¹ Paulus, o mukarere ua Mukuru nu o muapostele ua Jesu Kriste, otja ko ngamburiro jo vatoororua va Mukuru, no ndjiviro ndje ura jo uatjiri mbu ri mongarero ja Mukuru, ² Mo maundjiro uo muinjo ua aruhe, imbui Mukuru ngu ha kora o vizeze mbua kuizikire ko murungu uo mautiro uo uje, ³ Nunguari mo majeneno uo tuveze mbua raisa mo mazuvarisiro, nga jandjeua ku ami otja ke rakiza ra Mukuru o mujame uetu; ⁴ Ku Titus, o muna uandje otja ko ngamburiro jetu atuhe: O tjari no unjanutima no hange oku za ku Mukuru ingui Tate, na Muhona Jesu Kriste o mujame uetu ku ove. ⁵ Ami mbe ku jesira ko Krete kutja u sembamise o vina mbia hepere, noku zika o vanene mo tjihuro atjihe, otja tji mbe ku zika. ⁶ Auhe ngu hina tjipo, o murumendu uo mukaendu umue, no vanatje o vatakame mbe ha varua o vahanduke poo o virangaranga. ⁷ Orondu o bishoper ja soku rira o muhinatjipo, otja o mutakamise uo vina via Mukuru: a ha rire o tjirangaranga, ngu ha rungarunga uriri, ngu ha suverere o mavinu, ngu ha suverere o viposa, ngu hina munenetima uoku hara o rutumbo no zondjira o zohasemba; ⁸ Nunguari ma soku rira o mundu uo ndjiririsa, o suvere uo uua, uo zondunge ozo ndjere, o mutakame, o mujapuke, uo meritjaerero; ⁹ Ngua kakatera Kembo indi e takame otja tje ri hongua, kutja a kare no mahongero o masemba nu a jenene o tjita imbi a vijevari, oku zeuparisa noku raisa o uposio ua imba mbe patina ro. ¹⁰ Orondu pena o vandu o vengi o vahazuva, mbe hungira o vina o mungandjo, nu o vapukise, tjinene oku za mu imba vo masukarisiro: ¹¹ Vo vinjo mbia soku setikua, mbe pukisa o zondjiuo oku ura, noku honga o vina mbi ve ha sere, kutja ve ritumbise mo zondjira nde ha puire. ¹² Umue uao o veni, o muprofete uao oveni, ua tja, “O Vakrete o vanavizeze aruhe, o vipuka o virunde, o mazumo o manararu o vingundi, ¹³ O mahongononeno inga o uatjiri. Opu ua soku ve vera tjinene no masa, kutja ve sembame mo ngamburiro; ¹⁴ Noku hina ku puratena ko vihambarere vio Vajuuta no matuako uo vandu, nge jepa mo uatjiri. ¹⁵ Ko vakohoke, ovina avihe ovikohoke. Nu ku imba mba tundaka nu ovehina ngamburiro, kakuna otjikohoke, nunguari na inda o zondunge no urizemburuka uao ua tundaka. ¹⁶ Ve hongonona kutjiua Mukuru, nunguari ve Mu ripatana no viungura viao. Ovanambondi, nu ovehinanduviro, nu o vehinambatero ko tjiungura atjihe otjiua.