¹ Paulus, o muapostele ua Jesu Kriste otja ko mbango ja Mukuru, ko vajapuke mberi ko Efesus, nu o vatakame mu Kriste Jesu. ² O tjari ku ene no hange oku za ku Mukuru Tate uetu na ku Muhona Jesu Kriste. ³ Mukuru na Ihe uo Muhona uetu Jesu Kriste nga serue o ndaja, ngue tu sera o ndaja no zondaja azehe zo mbepo mo mauje uo majuru mu Kriste; ⁴ Otja indi tje tu toororere mu Je ko murungu uo mazikiro uo uje kutja tu rire o vajapuke noku hina tjipo po murungu ue mo rusuvero, ⁵ Mukuru tu tiererepo rukuru Eje o muini ok utu umba otja o vanatje mu Jesu Kriste, otja ko rutjato ruo mbango Je, ⁶ Ko ndangero jo ujere uo tjari Tje, Tje tu jakurire natjo mu ingui o Musuverua. ⁷ Mu Jesu Kriste tuna o maranduriro motjimbe tjo mbindu Je, o ndjesiro jo mauvi, otja ko mautumbe uo tjari Tje, ⁸ Tja tjita kutja tji takavarere ku ete mo mautumbe uo tjari Tje mo maunongo no manongononeno aehe; ⁹ Mukuru ua ongura o tjiukisire ku ete o tjiundikua tjo mbango Je, otja ko rutjato rue o ruua ndua tiere mu Kriste, ¹⁰ Kutja mo tjikando tjo majenenisiro uo tuveze, kutja a uongere kumue o vina avihe mu Kriste, o vina mbi ri mo majuru, no vina mbi ri kombanda jehi, avihe mu Kriste. ¹¹ Mu Kriste tua toororerua eta uina, tjinga a pa tierue komurungu uo ruveze, otja ko ndando ja Ingui ngu tjitira o vina avihe ko urizemburuka uo mbango Je o muini, ¹² Kutja ete tu rire o ndangero jo ujere Ue, mbu tua karere no maundjiro mu Kriste rukuru. ¹³ Mo Kriste,Ene uina,mu mua karere no maundjiro tji mua za noku zuva o Embo ro uatjiri, o Mbuze o Mbua jo ndjamo jenu, mu mua romberua no makuizikiro uo Mbepo o Ndjapuke tji mua kamburire, ¹⁴ Ngu ri o uhatoi ue ta retu, ko marandururiro uo mautumbe nga randua, ko ndangero jo ujere Ue. ¹⁵ Mena roku zuva indji o ngamburiro jenu mu Muhona Jesu no rusuvero ruenu ko vajapuke avehe, ¹⁶ Ami otji mbi ha kuramisa oku jandja po o ndangi ku Mukuru, noku mu kumbira aruhe mo zongumbiro zandje. ¹⁷ Mbe kumba Kutja Mukuru uo Muhona uetu Jesu Kriste, Ingui Ihe uo ujere, E mu pe o mbepo jo unongo nevandururiro moku Mu tjiua, ¹⁸ Mbe kumba Kutja O meho uo zondunge zenu a ja jerisiua, kutja ene mu tjiue kutja o maundjiro uo maisaneno ue o tjikuae, no kutja o mautumbe uo ujere ueta Re mo vakambure o nguae, ¹⁹ Mo zongumbiro zandje mbe ngigera kutja No kutja o unene uo masa Ue nga kapita ku ete o tjikuae, imba mbu tua kambura otja ko maunguriro uo masa Ue o manene, ²⁰ Inga nga ungurisire mu Kriste indi Tje mu pendurire mo vati, nu E mu haverisa ko Kunene kue mo mauje uo majuru. ²¹ Kombanda tjinene uo munane auhe, no uvara, no masa, no uhonapare, nena arihe ndi isaneua, ku ku he rim o uje mbui uriri, nunguari uina na mo ruveze ndu ma ru ja. ²² Mukuru ua tua o vina avihe kehi jo zombaze ja Kriste, nu A jandja ku Je oku rira o tjiuru tjo kereka kombanda jo vina avihe, ²³ O kereka o rutu Rue, o meurisiro ua Ingu ngu urisa ovina avihe mu avihe.