¹ Omundu auhe otja soku tu vara otja o vakarere va Kriste, o vatakamise vo viundikua via Mukuru. ² Ko murungu ua itji, mokati ko vatakamise pena o hepero jo kutja auhe a vazeue aeri o mutakame. ³ Nunguari ku ami o kana o katiti tjinene kutja mbi pangurue i ene, poo ijo mbanguriro jo mundu; nunguari ami hi ri pangura o muini, ⁴ Orondu ami hi na tji mbi tjiua ku ami o muini. Nunguari hi sembamisiua i itji, nunguari Ingui ngu ndji pangura o Muhona. ⁵ Opu mu ha sere oku pangura ko o tjina ko murungu uo ruveze, nga Muhona Tje ja, Eje ngu mee ku jeta ko ndjerera ovina mbia undikua vio ndorera, na vandurura o uripura uo mitima. Nu kuzambo auhe otji ma peua o ndangero i Mukuru. ⁶ No vinambi, vakuetu, mbe vi ungurisire ene otja o tjisanekero ku Apolos na ami, kutja ene mu ete mu rihonge kutja amu he ripura o hunga no mundu kombanda ja imba pu pa tjangua, kutja ape ha ningi umue uenu ngu me ritongamisa kombanda jo mukuao. ⁷ Orondu o uani nue ku tjita kutja u ngare po mukuenu? Nu u na o tjikuae tji u ha jakurire? Nu tji ue tji jakura onguae tji mo rihivi tjimuna kotji jakurire? ⁸ Ene mue kuta hapo! Ene mua tumba hapo! Ene mua nana otja o vahona noku hina ete! Nu me zeri kutja mu nane tjiri, kutja ete uina tu nane puena ene. ⁹ Orondu me munu kutja Mukuru ua zika ete, o vaapostele, ko maandero otja mbu tua tierua oku ta; orondu ete tua rira o tjitarerua ko uje na ko vaengeri na ko vandu. ¹⁰ O uete o majova motjimbe tja Kriste, nunguari o uene o zonongo mu Kriste. O uete o vehinamasa, nunguari o uene o vanamasa. Ouene o vajozikua, nunguari ouete o vanjenguruandu. ¹¹ Nu nga ko ire ndinindji ete tu to ndjara no njota, nu tu ri muzu nu tu tonua, nu katuna ha ro maturiro. ¹² Nu tu ungura o uzeu no make uetu o veni; tji matu jambururua tu sera o ndaja, nu tji matu tatumisiua, tu nanena; ¹³ Tji matu tundua no mambo, tu riheka. Ete tu tjitua tjimuna o uete o vijaja vio uje, o vinjuru vio vina avihe nga ku ndino. ¹⁴ Hina ku tjanga o vina mbi oku mu tisa o honi, nunguari otjo vanatje vandje o vasuverua me mu rongo ¹⁵ Orondu nangarire tji muna o vahonge o majovi o murongo, nguari kamuna ooiho o vengi; orondu mbe mu kuata mu Kriste motjimbe tjo Mbuze o Mbua. ¹⁶ Opu me zu oku rijarikana kuene kutja mu ndji horere. ¹⁷ Otji me hindire o muna uandje o musuverua, ngua takama mu Muhona, Timoteus, ku ene, ngu meje ku mu zemburukisa o zondjira zandje mu Kriste, otja tji mbi honga akuhe mo kereka aihe. ¹⁸ Nambano tjiva ve ritongamisa, tjimuna hina ku ja kuene. ¹⁹ Nunguari me ja kuene mo hakahana, Muhona tji ma vanga, Nu hina ku je ku tjiua o mahungi ua imba mbe ritongamisa, nunguari o masa uao. ²⁰ Orondu o uhona ua Mukuru ka uri mo mambo, nunguari uri mo masa. ²¹ Mamu zeri tjike? Hije ku ene no ruhongue, poo mo rusuvero na mo mbepo jo ukozu?