1
Nu mejuva oritjatatu pari omukandi mOkana tja Galilee. Nu inaa Jesu uari ngo.
2
Nu Jesu novahongeua Ve va nangerue korukupo.
3
Novo tjiva hepere omavinu, inaa Jesu ua tjere nai ku Je, Kavena mavinu.
4
Jesu Ua tja nai ku je, Mukazendu, mbina tjike kuena ove? Oruveze ruaNdje ngunda ka ru jeja.
5
Ina ua tjere kovakarere, Atjihe Tje mu hee, tjiteje tjo.
6
Nu pari ozonjungu zomaue hamboumue nde tizirua omeva, otja komuano uokukohororua kOtjijuuta, aihe aina mangara omahoro jevari poo jetatu.
7
Nu Jesu Ua tja nai kuvo, Uriseje ozonjungu nomeva.
8
Novo ve ze urisire nga pomina. Nu Eje Ua tja nai kuvo, Uoteje nambano nu tuareje komunane uomukandi. Novo va tuara ku je.
9
Nu ongui omunane uokandi tja rora inga omeva nga tanaurirua komavinu, (nu eje kaa tjiua kutja ja zupi nunguari imba ovakarere ija ve tjiua), omunane uomukandi ua isana omukupe, Natja ku je,
10
Ovandu avehe ve jeta omavinu inga omaua komautiro, nu ovandu tjiva zu nokunua naua, arire tjiva jeta inga nge heri omaua, nambano ove ua puike omavinu inga omaua ngamba.
11
Indji ombutiro jovihimise Jesu Ua tjita mOkana tja Galilee. Otjo tja vandurura oujere Ue, novahongeua V eave kambura mu Je.
12
Kombunda ja itji, Eje Ua ja ko Kapernaum, Eje na ina, novamuangu Ve, novahongeua Ve. Novo kave ka karere ngo omajuva omengi.
13
Nu omukandi uomarurumino uOvajuuta ua ri popezu, nu Jesu Ua ja kOjerusalema.
14
Nu Eje Ua vaza imba mbu ja ve randisa ozonduuombe, nozondu, nozonguti, novatjendje vovimariva.
15
Nu Eje tjaza nokuungura ongora jozongoze, Ue ve rambera pendje avehe, nozondu nozonduuombe, nu a uisire pehi ovimariva viovatjendje natanuna ovitihe.
16
Nu Eje Ua tja nai ku imba mbu ja ve randisa ozonguti, Isapueje ovina imbi imba, nu amu tanaurire kondjiuo jomarandisiro.
17
Novahongeua Ve va zemburukire kutja patjangua, "ozonduma zondjiuo joje zendji mana."
18
Nu Ovajuuta otji va zira nave tja ku Je, Otjisanekero tjaje tjimotu raisire, Ove tjimo tjiti ovina mbi.
19
Jesu ua zira na tja kuvo, Zundeje ondemberi indji nu momajuva jetatu Ami Me i jerurura.
20
Nu Ovajuuta otji va tja, "Ondemberi indji ja tungua ozombura omirongo vine na hamboumue, nu Ove mo i jerurura momajuva jetatu are?"
21
Nunguari Eje ija hee ondemberi joutu Rue.
22
Nu nambano Eje tjaza nokupenduka movakoke, ovahongeua Ve otji va zemburuka kutja Eje ua tjere nai kuvo, nu ave kambura momatjangua.
23
Nambano Eje tjari mOjerusalema mOmarurumino, ovengi va kamburire mEna Re tjiva muna ovihimise mbi ja tjiti.
24
Nunguari Jesu ke Ri jandjere kuvo, orondu Eje ija tjiua ovandu avehe,
25
Nu kahepere ko ouhatoi uomundu. Orondu Eje ije tjiua tji tjiri momundu.