¹ Paulus o muapostele ua Muhona Jesu mo mbango otja ja Mukuru, na Timoteus o mukuetu, ko kereka ja Mukuru ndjiri ko Korinde, no vakambure avhe mbe rim o Akaja. ² O tjari nga tji kare pueena ene, no hange oku za ku Mukuru Tate uetu, na ku Muhona Jesu Kriste. ³ Mukuru nga serue o ndaja, ingui Ihe jo Muhona uetu Jesu Kriste, Ihe jo maunjanutima, nu nguri Mukuru uo mahuhuminino aehe, ⁴ Ngu tu huhumina mo zo mbamisiro zetu azehe, kutja ete uina tu jenene oku huhumina imba mberi mo mauzeu ajehe, no mahuhuminino inga ete o veni ngu tu huhuminiua nao i Mukuru. ⁵ Orondu otja inga o mahihamisiro ua Kriste tji tja takavara muete, o mahuhuminino uetu uina otji ja takavara mu Kriste. ⁶ Nunguari ete tji matu munu o uzeu, o kutja ene mu mune o mahuhumino no ndjamo, ndji ma jetua i joku nanena mu imbi o muhihamo o tjingevio ete mbi tu hihamisiua. Tji tua huhuminiua, o kutja ene mu mune o mahuhumino no ndjamo. ⁷ Nu o maundjiro uetu ku ene ja zikama, tjinga tu tjiua kutja otja tji mua uana na ete mo mahihamisiro, uina tua uanena o mahuhuminino. ⁸ Orondu, vakuetu, katuna ku vanga kutja amu ha tjiua o mahihamisiro uetu nge ja ku ete mo Asia, kutja tua ninikiziua oku kapita o masa uetu pu ja jenene oku zara, nga tji tua utu oku hahiza kutja matu hupu. ⁹ Nunguari tue ri no mbanguriro jo ndiro mu ete o veni, kutja atu he rijameke ku ete o veni, nunguari tu rijameke ku Mukuru ngu pendura o vati; ¹⁰ Ngue tu kutura ko ndiro o nene nai, nu ngu kutura; Mu tuna o maundjiro uo kutja ngunda mee ku tu kutura, ¹¹ Na ene uina amamu vatere pamue noku tu kumbira, kutja o tjijandjeua tjo tjari mo vandu o vengi tji rire 0tji jete tjo ku jandja o ndangi mo uingi uetu. ¹² Ete tu joroka mu itji, o mahongononeno uo urizemburuka uetu, kutja mo tjari tja Mukuru, tua kara no ngaro jo merisusuparisiro no uatjiri ua Mukuru mo uje nu tjinene ku ene, nu katu karere no unongo uo njama. ¹³ Orondu katu mu tjangere o vina viarue, pendje na imbi mbi mu resa poo mbimu muna, nu me kambura kutja mamu vi munu naua nai nga ko maandero. ¹⁴ Nangarire ene tji mue tu tjiua o hinga,kutja o uete enjando renu, otja indie ne uina tji muri e njando retu mejuva ra Muhona Jesu. ¹⁵ Nu mo masa uo ndjiviro ndji, mba vanga oku ja kuene rukuru, kutja mu kotokerue po tuvari. ¹⁶ Mbe ripura oku pitira muene tji mei ko Makedonia, noku kotoka kuene rukuao tji me zu ko Makedonia, nu kutja mu je ku ndji vatera mo ujenda uandje tji me hungama ko Judea. ¹⁷ Nu tji mbe ripurire omuano mbui, ee ivaiva? Poo o vina mbi me tie, mbi vi tia otja ko njama, kutja mu ami mu kare o ii, ii no kako, kako. ¹⁸ Nunguari Mukuru otjo mutakame, ete ka tutjere tjimue ii no kako. ¹⁹ Orondu o Muna ua Mukuru, Jesu Kriste, ngua zuvarisiua i jete mokati kenu; i jami na Silas na Timoteusa; ka rari o ii no kako, nunguari mu Je rari, ii. ²⁰ Orondu o makuizikiro ua Mukuru aehe mu Je, o ii, nu mu Je o Amen, Mukuru kutja a jozikue i ete. ²¹ Nunguari ingui ngu me tu zikamisa noku tu sopora pueena ene o Mukuru. ²² Nu Eje Ue tu tuako o tjihako, nu E tupe o tjijambo tjo Mbepo mo mitima vietu. ²³ Nu me isana Mukuru otja o hatoi jo muinjo uandje kutja ami tji mbi he ere ko Korinde jari oku jama ene. ²⁴ Kakutja tuna o uvara kombanda jo ngamburiro jenu, nunguari o uete o va vatere vo ndjoroka jenu; orondu mua kurama mo ngamburiro.