¹ TÖ̧Ä̧NÄ̧HUA̧MÄ̧ pa̧'a̧nö̧ pä'ö Ninive ötahuiyä tö'cömä. Nahum Elcos ttö̧ja̧sa̧ toinö töcö jiähuä'tä. ² TÖ̧Ä̧NÄ̧HUA̧ Diosmä ä'cuoyäu ja̧'hua̧ta̧'a̧nö̧ ppa̧'a̧di̧pö̧ todetö; ja̧'hua̧ta̧'a̧nö̧ rö̧ä̧nä̧ amisurutä kä̧cu̧; TÖ̧Ä̧NÄ̧HUA̧ aboiyotö suropätö ttö̧ja̧rö̧'i̧nä̧ mi̧cuämä jȩpö̧ juhua'atäcu aboiyotörö amisurumä yabonö otodönö ra̧huä̧rö̧. ³ TÖ̧Ä̧NÄ̧HUA̧MÄ̧ jurunämä ra̧huä̧ri̧po̧cö̧ ja̧'hua̧ta̧'a̧nö̧ ujurutä ku̧nä̧rö̧; aboiyotörömä yörö'isä adiu jȩpä̧tö̧ pä'ömä pä'ocö jä̧cua̧. TÖ̧Ä̧NÄ̧HUA̧MÄ̧ ajiya isoppa döoppanä 'chö̧ ja̧'hua̧ta̧'a̧nö̧ cu'upä urohuönä joppanä, juhua'atäcu TÖ̧Ä̧NÄ̧HUA̧MÄ̧ isoppanä rȩba̧ i̧sa̧ppȩ ö̧jä̧pi̧yä̧nä̧ cä'epö. ⁴ Ja̧u̧mä̧ aje dä'ähuotorö'inä ra̧huä̧ri̧pö̧ ja̧'hua̧ta̧'a̧nö̧ juoächi'önä'inä jȩpö̧; Ja̧u̧mä̧ ajehuiyämä o'cajuiyötä jo'ädö icu. Basán ötahuiyä'inä juiyöhua'a, ja̧'hua̧ta̧'a̧nö̧ carmel juhua'atäcu ä̧'u̧ líbanonä ka̧cu̧'i̧nä̧ juiyöhuö ja̧'a̧. ⁵ Möä'quiyömä ttö̧ä̧hua̧'a̧ ö̧jo̧mȩttö̧mä̧, ja̧'hua̧ta̧'a̧nö̧ po̧ri̧yä̧'tä̧ päi'ome'inä jahuächi'a'a; ö̧jo̧mȩttö̧mä̧ rȩjȩ'i̧nä̧ ma̧ä̧cha̧'a̧ ja̧'hua̧ta̧'a̧nö̧ pi̧jä̧'i̧nä̧ juhua'atäcu ttö̧ja̧ ka̧cuä̧tö̧mä̧ o'catoi'önätä̧. ⁶ ¿Di jä̧ttö̧ ö̧jä̧mȩda̧'a̧nö̧ hua̧mä̧ amisuräcu ä'ca jo̧mȩmä̧? ¿Di jä̧ttö̧ ö̧'ä̧i̧ ujuru ami'qui'achi'a'anö hua̧mä̧? Ö̧'ä̧i̧mä̧ ocurä jä̧'i̧nö̧'a̧nö̧ huerächa'a ja̧'hua̧ta̧'a̧nö̧ inähuiyä'inä dörpcha'a ja̧u̧nä̧mä̧. ⁷ TÖ̧Ä̧NÄ̧HUA̧MÄ̧ adihuä i̧sa̧, huȩnȩ jö̧ mo̧ro̧mä̧ dajahuächö ki̧'ä̧cuä̧hua̧ ja̧'a̧; ja̧'hua̧ta̧'a̧nö̧ päjimä jȩpö̧ chunä̧tä̧ dajahuächö ttö̧ji̧pa̧ pä'ö usätörömä. ⁸ Ja̧'hua̧nö̧ ja̧'a̧nä̧ aboiyotörömä o'catoi'önä̧rö̧tä̧ aje su'ädi'ö juatädi'önä jȩpö̧ si'epö i̧cuä̧cua̧; Ja̧u̧mä̧ yo̧ö̧ jacuä jubö päi'önä rö̧huä̧rä̧cua̧. ⁹ Tocu jȩpö̧ ttotte pö'anö̧ttö̧ TÖ̧Ä̧NÄ̧HUA̧RÖ̧MÄ̧? ¹⁰ Ja̧u̧mä̧ beépäjipö i̧cuä̧cua̧ ja̧'hua̧ta̧'a̧nö̧ aboiyotärömä todärenä jö̧nä̧mä̧ jȩpo̧cä̧ jä̧cua̧ micuämä! ti̧yȩ a̧ri̧ soäcä ppö'cähuächäcämä ja̧'hua̧ta̧'a̧nö̧ au tä̧'ä̧mä̧'chä̧tö̧mä̧, isä'cua joipächä'cua cuo'ö icua'a jä̧'i̧nö̧'a̧nö̧ 'cuo'ö tticuäcuotö. ¹¹ Ucuttö ya̧tȩ rä'opinö huȩnȩ 'quiecuä ttö̧ja̧sa̧ Balialttö TÖ̧Ä̧NÄ̧HUA̧RÖ̧ to'ija'acu amöcuädö suronä jȩpö̧rö̧mä̧. ¹² TÖ̧Ä̧NÄ̧HUA̧MÄ̧ pi̧yȩ pä'ö: Jahuätömä ttujurumä rö̧ä̧nä̧ ttu̧ju̧nä̧ra̧'a̧nä̧ ja̧'hua̧ta̧'a̧nö̧ recuätö tta'anä̧, ja̧'hua̧nö̧ huotö tta'anä si'epö icuähuäcuotö; jahuätömä yabonömä ko̧co̧tö̧ ttäcuotö. Ucu'inä Juda, ucurä cuȩmä̧u̧nä̧ jȩchi̧nä̧cu̧jä̧, täcö yabonömä usurä cuȩmä̧u̧nä̧mä̧ jȩpo̧cö̧ chä̧cua̧sä̧. ¹³ Jitämä ucuru a̧mä̧cö̧ cuaditönä huettä'ijo̧mȩttö̧mä̧ rä'epö chi̧cuä̧cua̧jä̧; Ttötä jä̧cua̧'a̧ cuoräu o̧sa̧ 'torö chi̧cuä̧cua̧mä̧." ¹⁴ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ hue'ö ucutu Ninive ttö̧ja̧ cutu'cötucu: "Cui̧tti̧mö̧ ucu cuimi ȩpä̧tö̧mä̧ yabonömä toäcua'a. Isotö tta̧'u̧cuä̧ 'co̧'ö̧ adicuä'inä, cu̧ä̧nä̧hua̧ ö̧jo̧denä cuoräuttö ȩttö̧ isotö tta̧'u̧cuä̧ adicuämä dochäu chi̧cuä̧cua̧sä̧. Cuhuaparebamä sadiyä̧cua̧jä̧, isopäi'önätä ucutumä cu'cähuocotöjä̧." ¹⁵ Topätucui, möä'canämä ya̧tȩ ö̧jä̧pi̧yä̧ pa̧'a̧ adihuäjuäi huȩnȩ i'cächö; U̧ni̧chä̧rö̧ kä̧cuä̧huä̧ ji'äu ja̧'a̧! Pä'cäri jȩpä̧tu̧cui̧, Judá ttö̧ja̧ ja̧'hua̧nö̧ jȩpö̧ jȩtä̧cuo̧tö̧jä̧ päcuinä̧tu̧cu̧mä̧ jȩpä̧tu̧cui̧, ja̧'hua̧nö̧ jȩ'cuä̧tu̧cuo̧mȩnä̧ surojömä yabonömä kȩdö̧mä icuoco̧u̧ cuäcuotöjä̧; jo̧mȩnö̧tä̧ ucutu cu̧'quȩtȩtu̧cu̧ttö̧mä̧ si'epötä icuähuäcuoto.