Ekondua omirongo vivari na hambondatu
1
Nu tji tua jamenue, otji tua tjivirue kutja o kakoverua nga ke isaneua o Malita.
2
No vature vehi ndo kave tu tjitirire o unjanutima mbua iririrua i jo vandu, nunguari ovo vetu jakisira o muriro nave tu jakura atuhe, tjinga o mbura a ija i roko nu aku no mbepera.
3
Nu Paurusa tja uongerere o ukune kumue ne utua mo muriro, o njoka otji ja pitire mena ro upiu, nai rimanga meke re.
4
Nunguari imba o vature vehi ndo tji va muine o tjipuka ama tjirekareka keke re, va tja nai, auhe ko mukuao, ''Noku hina mbata o murumendu ngui o muzepe ngu ri kutja, ua jamua ko muronga; o Mbanguriro kai na kumu jandjerere oku hupa.''
5
Indino eje otja pukumunina o tjipuka mo muriro, noku hina tjipo.
6
Nunguari ovo ve riraerere kutja ma suru, poo mave mu munu ama uire pehi aa koka tjimanga. Nunguari tji va zire noku mu tarera o rure noku hina tjipo tji ma tji ja ku je, va tanaurire o uripura uao nu a ve tja eje o mukuru.
7
Nu popezu no pona mbo pari ehi ro murumendu o hongora uo kakoverua, ngu ja isaneua Pubriusa. Ngue tu jakurire no tjikaro o tjiua, netu pe o mara o majuva jetatu.
8
Nu ihe ja Pubriusa ua rimo mara aa vere o tjindjumba no mupito uo mbindu. Nu Paurusa ua hitire ku je, nu a kumbu, ne mu jambeke o make, nu e mu verukisa.
9
Nu itji tji tja tjitua, o vakuao uina mbari no mitjise mo kakoverua ve ere, nave verukisiua.
10
Nu ovandu uina vetu tengere no zondengero o zengi. Nu tjija tu ritunine oku ka ronda o skepi oku jenda vetu pa o vina mbi ja tu hepa.
11
Nu kombunda uo mieze vitatu tua sekamene mo skepi tji tja karere okupepera mo kakoverua, tja Alekasandria, tji tjari ne ''paha ro umukuru'' otjo tjihako ko tjiuru.
12
Nu tji tua herukire mo tjihuro Sirakuse, tua karere mo o majuva jetatu.
13
Nu tji tua zire tua kaendere o ngondoroka, na tu ka vaza ko tjihuro tja Regiuma. Kombunda je juva rimue o mbepo je juva ko mamoho ja singire, nu mo majuva jevari tue ja ko Puteori.
14
Nu ingo oku tua vazere o vakambure, nu atu ningirua oku kara puena vo o majuva hambombari. Mu nao o tji tua hungama ko Roma.
15
Nu oku zambo ovakambure va ingo tji va zuva o hunga na ete, ve tu tjakanenene nga ko u kokure uo ruveze ruo marandisiro rua Apiusa, no Zondjiuo zo vaenda Ndatu. Nu Paurusa tja muine ua tjere okuhepa ku Mukuru na zeuparisiua.
16
Nu ete tji tua hita mo Roma, Paurusa ua jandjererue o ku rikarera nu kehi jo omusorondate nguari a e mu tjevere.
17
Nu pa kara nai kutja kombunda uo majuva jetatu Paurusa ua isanenene o Vajuuta o zohongora pamue. Novo tji va uongarerere pamue, eje ua tja kuvo, ''Varumendu ovakuetu, nandi hina tjipo tji mba tjita ko vandu poo ko zombazu zo ootate, mba jandjua otjo mukamburua oku za ko Jerusarema mo make uo Varoma
18
Ovo, tji va zire noku ndji kondonona zerire oku ndji kutura, tjinga ve hari ne zeva rokutja mbi te.
19
Nunguari o Vajuuta tji va pandere itji, mba janda a mbi hina muano uarue pendje noku rikuira ko Mukesare, nu ae heri kutja mbari no tjina tji je vara mo tjiuana tjandje ondjo.
20
Nu mezeva indi, nunguari, o tji mbe mu isanene, oku mu muna noku hungira kuena ene, orondu o mena ro maundjiro ua Isiraera otji mba zara oketanga indji.''
21
Novo va tja kuje, Ete uina ka tuna zombapira ndu tua jakura oku za ko Judea o hunga na ove, nu uina kapena umue uo varumendu ovakuetu mbe ere nave rakiza poo oku hungira o uvi o hunga na ove.
22
Nunguari ma tu zeri oku zuva move kutja mo ripura tjike, orondu otja ko kambumba nga, tu tjiua kutja ku hungirua navi o hunga na ko kona akuhe.
23
Novo tji va zikamisire ejuva kuena je, ovandu ovengi otji ve ere pu ja kara. Nu eje ua handjaurira ama hatoirire o uhona ua Mukuru. Ame ve zuvisa o hunga na Jesu, oku za mo Veta ja Mose, na mo vaprofete oku za ko muhuka nga ko mapeta.
24
Tjiva va itaverere o vina mbi ja vi hungirua nu tjiva kave itaverere ko.
25
Novo otja tji ja ve ha itaverasana mokati kavo o veni va kumukire Paurusa tja zire noku hungira embo rimue, ''O Mbepo o Ndjapuke Ua hungira naua mu Jesaja omuporofete koo iho.
26
Ama tja, ''Tuende ko vandu mba, nu ka tje, ''Oku zuva mamu zuu, nu ka muna ku pangununa; Oku muna, mamu munu, nu ka muna ku kondonona.
27
Orondu o mutima uo vandu mba ua tumbaera, no matui ja uoroparisiua oku zuva, nu va pata o meho uao. kutja tjaa ngaa ve munu no meho uao nave zuu no matui uao, nave pangununa no mutima uao, nave tanaurua, nu Ami E ve verukisa.'''
28
Nu otji pa soku tjiukua ku ene kutja o ndjamo ja Mukuru ja hindua ko viuana, nu ovio mavi i zuu.''
29
***
30
Paurusa ua karere o zombura mbari mo ndjiuo ndja kutisire o muini, na jakura avehe mbu ja ve hiti oku ja ku je.
31
Ama zuvarisa o uhona ua Mukuru noku honga o vina mbi mbi tjama ku Muhona Jesu Kristu no ovande auhe no kuhina tjima tjimu tjaere.