¹ Puratenee nambano ene vatumbe, riree, uriree o mauzeu uenu ngu ma e ja kombanda jenu. ² Otutumbo tuenu tua uora, no zombanda zenu za riua ijo zohua. ³ Ongoldo no silveri jenu ja to mureru, nu omauzuuo ua vio ma je rire o uhatoi ohunga na ene, nu ma jee ku ria onjama jenu tjimuna omuriro. Ene mua uonga o vihuze mo majuva uo maandero. ⁴ Taree, o visuta vio vaungure imba mba konda o vikunino vienu imbi mbi mue ri puikira vi ravaera. Nu o zongo za imba mba konda za hita mo matui ua Muhona uo Sapaota. ⁵ Ene mua hupira mr viaro kombanda jehi, nu a mu hupire moku njandisa o zonduma zenu. Ene mua kora o mitima vienu, tjimuna me juva ro mazepiro. ⁶ Ene mua vara o musemba o munandjo nu amu mu zepa; eje ka pirukire ene. ⁷ Nu vakuetu, opu mua soku kara no muretima nga ko mwwro ua Muhona. Taree, omukune u undja o tjihape otjiua tjinene oku za mehi, nu u tji karera no muretima orure, nga tja jakura ombura ondemune na indjo seinina. ⁸ Ene karee no muretima uina; zikamisee omitima vienu orondu omeero ua Muhona je ri popezu. ⁹ A mu karasana no maunaunino, vakuetu, tjaa ngaa mu kara kehi jo mbanguriro. Taree, oMupangure ua kurama po mujero. ¹⁰ Vakuetu, tooree ovaprofete mba hungirire mena ra Muhona otja otjihorera tjoku hihamisiua mo mbamisiro no muretima. ¹¹ Taree, ete tu vara otja ovanandaja imba mbe nanena. Ene mua zuvira omuretima ua Joope, nu mua muna o maandero ua Muhona, kutja Muhona ue ura otjari no unjanutima. ¹² Nunguari kombanda jo vina avihe, vakuetu, amu jana ko, ne juru poo nehi, poo no rijano ruarue aruhe. Nunguari o ii jenu ngai rire o ii, no kako o kako, kutja amu ha uire mo mbanguriro. ¹³ Pena ngu hihamisiua mokati kenu? Eje nga kumbe. Pen a ngu na o ndjoroka? Eje nga imbure o mapialme. ¹⁴ Pena umue ngua vera mokati kenu? Eje nga isane o vanene vo kereka, nu ngave kumbire kombanda je, ama ve mu sopora no maze mena ra muhona. ¹⁵ Nu o ngumbiro jo ngamburiro mai verukisa ingui ngua vera, nu Muhona me mu pendura. Nu tje ri kutja eje ua tjitire o mauvi, eje ma jesirua uo. ¹⁶ Hongonenasaneje ozongatukiro, nu kumbirasanee, kutja mu jenene oku verukisiua. Ongumbiro otjindandi onamasa jo mukambure i ungura tjinene. ¹⁷ Erija ua ri omundu uo zonduma tjimuna ete. Nu eje ua kumbire no masa kutja ombura ai ha roko, nu ka pa karere ombura kombanda jehi o ure uo zombura ndatu no mieze hamboumue. ¹⁸ Nu eje ua kumba rukuao nu ejuru a ri jandja ombura, nu ehi a ri hapisa otjihape tja ro. ¹⁹ Vakuetu, tji pa kara umue uenu ngua jepe mo uatjiri, nu umue tje mu kotora, ²⁰ Tjiuee kutja ingui ngua kotora o murunde oku za ko ngatukiro jo ndjira je ua jama o muinjo ko ndiro, nu ma vandeke o mauvi o mengi.