¹ Lyinu mwaawo mazuva, ni kwaa chitahala kuti Sizara Augusta a lawulye kuti ku ve ne ku valwa kwa vantu mu nkaanda yoonse. ² Uuku ivaalyi ku valwa kwa vantu kwe intanzi ku vaa chitahalyi Kiriniyasi naa siri muvusi wa Siriya. ³ Lyinu umwi no umwi naa yenda ku muzi waavo kuti a ka lyi ngolyeseza ku valwa. ⁴ Joosefa naaye naa zwa mwa Galalia, mu muzi mukando wa Nazareta, ku ya kwa Judea, mu muzi mukando wa Daafita u suumpwa Bethelehema, mukuti a vaalyi umwi we inzuvo ne luzuvo lwa Daafita. ⁵ A vaa yi kwa teni ku ku ka lyi ngolyesa konse ne Mariya, waa ava veereza neena muziyo. ⁶ Lyinu ni kwaa chitahala kuti chi va siina uko, ni kweeza inako yo kuti a hwizumuke lukeke lwaake. ⁷ A vaa hwizumuki mwaanaswiisu, mwaanaakwe wa intaanzi, naa mu vungeera cha majira malye cho ku mu laalyika mu malyiiro, mu kuti kaheena va veena chivaka mwaawo meikalo. ⁸ Ku veena valyisani mwa icho chiraraanda, va vaalyi ku ikala mu mawa, ni va lyiisiiza zilyerantu zaavo masiku. ⁹ Ingiloyi lya Simwiine lyi vaa voneki ku vaalyi, ne ku vereennga kwa Simwiine ku miniki ku va zimbuluka,mmi ni va injirwa lyoowa lyinngi ahulu. ¹⁰ Lyinu ingiloyi ni lya va cho kuti, ''Mu zwe mu lyoowa, mukuti ni ka mu lyeetere makande malotu a keeza ku lyeeta ku sannga ku kulu mu vantu voonse. ¹¹ Izuva lya suunu,mwaa zaalyirwa muhazi mu muzi mukaando wa Daafita! Nje iye Simwiine Kirisiti! ¹² Iichi nje chishupo cheeti mu heewa: Ka mu ka waane lukeke ni lu vuungirwa mu majira ni lu lyeere mu malyiiro e zilyeraantu.'' ¹³ Hohwaaho ni kwaa ava konse ne ingiloyi, mupato mukulu we iwulu ni u temba Ireeza ni uti, ¹⁴ ''Ku vereenga ku ve kwa Ireeza yo wiina ku iwulu, ahulu mane ku ve ne ikozo mu nkaanda ku vantu voonse va mu saangisa.'' ¹⁵ Ni kwaa chitahala kuti lyinu mangiloyi a zwe ha valyi a voolye ku iwulu, mmi lyinu valyisani ni vaa wambiinsaana mu kati kaavo ni vaati, ''Tu kwiya lyinu he kwa Bethelehema, tu ka vone ichi chintu cha pangahala, iichi chaa tu izivisa Simwiine.'' ¹⁶ Ni vaa hweerera kwa teni cho ku ka waana Mariya ne Joosefa, ni vaa vona muhwiire naa lyeere mu malyiiro e zilyeraantu. ¹⁷ Chiinga vaa mana ku mu vona, ni va izivisa zi va vaa lwiirwa cho u zu muhwiire. ¹⁸ Vonse va vaa zuwi ni vaa komokerwa zi va vaa lwiira na ava valyisani. ¹⁹ Mmi Mariya na ikala naa zeezete izi zintu za a va zuwi, naa zi viikite mu inkulo yaakwe. ²⁰ Valyisani ni vaa vola ni va ya vu tembera Ireeza chimwi ni chimwi chi va vaa zuwi ne ku vona, che nzira i va vaa lwiiritwa chaayo. ²¹ Ku mamanimani e izuva lyo ku mana iyaanza ne too utatwe, a va injirikwa mu mupato, naa sumpwa Jeeso, izina lyaa va wulyikwa ne ingiloyi naa seeni ku vumbwa mu chivumbiro cha nnyina. ²² Chiinga kwaa mana mazuva a sakahala o ku jolozwa kwaavo, ku ya cho mulawo wa Mushe, Joosefa ne Mariya ni va mu lyeeta ku itempere mwa Jerusalema ku iza ku mu tondeza ha vusu vwa Simwiine. ²³ Sina mu ku ngolyetwa mu mulawo wa Simwiine, ''Mwaana swiisu zumwi ni zumwi u hwizumukwa tanzi u heewa Simwiine.'' ²⁴ Lyinu ni vaa zwiisa chitavero che inzira i ku wambitwa chaayo mu mulawo wa Simwiine, ''inkuva nandi inkwirimba zoo uvere.'' ²⁵ Mu vone, ku veena mukwaame mwa Jerusalema, izina lyaakwe ivaalyi Simiyoni, mane uuzu mukwaame a vaa zimene cho ku tamalala mane naa sa nyugonki. A vaa lolyereere ku humbulyizwa kwa Isiraere, mane ne Luhuho lu Jolola lu veena kwaalyi. ²⁶ Luhuho lu Jolola chi lu va mu toondeeza kuti keeti naa fwe naa seeni ku vona Kirisiti wo vuSimwiine. ²⁷ Simiyoni neeza mu itempere, na a lyeetetwa ne Luhuho. Vazaazi chiinga va ka lyeeta lukeke Jeeso, kuti ze ku chitwa kwaalyi ku ya che chizo cho mulawo, ²⁸ naa mu hinda mu maanza aakwe cho ku temba Ireeza naati, ²⁹ ''Lyinu muhikaana waako u woola ku lyi yendera cha ikozo, Simwiine, ku ya cha lyinzwi lyaako.'' ³⁰ Mu kuti menso angu chi aa vona ku haza kwaako: ³¹ ko u vaa vaakanya ha vusu vwa vantu voonse. ³² Mumini u tondeza Vasazi, ne ku verenngera ku vantu vaako Isiraere.'' ³³ Veesi ni vannyina muhwiire va vaa komokeerwa zintu zonse zi vaalyi ku wambwa chaakwe. ³⁴ Simiyoni naa a va itira mikonde cho ku cho Mariya nnyina kuti, ''Vone, uuzu muhwiire u salyiirwa ku wiira hansi ne ku vuuka kwa vantu vanngi mwa Isiraere mane ne ku va chishupo chi vaa kanwa - ³⁵ ne muso ka u ku tululye mu luhuho - ku chitira kuti ne minahano ya inkulo cho vunngi ne itondezwa.'' ³⁶ Muporofitinkazi yo u sumpwa Ana mpwaa veena. Ivaalyi mwaanakazana wa Fanuwelu ku zwa mu mushovo wa Asha. Cha a vaa kulyite. A vaa halyi ne muihyaavwe zirimo zi mana iyaanza ne to uvere ku zwa mu vukamwalye vwaakwe, ³⁷ neeza ku halyira mu vu fwiirwa zirimo zi lyikana makumi a mana iyaanza ne oo tatwe ne toonne.Ka heena a vaalyi ku zwa mu itempere mmi a vaalyi ku tendera mwa teni naa lyi nyima zilyo naa rapera, masiku ni musihalyi. ³⁸ Mmwe iyoiyo inako vulyo naa va chuutira cho ku taanga naa saanga kwa Ireeza cho ku wamba cho muhwiire kwa zumwi ni zumwi yaa a vaa zimaniine ku lukululwa kwa Jerusalema. ³⁹ Chiinga vaa mana chimwi ni chimwi chi va vaa lukere ku chitahaza ku ya cho mulawo wa Simwiine, ni vaa voola kwa Halalia, ku muzi waavo wa Nazareta. ⁴⁰ Muhwiire naa kula cho ku kola,naa weerekeka mu ku talyifa, ne mikonde ye Ireeza i veena kwaalyi. ⁴¹ Mwaaka ni mwaaka vazaazi va vaalyi ku ya kwa Jerusalema ku Mukiti wo ku Luutwa. ⁴² Chiinga a kwanisa zirimo zi mana ikumi ne to uvere, va vaa voolyi va yendi cha inako ya kalye ne kalye yo mukiti. ⁴³ Chiinga va ka ikala mazuva a kwanine wo mukiti, ni vaa tanga ku voola ku muzi. Mmi muswiisu Jeeso naa shala ku masulye mwa Jerusalema vazaazi vaakwe ni va seezi. ⁴⁴ Va va lyi lwiirite kuti wiina mu chikwata cha vantu va vaalyi ku kaya vweenda naavo, lyinu ni vaa yenda lweendo lwe chilyikanyo che izuva lyi mwiina. Cho ku taanga ni va mu saka mu kati ka vakwaavo ni valyikani vaavo. ⁴⁵ Chiinga va mu vula, ni vaa voola kwa Jerusalema cho ku ka taanga ni va mu lola kwa teni. ⁴⁶ Ni kwaa chitahala kuti, mu masulye a mazuva oo tatwe, va mu waane mu itempere na ikeere mukati ka varuti, naa a va teekete, naa va vuuza mapuzo. ⁴⁷ Vonse va va mu zuwiire va vaa komokeerwa ku lyemuha zintu kwaakwe ne muitaviro waakwe. ⁴⁸ Chiinga va mu vona,ni vaa komokwa. Nnyina naa mu cho kuti, ''Mwaanaswiisu waangu, chinzi ha wa tu hinda cha iiyi inzira? Teeke, ime ni veeso tu vaa ikalyiire ku ku saka cha inkulo zi sa ikeere.'' ⁴⁹ Ava va cho kuti, ''Mu vaalyi ku ni sakira nzi? Ka mu izi kuti ni lukeere ku va mu nzuvo i Vataayo?'' ⁵⁰ Mmi lyinu ka heena va vaa lyemuhi kuti aawo manzwi a talusa nzi. ⁵¹ Ku zwaaho naa voola naavo ku muzi kwa Nazareta naa ka va teeka. Nnyina naa vuluka izi zintu zonse mu inkulo yaakwe. ⁵² Mmi Jeeso naa wondesa mu ku kua cho ku talyifa ne cha maziimo malotu, naa weereka mu ku sunwa ne Ireeza ne vantu.