¹ Nu ami, vakuetu, tji mbe ja ku ene, oku zuvarisa o Mahongononeno ua Mukuru, hi jendere no mahungi uo ndongamo poo uo unongo. ² Ami tjinga mba tiere oku hina ku tjiua o tjina mokati kenu, pendje na Jesu, nu Eje a a paperua ko tjikoroise. ³ Nu ami mba kara puena ene mo ungundi, na mo ndira, na mo mazezerero o manene. ⁴ No mambo uandje no mazuvarisiro uandje ka jari no mambo o mapope uo unongo uo mundu, nunguari jari no maraisiro uo Mbepo no masa, ⁵ Kutja o ngamburiro jenu ai ha zikamene mo unongo uo vandu, nunguari I zikame mo masa ua Mukuru. ⁶ Nunguari ete tu hungira o unongo mokati ka imba ovapue; o unongo mbu he ri ouo uje mbui, poo uo vanane vo uje mbui, mbe hina ku ma vei. ⁷ Nunguari tu hungira o unongo ua Mukuru mo tjiundikua, imbui o unongo mbua undikua, otja ko ndiero ja Mukuru ko murungu uo uje, kutja u rire o ujere uetu; ⁸ Mbu ha tjiukirue ko nangarire I umue uo vanane vo uje mbui. Orondu andaku ovo ve u tjivirue andaku ka ve zepire o Mbara jo ujere. ⁹ Nunguari otja tji pa tjangua, “Eho ka rija muna, poo o kutui kaku ja zuva,” nu uina kapena pa hitire mo mutima uo mundu, “o vina Mukuru mbia tunina imba mbe Mu suvera.” ¹⁰ Nunguari Mukuru Ue tu vandururira vio no Mbepo Je; orondu o Mbepo i pianga o vina avihe, na imbi o vikoto via Mukuru. ¹¹ Orondu o uani mokati ko vandu ngu tjiua o vina o hunga no mundu tje he ri o mbepo jo mundu ndji rim o ukoto ue? Mo muano o tjingeuo kapena ngu tjiua o vina via Mukuru pendje no Mbepo ja Mukuru. ¹² Nambano ete katu jakurire o mbepo jo uje, nunguari tua jakura o Mbepo ja Mukuru, kutja tu jenene oku tjiua ovina mbi tua peua o tjari i Mukuru. ¹³ O vina mbi tu vi hungira no mambo nge ha hongua I jo unongo uo vandu, nunguari nge hongua ijo Mbepo o Ndjapuke, oku sasaneka o vina vio mbepo kuena o vina vio mbepo. ¹⁴ Nunguari o mundu uo ngaro jo undu ka jakura ko o vina vio Mbepo ja Mukuru, orondu ovio o ujova ku je; nu uina ka jenene oku vi tjiua ko, ovio tjinga vi pangununua mo mbepo. ¹⁵ Nunguari ingui nguri o uo mbepo u pangura o vina avihe, nunguari eje o muini ka pangurua ko ijo mundu. ¹⁶ Orondu o uani ngua tjivirue o zondunge za Muhona, ngu ma jenene oku Mu honga? Nunguari ete tu na o zondunge za Kriste.