¹ Paulus, o muapostele, ngu ha zire ko vandu, poo oku zikua ijo mundu, nunguari ngua zikua i Jesu Kristen a Mukuru ingui Ihe, ngue Mu pendurire mo vakoke; ² Na imba o vakuetu avehe mbe ri pueena ami, ko zokereka za Galatia: ³ Otjari nga tji kare pueena ene, no hange oku za ku Mukuru ingui Tate, na ko Muhona uetu Jesu Kriste, ⁴ Eje omuini ngue ri jandjerere omauve uetu, kutja a jenene ok utu kutura mo uje mbui ua nambano uo uvi, otja ko mbango ja Mukuru na Tate uetu, ⁵ Ku Je nga rire oujere aruhe nga aruhe. Amen. ⁶ Ami mba himua kutja mo tjimanga nai ene mua humburuka ku Ingui ngue mu isanena mo tjari tja Kriste, nu mua jakura ombuze jarue: ⁷ Ndji he ri jarue, nunguari pena imba mbe mukondjisa, nu mba tanda oku rundurura indji oMbuze oMbua ja Kriste. ⁸ Nunguari nagarire ete, poo omujengeri ngua zu kejuru, tja zuvarisire ene oMbuzze oMbua jarue, pendje na indji ndji tua zuvarisire ku ene, eje nga sengue. ⁹ Otja tji tua here rukuru, nu ami me tja nao rukuao, auhe ngua zuvarisa ombuze jarue pendje na indji ndji mua jakura, eje nga sengue. ¹⁰ Orondu nai ami otji me popo ovandu poo Mukuru? Poo me paha oku tjatera ovandu? Orondu ami ngunda tji me tjatere ovandu, hi nee rire omukarere ua Kriste. ¹¹ Nunguari me zikamisa tji kuene, vakuetu, kutja o Mbuze ombua ndja zuvarisirue i ami, kai zire mo vandu. ¹² Ami tjinga ambi he i jakurire mo vandu, nu tji mbi he ihongerue ijo vandu, nunguari tji mbe ihongua ije vandururiro ra Jesu Kriste. ¹³ Orondu ene mua zuviririre ongaro jandje ngunda a mbi rim ongamburiro jo Tjijuuta, kutja mba tatumisire no masa vi okereka ja Mukuru noku i njona. ¹⁴ Nu uina mba riamene komeho tjinene mo ngamburiro jo Tjijuuta oku kapita ovengi mo tjiuana tjandje mo ruveze nduo, otja tji mba ri no zonduma tjinene no zombazu zoo tate. ¹⁵ Nunguari pa tjatere ku Mukuru ngue ndji puraurire oku za mo tjikuatero tja mama, nu E ndji isana mena ro tjari Tje, ¹⁶ Oku vandurura oMuna Ue mu ami, kutja mbi mu zuvarise mo viuana; nu tjimanga ami hina mba pahere o umune uo mbindu no njama: ¹⁷ Poo oku jenda ko Jerusalema ko vaapostele imba mba karere po ko murungu uandje; nunguari ami mba ja ko Arabia, nu ejaruka rukuao ko Damaskus. ¹⁸ Nu kombunda uo zombura ndatu mba ire ko Jerusalema oku ka muna Petrus, nu ekara pueena ej omajuva omurongo na jetano. ¹⁹ Nunguari hina mu apostele uarue omukuao ngu mba muna, pendje na Jamesa, ingui omuangu uo Muhona uetu. ²⁰ Nambano imbi mbi me mu tjngere, tareje, hina ku kora ovizeze po murungu ua Muhona. ²¹ Kuzambo mba ire ko makondua ua Siria na Silisia, ²² Nunguari o zokereka za Judea nderi mu Kriste, kaa ze tjiua o murungu uandje, ²³ Nunguari ija ze zuvire uriri kutja, "ingui ngu je tu tatumisa rukuru, nambano u zuvarisa o ngamburiro ndji ndji ja njono". ²⁴ Nu ovo va jandjerere ami o ujere ku Mukuru.