¹ Nunguari, ko tjirutenga, me rongo kutja o maningiriro, o zongumbiro, o mahekeneno, no majandjero uo ndangi nga je tjitirue ko vandu avehe, ² na ko zombara, na imba avehe mberi mo unane, kutja tu jenene oku hupa ohupo jo hange no upore, mo ngaro aihe jo umukuru no ndengero. ³ Orondu itji o tjina otjiua nu tjina o mutjato po murungu ua Mukuru, o mujame uetu. ⁴ Eje u zera kutja o vandu avehe ve jamue, nu ve vaze ko ndjiviro ndje ura jo uatjiri. ⁵ Orondu pena Mukuru umue uriri, no Muhanganise umue pokati ka Mukuru no vandu, o Murumendu ingui Kristu Jesu. ⁶ Neje ue rijandjere o muini otja o tjisuta tjo zondjo za avehe, airi otjina tjima tjije ku urikua o ruveze tji rua jenene. ⁷ Mo tjimbe tja nai opu mba zikirua o muzuvarise no muapostolo, -- nu me hungire o uatjiri, hina ku kora o vizeze --o muhonge uo Viuana mo ngamburiro na mo uatjiri. ⁸ Munai, otji mbe zeri kutja ovarumendu kona akuhe puveri ve kumbe amave jere o make o majapuke kombanda noku hina mapindi no viposa. ⁹ Nu uina noho mo muano tjingeuo, o vakaendu ve rizareke no muzaro mbue ve puira, a veno ndengero no kuritjinda okusemba, ku ku heri o merikutiro uo zondjise poo ongolta poo o maundjendje poo o mituaro vio ndiru, ¹⁰ nunguari no viungura o viua otja tji pa puira o vakaendu mbe hongonona o umukuru. ¹¹ O mukaendu uso kurihonga a umana no merisusuparisiro aehe. ¹² Nunguari hina ku jandjera o mukaendu oku honga poo oku kara no uvara kombanda uo murumendu, nunguari nga muine uriri. ¹³ Orondu Atama ua ungurirue rutenga, kuzambo arire tjikua ungurua Eva. ¹⁴ Nu Adam ka pukisirue, nunguari o mukaendu ua pukisiua nu arire o mukatuke. ¹⁵ Nunguari eje meje ku jamenua mo ku panduka ovanatje, ovo tji va kaondja mo ngamburiro no rusuvero no ujapuke no uritjinda ousemba.