¹ Paulus, ngua isaneua otjo muapostele ua Jesu Kriste mo mbango ja Mukuru, na Sosthenes, o mukuetu, ² Ko kereka ja Mukuru ndji ri ko Korinde, ku imba mba japurua mu Kriste Jesu, mba isaneua oku rira o vajapuke, pueena imba mberi kona akuhe mbe isana ena ra Muhona uetu Jesu Kriste, nguri o uao no uetu; ³ O tjari nga tji kare puna ene, no hange, oku za ku Mukuru Tate uetu, na Muhona Jesu Kriste. ⁴ Ami mbi mu tjera okuhepa aruhe ku Mukuru uandje, ko tjari tja Mukuru tji tja jandjeua ku ene mu Jesu Kriste, ⁵ Kutja movina avihe mua tumbisiua i Je, me hungi arihe na mo ndjiviro aihe; ⁶ Otja na inga o mahatoiriro ua Kriste tji ja jenenisiua mu ene: ⁷ Nu tji mu ha seerue kombunda nangarire m tjijandjeua tjimue, amu rim o maundjiro uo mavandururiro uo Muhona uetu Jesu Kriste. ⁸ Ngu Me mu zikamisa nga ko maandero uina, kutja mu vazeue o vehinandjo me juva ro Muhona uetu Jesu Kriste. ⁹ Mukuru o mutakame, Ngue mu isanena ko ruuano ruo Muna Ue, Jesu Kriste, o Muhona Uetu. ¹⁰ Nambano me mu ningire, vakuetu, mena ro Muhona uetu Jesu Kriste, kutja amuhe mu hungire o tjina tjimue, nu ape ha kara o mahanikiro mokati kenu; nunguari mu uanekue kumue naua mo ndunge imue no umune umue. ¹¹ Orondu imbo vo ndjiuo ja Kloe va horora ku ami, o hunga na ene, vakuetu, kutja mu no mahanikiro mokati kenu. ¹² Nunguari me hungire itji, Kutja auhe uenu utja, “Ami o uami o ua Paulus, na ami o uami o ua Apolos, na ami ouami o ua Kefas, na ami o uami o ua Kriste.” ¹³ Tjii Kriste ua hanika pokati are? Paulus ua papererua ene ko tjikoroise are? Poo mua peua o matutumikisiro mena ra Paulus? ¹⁴ Me tja okuhepa ku Mukuru kutja ami hina umue uenu ngu mba papitisa pendje na Krispus na Gajus; ¹⁵ Tjaa umue ngaa tja mba papitisa mena randje o muini. ¹⁶ Nu uina mba papitisa imbo vo ndjiuo ja Stefanus. Pendje na imba, hina ku tjiua kutja pena uarue ngu mba papitisa. ¹⁷ Orondu Jesu Ke ndji hindire oku papitisa, nunguari Ue ndji hinda oku zuvarisa o Mbuze o Mbua; ku ku heri no mambo uo unongo, kutja o tjikoroise tja Kriste a tji ha rire o mungandjo. ¹⁸ Orondu Embo ro tjikoroise o ujova ku imba mbu mave pandjara, nunguari kuete mbu matu jamua o masa ua Mukuru. ¹⁹ Orondu pa tjangua, Ami Me njono o unongo uo zonongo, nu Me jepisa oku pangununa ko vatjiue. ²⁰ O nongo ipi? O mutjange upi? O munazombata uo uje mbui upi? Tjii Mukuru ka jovarisire o unongo uo uje mbui are? ²¹ Orondu otja mo unongo ua Mukuru, o uje ka u tjivirue Mukuru mo unongo uauo, nunguari pa tjatera Mukuru oku jama imba mbu mave itavere mo ujova uo mazuvarisiro. ²² Orondu o Vajuuta ve paha o tjisanekero, nu o Vahirika ve aha o unongo: ²³ Nunguari ete tu zuvarisa Kriste ngua paperua ko tjikoroise, ko Vajuuta o tjiputarise, nu ko Vahirika o ujova; ²⁴ Nunguari ku imba mba isaneua, o Vajuuta no Vahirika avejevari, Kriste o masa ua Mukuru no unongo ua Mukuru. ²⁵ Orondu o tjina o tjijova tja Mukuru tji no unongo oku kapita o vandu, nu o tjina o tjihinamasa tja Mukuru tji no masa oku kapita o vandu. ²⁶ Orondu mamu munu o maisaneno uenu, vakuetu, kutja ka vengi otja ko njama o vandu mba isaneua, ka vengi o vanamasa, ka vengi o vo uhona. ²⁷ Nunguari Mukuru ua toorora o vina imbio vijova vio uje oku zepaisa navio o zonongo ko honi; Nu Mukuru ua toorora o vina o vihinamasa vio uje oku zepaisa navio o vanamasa o honi; ²⁸ Nu Mukuru ua toorora o vina mbia hahiziua vio uje, no vina mbia njengurua, no vina mbi heri ko, kutja A ririse tjo o vina mbi ri ko; ²⁹ Kutja o njama ai he rihivi po murungu Ue. ³⁰ Nunguari o uene o Ve mu Kriste Jesu, ngua ungurua i Mukuru kutja a rire o unongo, no usemba, no majapuriro, no maranduriro ku ete; ³¹ Kutja, otja tji pa tjangua, “Ingui ngu me rihivi nge rihive mu Muhona.”