¹ Ja̧u̧nu̧ o'ca'a Israel ttö̧ja̧mä̧ ttö̧jä̧'i̧jo̧mȩcu̧, ppa̧ttä̧chä̧ji̧ o'ca'a kä̧hua̧ koromöttö̧ ta̧ju̧ jo̧mȩnä̧ päi'ina'a, ja̧'hua̧nö̧ ja̧'a̧ Jerusalénttö ji̧na̧'a̧ yo̧mȩtȩ ca̧ca̧cu̧ pätti'omenämä ubo ya̧tȩnö̧tä̧ pättia'a jä̧'i̧nö̧'a̧nö̧ pä'i'inätö̧. ² Josadac i̧tti̧ Jesúa'inä, ahuaruhuä'inä Diosttö'inä, ttö̧ja̧ttö̧'inä ppä̧dä̧rä̧cuä̧huä̧ ttö̧ja̧mä̧ jahuätömä Salatiel i̧tti̧ Zorobabel'inä. Ahuaruhuämä ä̧rä̧mi̧'ö̧ Israel TTÖ̧Ä̧NÄ̧HUA̧RÖ̧ i̧sa̧rö̧ ku icu iyähuome aditinätö̧, ja̧'hua̧ta̧'a̧nö̧ Dios umöhuä̧ya̧ Moisés i̧huȩyu̧ti̧nö̧ hueähuä huȩnȩ päö'acuä ppädäcuähuä ttiya pä'ö. ³ Ja̧'hua̧nö̧ ja̧'a̧ jahuätömä i̧sa̧rö̧ ku icu iyähuome kada'ca ka̧cui̧nä̧tö̧ juiyo yecuäcuähuämä jitönämä ka̧'a̧tä̧ surojömä pȩja̧'a̧ tti'ä suronä jȩttö̧ttö̧ juhua'attö iyinä̧tö̧ TTÖ̧Ä̧NÄ̧HUA̧RÖ̧ päia'anä ja̧'hua̧ta̧'a̧nö̧ ö̧'ä̧i̧ ni̧pä̧chi̧'a̧'a̧nä̧ mipponä i̧sa̧rö̧ ku icu iyähuä. ⁴ Jahuätömä Ovejatö̧ ttöäre pä'cäri'inä topinätö huȩyu̧cuä̧ huȩnȩ pa̧'a̧nö̧tä̧ ma̧ä̧jä̧'a̧mä̧ i̧yinätö̧ ihueyecuätä jȩttö̧ ji̧na̧'a̧, isopäi'önä hueyecua'a hueähu huȩnȩ päö'anötä. ⁵ Jȩttä̧'i̧jö̧'a̧nö̧tä̧ mipponä ppädähuä iyähuä ki̧na̧'a̧, mo̧ro̧ jö̧'a̧cuä̧ ttiyä'ijö ja̧'hua̧nö̧ ja̧'a̧ kä̧hua̧ ja̧'a̧cuä̧ ja̧'hua̧ta̧'a̧nö̧ o'cajuiyönä pä'cäri mippoönä ppädäcuähuä ttiyä'ijö'inä tto̧ȩcuä̧nä̧ jȩpö̧ ku̧nä̧huä̧ ji̧na̧'a̧ TTÖ̧Ä̧NÄ̧HUA̧RÖ̧ a̧mö̧cuädö, jitötätä amöcuädö mippoönä ppädäcuähuä ttiyä'ijö̧nä̧tä̧ ji̧na̧'a̧. ⁶ Jahuätömä mipponä ku icu iyähuä kä̧mä̧di̧nä̧tö̧ iyinätö TTÖ̧Ä̧NÄ̧HUA̧RÖ̧ kä̧hua̧ ko̧ro̧mö̧ttö̧ ta̧ju̧ päi'omenä ä̧cuo̧mȩnä̧ mo̧ro̧ttö̧ tȩa̧pa̧nä̧ TTÖ̧Ä̧NÄ̧HUA̧ ö̧ä̧ro̧ca̧nä̧ jȩpö̧ ku̧nä̧huo̧ca̧nä̧. ⁷ Ja̧'hua̧nö̧ ja̧'a̧ pärotö iyinä̧tö̧ ido'quittö aditö aditä'ihuotörö ja̧'hua̧ta̧'a̧nö̧ a̧'cua̧tö̧ adicuä ttö̧ja̧rö̧'inä ttu̧cuȩ'i̧nä̧, ahuähuä'inä, aceite'inä, Sidón'inä, Tiro'inä ttö̧ja̧ ttiäre ji̧na̧'a̧, juhua'amä cedro dauhuiyä huettiyatö pä'ö jina'a. juotö aje rö̧o̧to , Libano Jope pähuomettö huetta pä'ö ji̧na̧'a̧ Ciro, hueäjita'anötö ji̧na̧'a̧ Persia Ru̧hua̧. ⁸ Yottömä todäre kä̧hua̧ päi'omettö̧ todäre du'o päi'omettö̧tä̧ Jerusalénttö ichinä̧tö̧ TTÖ̧Ä̧NÄ̧HUA̧ ojusodecu Zorobabel'inä Josadac i̧tti̧ Jesúa'inä korotö Diosttö'inä ttö̧ja̧ttö̧'i̧nä̧ ppä̧dä̧rä̧cuä̧huä̧ ttö̧ja̧'i̧nä̧ Levista'inä, ja̧'hua̧ta̧'a̧nö̧ jitö usurähuö kä̧nö̧ ichinä̧tö̧cu̧tä̧, Jerusaléra̧'a̧cu̧ ppa̧'a̧chi̧nä̧tö̧, aditö ka̧cuä̧mi̧nä̧tö̧ ja̧'hua̧ta̧'a̧nö̧ 20 a̧'ȩ jo̧mȩnä̧ Levistarö ttaditähuä iyinätö̧, ja̧'hua̧ta̧'a̧nö̧ tä̧mö̧rö̧mä̧ TTÖ̧Ä̧NÄ̧HUA̧ ojusode ttadita'anä to̧ttä̧ra̧ pä'ö. ⁹ Jesuá i̧tti̧mö̧rö̧ ku̧ni̧nö̧, ja̧'hua̧ta̧'a̧nö̧ ahuaruhuärö'inä Cadmiel'inä i̧tti̧mö̧rö̧'i̧nä̧ juhua'atäcu Juda ahuaruhuä o'catoi'önä Tö̧ä̧nä̧hua̧ Dios ojusode ttadita'a to̧ttä̧ra̧ pä'ö. Jahuätucumä ka̧cui̧nä̧tö̧ Henadad i̧tti̧mö̧'cotö'inä, ahuaruhuä'cotö pinätö'inä ja̧'hua̧ta̧'a̧nö̧ ttahuaruhuä Levista'inä. ¹⁰ Adicuä ttö̧ja̧ ku̧ni̧nä̧tö̧ ttö̧tä̧mö̧mi̧nä̧ jähuä TTÖ̧Ä̧NÄ̧HUA̧ ö̧jode jacuä. Diosttö'inä, ttö̧ja̧ttö̧'i̧nä̧ kä'co päte'ö ppä̧dä̧rä̧cuä̧huä̧ ttö̧ja̧mä̧ pi̧yȩ hue'inä̧tö̧ ä̧rä̧mi̧'a̧ pä'ö ttö̧'ca̧tä̧hui̧ya̧cu̧ ja̧'hua̧ta̧'a̧nö̧ ppoähuänacu̧ juhua'atäcu Levista'inä, Asaf i̧tti̧'i̧nä̧ TTÖ̧Ä̧NÄ̧HUA̧RÖ̧ ttucuo te'ähuinä̧tö̧, korojuei 'chu'ähuära'a, Ja̧'hua̧nö̧ David u̧mö̧ ji̧nö̧'a̧nö̧, ja̧'hua̧nö̧ hue'inö Israel ttu̧ru̧hua̧mä̧. ¹¹ Jahuätömä eseu kä̧nö̧, ra̧'i̧nä̧tö̧ ja̧'hua̧ta̧'a̧nö̧ TTÖ̧Ä̧NÄ̧HUA̧RÖ̧ adihua pä'ö, "¡Jä'omä adihuä i̧sa̧! Todecuinätö̧, Israel a̧'cua̧ ö̧huä̧nä̧ri̧nö̧nä̧mä̧ 'cuäopönä ki̧na̧'a̧."O'catoi'önä pä̧i̧cu̧nä̧ huopö kä̧nö̧, tö'ö kä̧nö̧ esehuinätö̧ TTÖ̧Ä̧NÄ̧HUA̧RÖ̧ ta̧'a̧cu̧ ttö̧tä̧mö̧ mi̧nä̧ jähuä ka̧'a̧ttö̧. ¹² Ja̧'hua̧nö̧ ja̧'a̧nä̧ Diosttö'inä ttö̧ja̧ttö̧'i̧nä̧ kä'co päte'ö ppä̧dä̧rä̧cuä̧huä̧ ttö̧ja̧'i̧nä̧ Levista'inä jinäso tturuhuotö oicuä ttö̧ja̧'i̧nä̧ ja̧'hua̧ta̧'a̧nö̧ bö̧o̧sa̧tö̧'i̧nä̧, ä̧cuo̧mȩnä̧ isode topinätö, pode isodenä ttö̧tä̧mö̧ mi̧nä̧ jähuä ttö̧jö̧ni̧no̧mȩtä̧ ku̧ni̧nä̧tö̧ ttiäre o'ca, jahuätömä pä̧i̧cu̧nä̧ rä̧mi̧pö̧nä̧ ajahuinätö̧, ja̧'hua̧nö̧ ja̧'a̧nä̧ korotö recuätömä eseu huopinätö rö̧ä̧nä̧ rä̧mi̧pö̧nä̧. ¹³ Tocu ttö̧ja̧mä̧ ttö̧'ȩpä̧rö̧ tottoca'attö. tö'ö huotta'a'inä ja̧'hua̧ta̧'a̧nö̧ ttesehua'a'inä ttö̧ja̧ ttajahua'inä rä̧mi̧pi̧na̧'a̧, isopäi'önä ttö̧ja̧mä̧ pä̧i̧cu̧nä̧ huopö kä̧nö̧ rö̧ä̧nä̧ ttesehua'a ja̧'hua̧nö̧ ja̧'a̧nä̧ oto ucuocunä rä̧mi̧pi̧na̧'a̧.