¹ Yaparemä jicuhuähuä kärätä yapare pä'äji pä'ömä. juhua'a jö ta'anö surojö yapare jiähuä'chöcui'inö ppäcuächiä'ä. ² Recuätöcumä cui'chä suronä jecu'a̧ pä'ömä, Ucuocuätä'inä cucuocuä, isopä'önä korotö Recuätö pättönä juhua'a jo̧tä̧'anö jȩpi̧. ja'hua'anö pä'anö cuieruhua'arä'amä jȩcu'ä. ³ ya̧tȩ usurä I̧sa̧rö̧ suronä pä'imä ppä̧cuä̧dä̧rä̧. ⁴ Ya̧tȩ cuäboi'yä̧ äji bö'ö pä'cäyä jö̧ttö'inä, äji burro jo̧ttö'inä i̧re'ttehuä̧'chä'a cu'ocui'ottömä, uruhuarätä ppä'ädirö. ⁵ ya̧yȩ ucuru kö'cocö äji burro ämä'ca'a epomenä juiyö ppä'ächi'ö mo'ämöttömä, jä'atemä to'cuärö̧. ppä'ädirö äji burrocutä. ⁶ Yorö'iso suröju cuoepä'ä̧nä pä'a̧nä pätömä tocuä'a, ja̧'hua̧nö ja̧'a̧ ju̧ta̧'a̧nö suronä jȩpä̧ji̧ro̧ huȩnȩ jui'a jö̧nä̧'i̧nä'a̧ pä'cuhuä, ja̧'hua̧'a̧nö ja̧'a̧nä suronä jȩpo̧'co̧ pä'ä jirömä ro̧ȩcuänä päcuhuä. ⁷ Ka̧ra̧cu̧ ppäcuächia'ä yapare ji'ähuäcuä pä'ömä, jȩpo̧'cö̧ pä'irömä cuä'ö cui'cuä, ttömä pädö juiyä̧cu̧äsa̧ suronä jȩpä̧'ä̧tö̧rö̧ , Ja̧'hua̧ta̧'a̧nö suronä jȩpo̧'cö̧tö̧ pätö jö̧nämä. ⁸ Ji̧yȩtȩ'i̧nä cuemä yapare jȩcö̧ tti̧mitömä, Ja̧'hua̧'a̧nö jȩä̧cuä̧huä̧mä adicuo'cä'a tö̧pä̧rä̧ttömä , ja̧'hua̧'a̧nö jȩä̧cuä̧huä̧mä surojuoecuätä ja̧'a̧ ka̧rä̧ adiunätä kö̧rö̧. ⁹ Kärä'attö ichäcuäcuötörömä cua̧'cua̧ ttä̧huȩcuä̧, tä'cö ucutumä huo̧juä̧to̧ja̧ kärättö ichäcuähuötö ttö̧ja̧mä, Ucutu'inä käräja Egipto ttö̧ja̧ tti̧rȩja̧ttö̧ ichäcuähuötö pinätö̧ja̧. ¹⁰ Cui̧rȩja̧nämä seis a̧jȩ jo̧menä cujunäcua̧ja̧ ö̧cuä̧ju̧mä Ja̧'hua̧'a̧ta̧nö cu'cä̧'ä̧täcua̧ja̧ ö̧huäjuo̧mä. ¹¹ ja̧hua̧'a̧nö ja̧'a̧nä korömo̧ttö̧ todäre a̧'jȩmä tä'cö cu'cuä cuähuämä . cuju̧ni̧yä̧cuä̧ja̧. korotö ttirȩja̧nä kähuätö̧ ötähuätö huoröttö tucuä pä'ö. ja'huätö tticuipömä de'a isottö äjicuäccuähuöttötä ttua̧huä̧cuȩmä. jua'a ta̧'a̧nö cuätucu uvas'inä a̧dȩ'i̧nä. ¹² Seisnö mo̧ro̧tä̧ cuä̧di̧tä̧cuä̧ja̧ cuäditähuämä, ja̧'hua̧nö ja̧'a̧dä̧ sietenö mo̧ro̧mä cuä'ächi'ö cui'ämädä̧cuä̧'ä̧, pi̧yȩmä cuäji bö'ö pä'cäyä'inä,cuäji burro'inä cuä'ächi'ö i̧'a̧ pä'ö, ja̧'hua̧ta̧'a̧nö cumuhuäyaju ki̧tti̧'i̧nä, kärättö ichacuähuottö'inä 'cuä'ächi'ö ttö̧ja̧ pä'ö. ¹³ Adiunä a̧ju̧cui̧ ucuru pädömä. Ja'huätö ja̧'a̧ttö̧ 'cöröttö tö̧ä̧nö̧ttö̧ro̧mä oä'chu'inä pätä'chä'anämä ja̧'a̧tä̧ töhuocumä, Ja̧hua̧ta'a̧nö ttucuöcuänä'inä ja̧'a̧tä̧ ttuhuö. ¹⁴ A̧'ȩttö̧mä huäbodäcuä jo̧menätä̧ jȩcuä̧ttö̧cuä̧jä̧ ttörö amucuädö. ¹⁵ pi̧yȩ pä'cärimä pan ppö̧'a̧mo̧'cö̧ jui̧yönä cuäcuähuä jäcuä'ä ttötä huedinö pi̧yȩmä cucuäja̧ pan ppo̧'ä̧mo̧ juiyönä cuähuäcuämä sietenö mo̧ro̧tä̧. ja̧'hua̧nö ja̧'a̧ttö̧ pä̧'a̧nö pä'ö. 'kunäcuä̧'ä̧ ttö 'chä'cä jo̧metö Abil ka̧hua̧ kä'cä'inä cui̧jȩcua̧ja̧. Ja̧'hua̧ta̧'anö ja̧'a̧ttö̧ ja̧u̧nö pä̧nä jä'inöso̧me ji̧na'a̧ Egipto rȩjȩttö̧ räcuopinä'a̧mä. Ja̧'hua̧nö ja̧'a̧ttö̧ ya̧tȩ'i̧nä jui'ömä ichujuyuanö ja̧'a̧ttö̧ 'chä̧'a̧cu̧mä. ¹⁶ Ja̧'hua̧ta̧'a̧nö ppättiyu cuähuä a̧cuo̧mȩnä'a̧ji̧ cui̧ättänä cu̧ju̧nömä 'quiyächomenämä pä'cäri jȩcuä̧cuä̧ja̧, Ja̧hua̧nö ju̧ta̧'a̧nö cucuȩ cuähuä röji a̧'ȩ beipome 'tö̧'cä̧ta̧'a̧ pä'ö pä'cari jȩ'ttä̧cuä̧ja̧, ja̧'hua̧ta̧'a̧nö cuähuä cu̧ju̧näji röji cujunäji̧ o̧'ca ka̧cui̧pä̧ji̧ do'opö cuihuomenä'inä. ¹⁷ Jahuanö ja̧'a̧ttö̧ O'catoi'önä u̧mätömä ya̧'ö̧cu̧pö̧nä ttichö'anö ja̧'a̧ttö̧ cu̧ru̧huä̧ chä'ca jo̧me a̧'ȩttö̧mä cuäbodäcuä jo̧menä. ¹⁸ I̧sa̧ro̧ uhuojacumä kuicumä cuiya pä'ömä jo̧'ca̧'a̧ ttörö mä pan ppö'a̧mä juaicu korö mo̧ro̧ pä̧i'önä cuiyuttö, Ja̧'hua̧ta̧'a̧nö i̧sä̧ ö̧'a̧dȩmä korö mo̧ro̧ päi'önä cu̧ju̧ni̧ä̧'a̧chä̧. ¹⁹ Cujunähuä̧'a̧ a̧huo̧mȩnä jähuätö cui'cacha pä'ö ja̧'a̧ chojuisodenärä̧. TÖ̧Ä̧NÄ̧HUA̧ Dios ojusoderä̧'a̧ oveja i̧tti̧ mu̧ä̧yä̧rö̧mä chutä ja̧ju̧ 'kätäte isoyanämä dacujuiya'anö ja̧'a̧nö ja̧'a̧. ²⁰ huȩdä̧cuä̧sä̧ chu̧mo̧cuäyä̧ Angelrö mänänä cui'chä̧'a̧nä̧ tä̧huä̧rä̧cuö̧ pä'ö, Ttötä ihueye 'que'epo̧ chu̧ju̧ninärä̧'a̧ cui̧rȩbȩhuä̧'a̧ pä'ö. ²¹ Churötä adiu'ö ä̧ju̧cu̧ uhuöti curahuäri'oca'a, Curähuäröttömä ja'ate toiyäcuäjä. ja̧u̧ru̧mä ttötä ja'huanö huedä'ättö. ²² Isopäi'önä ihuene ä̧ju̧cu̧, ttö huedötä'anö jecu̧ttu̧mä, ucu cuäboiyottömä ttö'inä chaboiyottö ttä'cuotö, ucuru suronä pä'ättörömä, ttö'inä surönä pä̧tä̧cuä̧sä̧ jahuätörö. ²³ chu̧mo̧cu̧äyä Angel cuä'canä i̧'chä̧'a̧cua̧, Amoreosrö i'cächä̧'a̧cuä̧, Hititas ttö̧ja̧rö̧'i̧nä, Ferezeosrö'inä, Cananitasrö'inä, Hetitasrö'inä ja̧hua̧ta̧'a̧nö Jebuseorö'inä. Siepuchicuä̧'a̧sä̧. ²⁴ Ä̧mönä tö̧ä̧nä̧huo̧tö̧rö̧mä cuihue'quiyunä pämädö̧mä ucuotömä jȩcuä̧tö̧cuä̧'a̧, jahuätö jȩttö̧ja̧nömä. Ja̧hua̧nö ja̧'a̧ttö̧ ja̧u̧ O'ca'amä kä'ö'icu kada'ca ' chuhuäromettö mo'ä chö ppo'äcua päi'önä jȩpo̧ 'chi̧cuä̧cuä̧sä̧. ²⁵ ttö churu̧huä̧'a̧ cuä̧nä̧huä̧ Dios rötä ucutu päi. ja̧'hua̧nö Jȩcu̧tö̧mä ttötä chiyä̧cuä̧ja̧ cu̧cuȩ pan'inä, cuäcuoya ajiya'inä. Cumäri'che'inä aditöchicuäcuäja̧. ²⁶ Isajumä yajute'inä möchaju päji'oca'amä ko̧ji̧'yä̧cuä̧ju̧ ja̧'hua̧'a̧ta̧'a̧nö yajute'inä kitti̧rö̧ kä'conä kuhuäbecuä'acu 'corupäi'yäcua juhuöjä rȩjȩttö̧mä. ttötä recuo ttö̧jö̧nä jȩchä̧'ä̧cuä̧sä̧. ²⁷ Ucu cui'chacuäjärä'a ka̧cuä̧tö̧ro̧mä, ttötä jechä̧'a̧cuä̧sä̧ jahuattö yettecuä'chönä. ttötö cuä'ö chienäcua̧sä̧ cui̧'cho̧'a̧cuä̧ kämätörö. ttötä jȩchä̧cua̧sä̧ ucu cuabo'iyottömä ye'ecueä'chö tötipä'ächönä . ²⁸ töttä huedä̧cuä̧sä̧ cuä'canä isotö pä̧ju̧ru̧, jua̧'anö kä̧cua̧ttö̧ ucu cuä'ca jo̧mȩttö̧ ttötipächa pä'ö jahuätömä pitö ja̧'a̧ Cananeos ttö̧jä̧'i̧nä, Heveos'inä ttö̧ja̧'i̧nä, hititas ttö̧ja̧'i̧nä ji̧nä'a̧. ²⁹ ya'ate a'ȩtö̧'inä chi̧cui̧pi̧yä̧cuä̧jä̧ juhuäjä rȩjȩ de'a juiyä̧ja̧ pä'inö. de'a Isotö päcuätö rottächa'anämä . ³⁰ Juhuätö jattömä, ttötä jȩ'chä̧'ä̧cua̧sä̧ cuä'ca jo̧mettömä a̧cuo̧pö̧nä rä'opächö cuähuä uhuä̧ju̧mä jua'a rȩjȩ suhuädi'önä ka̧'a̧ pä'ö. ³¹ ttötä jȩchä̧cuä̧sä̧ cui̧rȩja̧mä pä̧'a̧nö jö̧nä̧. dubora töhuorätö ka̧mädö̧ Filisteos ttö̧ja̧ tö'aje jubö de'a juiyä̧'a̧ttö ka̧mädö̧ Eufrates aje bu'ö ttötä jȩchä̧'ä̧cuä̧cua̧sä̧ juä̧'ä̧nä ka̧'a̧cuä̧törö̧ rokuäju cujuruhuä pä'ö. Ucu cujö̧metö̧mä jahuanöta̧. ya'opu cuicuäcuäja̧ jahuätörömä. ³² Jahuätöcumä ppäcuä'ächi'ä a̧mönä tö̧ä̧nä̧huö̧tö̧rö̧ uhuotö jȩcuä̧'a̧cu̧ ucu'inä. ³³ Cuirȩja̧ nä ttö̧jä̧'ä̧nä'inä ja̧'a̧tä̧ to'cua'attö, Ucu'inä jahuatö ju̧tä̧'a̧nö suronä jȩcuä̧'ä̧cu̧ a̧mönä tö̧ä̧nä̧huottörö Ucuotö. jau̧ juäi'mä yapare jahuätä ja̧'a̧.