¹ Vakuetu, o mundu tja taarua ijo uvi uorive, ene mbu mu ri mo mbepo, mua soku kotora o mundu o tja ingui mo mbepo jo merisusuparisiro, ama mu ritjevere o veni kutja ene uina amu ha rorua. ² Tjindirasaneje o mauzeu, no mo muhingo mbui mamu jenenisa o veta ja Kriste. ³ Orondu o mundu auhe ngu me rivara kutja o tjina, ae he ri o tjina, me ripukisa o muini. ⁴ Nunguari auhe nga varure o tjiungura tje o muini, nu indino otji ma kara nondjoroka mu je o muini, nu a ha rire ko mukuao. ⁵ Auhe tjinga ama tjindi o mutuaro ue o muini. ⁶ Nunguari ingui ngu ma hongua Embo, nga hanasane o vina imbi o viua avihe kueena ingui ngu me mu hongo. ⁷ Amu pukisiua, Mukuru ka hembua, orondu atjihe o mundu tji ma kunu, itjo uina otji ma kondo. ⁸ Orondu ingui ngu ma kunu mo njama, ma kondo o mazundakero mo njama; nunguari ingui ngu ma kunu mo Mbepo ma kondo o muinjo uaaruhe mo Mbepo. ⁹ Nunguari atu urisiua ijo ku ungura o uua, orondu mo ruveze tji rua jenene matu kondo, tji tu ha urirue. ¹⁰ Nu ngunda otja tji tuna o ruveze ngatu ungure o uua ku avehe, tjinene ku imba o vondjiuo jo ngamburiro. ¹¹ Tareje kutja mbe mu tjangere o mambo o manene vi neke randje. ¹² Avehe imba mbe zera oku munika naua mo njama, o mbe kondjisa kutja mu sukarisiue, kutja ave ha tatumisirua o tjikoroise tja Kriste. ¹³ Orondu nangarire ovo o veni mba sukara, kave takamisa o veta, nunguari ve vanga kutja ene mu sukarisiue kutja ve rihivire o njama jenu. ¹⁴ Nu Mukuru a jandjere kutja mbi rihive, pendje na mo tjikoroise tjo Muhona uetu Jesu Kriste, o uje mu ua papererua ko tjikoroise ku ami, na ami ko uje. ¹⁵ Orondu mu Kriste Jesu o masukarero kaje tjina o masa, poo o mahasukarero, nunguari o tjinahepero o mautiro o mape. ¹⁶ nu avehe imba mbe kaenda otja ko veta ndji, o hange nga i kare kombanda jao, no tjari, na kombanda ja Israel indjo ja Mukuru. ¹⁷ Ku imba avehe, ape ningi o mundu ngu me ndji kondjisa, orondu mba tjinda mo rutu ruandje o vivavize via Muhona Jesu. ¹⁸ O tjari tjo Muhona uetu Jesu Kriste nga tji kare pueena o zombepo zenu, vakuetu. Amen.