¹ Ja̧hua̧'a̧nö̧ ja̧'a̧ Jerobalmä (Gedeóntä̧ ji̧na̧'a̧) pä'ötä mo̧ro̧ pä'ia ä̧rä̧mi̧'i̧nö̧. Ja̧hua̧ta̧'a̧nö̧ o'catoinä chutä umuhuäyotö'inä porächi'inätö̧, jahuata'anö Harod rȩjȩtö̧ ajiya rä'opome ca̧ca̧cui̧pi̧nä̧tö̧. Jahuata'anö Madián su̧ra̧da̧u̧ äecu tu̧ju̧huo̧mȩmä̧ ki̧na̧'a̧ ka̧cua̧ u̧huo̧jua̧cu̧ päteö juenemä meje'ca pämäroppa pä'iome ji̧na̧'a̧ More de'a tö'cö jo̧mȩ. ² TÖ̧Ä̧NÄ̧HUA̧ pä'inö Gedeónrö̧: "Su̧ru̧da̧u̧ juiyo röä'inä ja̧'a̧ Madian ttö̧ja̧rö̧ rohuäu cujjuruhua pä'ö chiyacu pä'ömä, ja̧hua̧'a̧nö̧ jö̧ttö̧mä̧ Israel ttö̧ja̧ttö̧ cha'cattöö pätta'acu: " ki̧'i̧pi̧nä̧tö̧jä̧ ta̧mo̧nä̧ tujurunä. ³ Jitä ja̧hua̧nö̧ ja̧'a̧ttö̧, jiähui ttö̧ja̧ tä̧ju̧cu̧nä̧ ye'ecu ttö'ähuätömä jaropiö ppa̧ta̧cha̧ Gaáad deacutä ja̧hua̧nö̧ ja̧'a̧ttö̧ veinte y dos milnö ttö̧ja̧ jo̧mȩnä̧ ppa̧'a̧chi̧nä̧tö̧ ja̧hua̧ta̧'a̧nö̧ diez milnö ka̧cui̧pi̧nä̧tö̧. ⁴ TÖ̧Ä̧NÄ̧HUA̧ pä'inö Gedeónrö, " ji̧nä̧ recuätö ja̧'a̧. Ajiya ttahua ȩpi̧tö̧ ttötä ja̧'a̧ jȩchä̧cua̧mä̧ ucucu a̧'u̧cu̧nä̧tä̧ pätti'önä, ucuru pädöttö pidemä ucucu i̧'chä̧cua̧, ja̧u̧mä̧ ucutäcu i̧chä̧cua̧, ja̧hua̧nö̧ ja̧'a̧nä̧ pädöttömä pidemä ucucumä i̧'chö̧ jui̧yä̧cua̧, ja̧u̧mä̧ 'cho̧cö̧jä̧cua̧". ⁵ Ja̧hua̧nö̧ ja̧'a̧ttö̧ Gedeónmä a̧jȩra̧'a̧ ȩpi̧nä̧u̧, TÖ̧NÄ̧HUA̧MÄ̧ ja̧u̧ru̧ pä'inö: "Ajiya po̧'i̧pö̧ ttahuomettö 'cä̧ȩpi̧tö̧ ähuiri po̧'i̧pö̧ ahua'a jä̧i̧nö̧'a̧nö̧, jitö ttihue'quiyunä pä̧mä̧dö̧ ahuatömä". ⁶ Tresciento u̧mä̧tö̧ po̧'i̧pö̧ ahuinätö̧. Korotö u̧mä̧tö̧ päjätömä ttihue'quiyunä pä̧mä̧dö̧ ajiya ahuinätö̧. ⁷ TU̧RU̧HUA̧MÄ̧ Gedeónrö̧ pä'inö, "Trescientonö̧ huotö u̧mä̧tö̧ po̧'i̧pö̧ ahuäjätucutä, surojuttö ucuru rä'epö chicuäcua̧sä̧ ja̧'hua̧ta̧'a̧nö̧ Madián ttö̧ja̧rö̧'i̧nä̧ rohuäu isojuocuepönä ppä̧dä̧dä̧cua̧jä̧. Korotö u̧mä̧tö̧rö̧mä̧ ttö̧jä̧'i̧jo̧mȩcu̧tä̧ ppa̧ttä̧cha̧ hue'ö icuitö." ⁸ Ja̧'hua̧nö̧ ja̧'a̧ttö̧ ö'ojo'ä̧u̧mä̧ ttu̧cuȩ'i̧nä̧ ȩmö̧ kkä̧nö̧, ttiäre trompetas'inä ȩmi̧nä̧tö̧. Israel ttö̧ja̧ttö̧ u̧mä̧tö̧ o'catoi'önärö̧ isotö tti̧jȩti̧yu̧ttö̧ 'tö̧ä̧hua̧'a̧ yotucupönä a'ecu ttö̧ja̧cuä̧'i̧jo̧mȩcu̧ hue'ö icuinä̧ö̧, ja̧'hua̧nö̧ ja̧'a̧nä̧ trescientonö huotö u̧mä̧tu̧cu̧tä̧ ki̧'i̧pi̧nö̧. Ja̧'hua̧nö̧ ja̧'a̧ chutä ö̧jo̧mȩ dȩa̧'a̧nä̧ pämäroppä päi'ome ki̧na̧'a̧ Madián a'ecu ttö̧ja̧cuo̧mȩmä̧. ⁹ Ja̧u̧tä̧ yodo TU̧RU̧HUA̧MÄ̧ ja̧u̧rö̧ pä'inö̧: " Ä̧rä̧mi̧'ö̧! suroda̧u̧ ä'ecu ka̧cuä̧tö̧rö̧ ruhuähui, ttötä jä̧cua̧'a̧ jahuätörö rohuäu isojuocuepönä ppädädäcua̧mä̧. ¹⁰ Ja̧'hua̧nö̧ ja̧'a̧nä̧ curohuähua pä'ö yecuecuttömä, ä'ecu ttö̧ja̧cuo̧mȩ dȩa̧'a̧nä̧ cu̧mö̧huä̧ya̧ Furacu täi, ¹¹ 'chä̧hui̧'ö̧mä̧ jahuätö ttöcuocu cuä̧ju̧cuo̧mȩnä̧ ucu yecuecuäja'amä cujuruhuächi'äjäcua̧jä̧ suroda̧u̧ ä'ecu ka̧cuä̧tö̧rö̧ curohuähua pä'ömä." Ja̧'hua̧nö̧ ja̧'a̧ttö̧ Gedeónmä̧ u̧mö̧huä̧ya̧ Furacu 'chi̧nö̧ ä'ähuarä suroda̧u̧ tta̧ttä̧ro̧mȩcu̧. ¹² Madian ttö̧ja̧'i̧nä̧, Amalec ttö̧ja̧'i̧nä̧, ja̧hua̧ta̧'a̧nö̧ o'catoi'önä ttö̧ja̧ juȩn pämäroppänä ttö̧jo̧cua̧ pä'ö huettinäumä recuächinätö̧ mä̧rä̧cä̧yu̧ ttirecuächa'a jä̧i̧nö̧'a̧nö̧. Ttä̧ji̧mö̧ cameju̧tu̧mä̧ pä̧ja̧cuo̧mttö̧'i̧nä̧ abonänö recuinätö̧; jahuätömä recuinätö̧ rȩba̧ inäsa dadä'ähuotottö jäyoto pä̧ba̧ jä̧'i̧nö̧'a̧nö̧ ¹³ Ja̧hua̧nö̧ ja̧'a̧ Gedeón juȩnȩ ö̧rä̧bȩhui̧o̧mȩnä̧ ya̧tȩ u̧cuo̧ti̧ jiähuinö chucu ö̧jä̧cu̧ru̧. Ja̧u̧ ubomä pä'inö: "¡Topi! ji̧yȩtȩ cuo̧ti̧cuä̧ji̧sä̧ ja̧hua̧nö̧ ja̧'a̧ topäjisä jiäte pa̧ppä̧ cebadattö adicuä̧ppä̧ Madian su̧ra̧da̧u̧ tta'ahuäräcu pu̧ra̧cua̧'a̧. Rȩbȩhui̧'a̧ ja̧'a̧ isode 'cuä'ächö ttö̧'o̧denä ja̧'hua̧ta̧nö̧ pä̧i̧cu̧nä̧ cuä'ähuächö 'poächä ja̧'a̧ jörächi'önä. ¹⁴ ka̧ra̧ ubo'inä pä'inö: "Pi̧yȩmä̧ koromäcö̧ Gedeón ucurächu ja̧'a̧ (Joas i̧tti̧) Israel ttö̧ja̧sa̧. Diostä iyinäcu̧ ujuruhua pä'ö Madian ttö̧ja̧, ja̧'hua̧ta̧'a̧nö̧ o'catoi'önä su̧ra̧da̧u̧ru̧'i̧nä̧ ¹⁵ Gedeónmä ttu̧'cua̧ti̧cuä̧ji̧ jä̧ji̧ jittähua'a ä̧ju̧cu̧, ja̧u̧mä̧ pä̧mä̧dö̧ u̧ru̧hua̧rö̧ ra̧'ö̧ esehuinö. Ja̧u̧mä̧ Israel ttö̧ja̧ ttä'ähuaränä 'chä̧hui̧'ö̧ pä'inö: "Ä̧rä̧mi̧'ä̧tu̧cui̧! TU̧HUA̧RU̧MÄ̧ Madián ttö̧ja̧ttö̧ suroda̧u̧rö̧ rohuäu isojuocuepätucua pä'ö i̧yä̧u̧jä̧." ¹⁶ Ja̧u̧mä̧ trescientosnö huotörömä huobosacuä jo̧mȩnä̧ 'kȩ'ȩpö̧ ku̧ni̧nö̧, ja̧'hua̧nö̧ jȩpö̧ 'kä̧nä̧ri̧ o̧yu̧ joö o̧yö̧ ji̧yu̧cu̧pö̧nä̧ jacuä tejähuore ka̧cua̧'a̧ iyä'chinä̧u̧. ¹⁷ Ja̧u̧mä̧ jahuätörö pä'inö: " Ttö jȩchu̧ta̧'a̧nö̧ topö jȩpä̧tu̧cui̧. Adiu topätucui! Ttä'ähuarä jäyä 'chä̧hui̧'ö̧, ttö jȩchu̧ta̧'a̧nö̧ ucutu'inä jȩ'cuä̧tu̧cua̧jä̧. ¹⁸ Ttö'inä ja̧'hua̧ta̧'a̧nö̧ o'catoi'önä ttöcu kä̧tö̧'i̧nä̧ trompetas ppötomenä, ucutu'inä ja̧'hua̧ta̧'a̧nö̧ cuiäre trompetas ppöcuätucuaja, ja̧'hua̧ta̧'a̧nö̧ o'catoi'önä ä'ähuaränä ka̧cuä̧tö̧mä̧ huottäcuotö, TU̧RU̧HUA̧ i̧mi̧nä̧'i̧nä̧ ja̧'hua̧ta̧'a̧nö̧ Gedeón i̧mi̧nä̧'i̧nä̧!" ¹⁹ Ja̧'hua̧nö̧ ja̧'a̧ttö̧ Gedeónmä ciennö u̧mä̧tu̧cu̧ ichi'inö chutäcu ka̧cuä̧tu̧cu̧ ttä'ahuarä jäyä tö'cö, pätetö päjita'anö yodo kä'co päiome. Ja̧'hua̧ta̧'a̧nö̧ Madian ttö̧ja̧ pätetö pättäjitä'anö su̧ra̧da̧u̧ru̧ parotö tticuome ji̧na̧'a̧, jahuatömä ppu'inätö̧ ttöäre trompetas ja̧'hua̧ta̧'a̧nö̧ ttöäre kä̧nä̧ri̧o̧yu̧ tu̧mu̧nä̧ chu̧tä̧rä̧ji̧ dirö ihuinätö̧. ²⁰ Huabosacuä jo̧mȩ ttö̧ja̧ u̧mä̧tö̧ ppu'inätö̧ trompetas ja̧hua̧'a̧nö̧ jȩpu̧ dirö ihuinätö̧ ttöäre kä̧nä̧ri̧ o̧yu̧. Jahuätömä chuä̧ri̧nä̧tö̧ ttöäre tejahuore tu̧huo̧jua̧nä̧ i̧sa̧mu̧nä̧ pputtopa pä'ö. Jahuätömä huopinätö̧ << Ttö̧ä̧nä̧hua̧ ucurä'chuja̧'hua̧ta̧'a̧nö̧ Gedeon'inä>>. ²¹ U̧mä̧tö̧ ya̧cu̧pö̧nä̧ ttä'ahuarä jäyä sobucuächönä tta̧'a̧rö̧ ka̧cui̧nä̧tö̧ ja̧hua̧nö̧ ji̧yä̧u̧ o'catoi'önä Madian su̧ro̧da̧u̧mä̧ jopöächinätö̧. Jahuätömä tö'ipö huopinätö̧. ²² Jahuätö tresciento trompeta jo̧mȩ pputtomenä TÖ̧Ä̧NÄ̧HUA̧MÄ̧ Madian ttö̧ja̧ ttucurä'chiyu abetinö ttamonä ttahuaruhuäcutä ja̧hua̧ta̧'a̧nö̧ o'catoi'önä jitötä isotö su̧ro̧da̧u̧cu̧tä̧ ttörohuäunä. Su̧ra̧da̧u̧mö̧ tö'ipächinätö̧ Bet sata jubö Zerera'a̧cu̧, Abel Mehola tti̧rȩjä̧ beipomecu̧, Tabat tö'cöcu. ²³ Israel ttö̧ja̧ttö̧ u̧mä̧tö̧mä̧ Neftalí ahuaruhuä 'cotörö'inä, Aser ahuaruhuä 'cotörö'inä, ja̧'hua̧ta̧'a̧nö̧ o'catoi'önä Manasés ahuaruhuä 'cotörö'inä u̧mi̧cu̧ rättopönä huopinö, ja̧'hua̧nö̧ huo̧ä̧jä̧u̧mä̧ Madián ttö̧ja̧ tto'ca'anä 'chi̧nä̧tö̧. ²⁴ Gedeónmä huȩnȩ jiäcuähuä i̧sa̧rö̧ hue'inö Efrain i̧rȩjä̧nä̧ po̧ri̧yä̧'tä̧ jo̧mȩnä̧ 'chä̧nö̧ ji'ähuönä: "Madián ttö̧ja̧cu̧ curohuähuätucua mȩjä̧huä̧tu̧cui̧ ja̧'hua̧ta̧'a̧nö̧ Jordán aje'inä 'chu'ädätucui Bet Bara jubö juhua'a yabonö tti̧'chu̧ juiyönä." Ja̧'hua̧nö̧tä̧ o'catoi'önä Efraín ahuaruhuä 'cotöttö u̧mä̧tö̧mä̧ ca̧ca̧cui̧pö̧ ajemä̧ 'chu'ädinätö̧ Bet Bara jubö cä'ädö ja̧'hua̧ta̧'a̧nö̧ Jordán aje'inä. Jahuätömä Madián rȩjȩnä̧ ruhuo hue'ätö ta̧ju̧ru̧ 'chu'ädinätö̧, Orebrö'inä ja̧'hua̧ta̧'a̧nö̧ Zeebrö'i̧nä̧. ²⁵ Jahuätö ru̧hua̧ Orebrömä, Oreb inähuättö cuä'ö icuinätö̧ ja̧'hua̧ta̧'a̧nö̧ Zeebrömä̧, uvasttö Zeeb a̧huȩ vino päi'önä aditö 'cuȩ'cuä̧huo̧mȩttö̧ cuä'ö icuinätö̧. Jahuätömä Madián ttö̧ja̧ tto'ca'anä ruhui'inätö, ja̧'hua̧nö̧ ruhui'i'ä'cotömä Oreb u'inä, Zeeb u'inä i'cächu iyinätö̧ Gedeónrö̧, Jordán aje ji̧jä̧cu̧nä̧ ku̧rö̧.