¹ Nunguari ove hungira ovina mbia puira omahongero o masemba: ² Honga ovarumendu o vanene ve kare no zondunge o zondjere, ve rire o vandu mba puirua ijo ndengero, o vasemba mo ngamburiro, mo rusuvero, no mo muretima. ³ Honga Ovakaendu o vanene uina, kutja ve kare no meritjindiro nga puira o ujapuke, ave ha rire ovakuminine voku jamburura, ave ha suvere omavinu omengi, ovahonge vo uua, ⁴ nu uhonge ovakaendu imba ovatiti oku suvera ovarumendu vao, oku suvera ovanatje vao, ⁵ Oku kara no zondunge, ovehinatjipo, ovatakamise vo zonganda, ovananduviro ko varumendu vao oveni, kutja Embo ra Mukuru a ri ha jambururua. ⁶ Mo muano o tjingeuo ronga o mitanda oku kara no zondunge o zondjere, ⁷ Mo vina avihe amo ritjindi otja o tjihorera tjo ngaro jo viungura o viua: mo mahongero, mo ukohoke, mo ngaro ndja puirua ijo ndengero, mo utakame, ⁸ O munazondunge me hungi, o muhina mberero, kutja ingui o mupatane a tisiue o honi, tjinga ae hina tjina o tjivi tji ma jenene oku hungira o hunga na ove. ⁹ O vakarere ngave riuise kehi jo vahona vao, ave na o rutjato mo vina avihe, ave hina ku ve pirukira mo mahungi, ¹⁰ Noku hina ku vaka, nuguari ngave raise o ngamburiro aihe, kutja ve rihare no mahongero ua Mukuru o mujame uetu, mo vina avihe. ¹¹ Orondu o tjari tjo ndjamo tja Mukuru uetu tja munika ko vandu avehe, ¹² Ama tji tu hongo kutja, otja tjinga a tua hanika no zongaro zo kuhina Mukuru no zonduma zo uje, tua soku hupa no zondunge o zondjere, na mo usemba, na mo ngaro ja Mukuru mo ruveze ndui rua nambano, ¹³ A tua ziki o meho mo maundjiro o manandaja, no mamunikiro uo ujere ua Mukuru ingui o munene no mujame uetu Jesu Kriste; ¹⁴ Ngue rijandjera ete Eje o muini, kutja a jenene oku kutura ete mo maurunde ajehe, noku tu kohorora otja o vandu o katjondumba Ve o muini, mba pendaparera o viungura o visemba. ¹⁵ Serekarera o vina mbi, zeuparisa, nu u ronge no uvara auhe. Ape ningi umue ngu me ku njengura.