¹ Tjii matu utu oku ritjivisa kuene rukuao? Poo pena hepero tjimuna tji iripo ku varue jo zombapira zoku ve tjivisa kuene kutja o vasemba, poo o zombapira zoku ve tjivisa kutja o vasemba oku za kuene? ² Ene oveni uene o mbapira jetu ndja tjangua mo mitima vietu, ndji tjiukua noku resiua ijo vandu avehe. ³ Ndja raisiua po rutjandja kutja o uene o mbapira ja Krsite, jo tjiungura tjetu, ndji ha tjangerue no inga, nunguari ndja tjangua no Mbepo ja Mukuru o munamuinjo, ndji ha tjangerue mo maue o mapapi, nunguari ndja tjangua mo utjangerua o upapi uo njama jo mutima. ⁴ Nu indji ondikameno ndji tunajo mu Kriste po murungu ua Mukuru. ⁵ Ete ka tuja jenena mourike uetu oku rivara mo tjina atjihe, nunguari kutja, nunguari o majenenisiro uetu je za ku Mukuru. ⁶ Eje uina ngue tu tjita kutja tu ri re o o vazuvarise o vapue vo Merikutirokumue o Mape, nge he ri o uembo, nunguari nge ri o uo Mbepo: orondu embo ri zepa, nunguari o Mbepo i jandja o muinjo. ⁷ Nunguari o tjiungura tjo ukarere uo ndiro, tji tja tjangerue mo maue tji tja ri no ujere, mbua tjitire kutja o vanatje va Israel ave ha jenene oku huiririka o meho uao mu Mose, nu ouo mbua sere oku janda; ⁸ O tjiungura tjo ukarere uo Mbepo katjina ku kara vi no ujere oku kapita? ⁹ Orondu o tjiungura tjo ukarere uo mberero tji tja ri no ujere, o tjiungura tjo ukarere uo usemba otji matji kara no ujere tjinene oku kapita. ¹⁰ Orondu na itji tji tja ungurirue no ujere ka tjina tja ungurirue no ujere mo muano mbui, motjimbe tjo ujere mbui mbua kapita tjinene komeho. ¹¹ Nunguari itji tji tja imbirahiua tji tjari no ujere, itji o tjikarerere opu matji kara no ujere tjinene oku kapita mbui. ¹² Otja tjinga atu na o maundjiro ngeri nai, op utu kara no uvande tjinene. ¹³ Nu katu tjiti otja Mose nguja tuako o katjivikize kombanda jo murungu ue, kutja o vanatje va Isiraera ave ha huririke o meho uao mo ndjandero ja itji tji ja tji kapita. ¹⁴ Nunguari o uripura uao otji ua potuparisiua, orondu nga ku ndino o katjivikize o tjingeko o tjinga a ke kara po o Merikutirokumue o Makuru tji ma je resiua, otja tji ke ha isaperue, nunguari ku ke isapeua mu Kriste. ¹⁵ Nunguari nga ku ndino tji ma ku resiua Mose, o katjivikize ke kara kombanda jo mitima viao. ¹⁶ Nunguari tji kua tumbukirua ku Muhona oko ke isapeua. ¹⁷ Nambano Muhona o Mbepo, nu pu pena o Mbepo ja Muhona peno ngutukiro. ¹⁸ Nunguari ete atuhe, o mirungu vietu avi ha tjivikizirue, tu tara nu atu raisa o ujere ua Muhona tjimuna o tjiritarero, nu otji tu tjitukisirua ko saneno otjingeuo oku za ko ujere nga ko ujere, ijo Mbepo ja Muhona.