiire Luhuho lu Jolola mmi naa porofita, naati, ⁶⁸ ''Ku tembwa Simwiine, Ireeza wa Isiraere, mu kuti cha a va zwi ituso mane ne ku izuziriza ku hazwa kwa vantu vaakwe. ⁶⁹ A va tu nyemwiini luziya lo ku hazwa mu nzuvo yo muhikaana waakwe Daafita, ⁷⁰ sina mwaa a va wambi cha kalomo ka vaporofita vaakwe va jolola va vaa halyi mu zivaka za kalyekalye. ⁷¹ Kaa tu lyeetere ku hazwa ku zwa ku vonse va tu toyete mane ne ku zwa mu iyanza lya vonse va sa tu suni. ⁷² Iichi ka a chi chitire kuti a tondeze inse ku vaisheetu ne ku kumbulukwa itumarano i jolola, ⁷³ ku lyikana kwaa va chiti kwa Aburahama isheetu. ⁷⁴ A vaa konki kuti, uswe ha tu lukululwa mu zira zeetu, ka tu woolye ku mu tendera ne tu seena lyoowa, ⁷⁵ mu ku jolola ne mu ku shiyama mazuva eetu onse. ⁷⁶ Eeni, naawe, muhwiire, ka u sumpwa muporofita wo Mukando ku Zonse, mukuti ka u yende ha vusu vwa Simwiine ku tamalaza inzira zaakwe, ne ku vaakanyeza vantu ku iza kwaakwe, ⁷⁷ ku lyeeta izivo yo ku hazwa kwa vantu vaakwe cho ku wonderwa kwe zivi. ⁷⁸ Ichi ka chi lyeetwa ne ku fwiira nse ku lotu kwa Ireeza, che ivaka lyo kuti kanyannge ka zwa ku iwulu ka keeze ka tu tuse, ⁷⁹ ku minikira avo va ikeere mu kaeirima ne mu munzuunde wo lufu. Iichi kaa ave ku chi chitira kuti a tondeza matende eetu mu nzira ye ikozo.'' ⁸⁰ Lyinu muhwiire naa kula cho ku kola mu luhuho, a vaa vi mu muzuka ku yeenda luzuva lo ku voneeka mu vantu kwa Isiraera.