¹ Ya̧tȩ ttö̧ja̧sa̧ päcäyäro'inä ovejarö'inä nä̧u̧cu̧ iyöicuttumä̧, Ja̧'hua̧nö jö̧ttö̧mä̧ ja̧u̧mä̧ i̧mi̧ta̧cua̧tó ji̧mu̧tȩnö̧ huotö päcäyärö ya̧tȩ imihuämä ja̧'hua̧ta̧nö ya̧tȩ oveja imicuämä pa̧ja̧cua̧nö huotörö i̧mi̧ta̧cua̧. ² Ya̧tȩ näu̧cuä̧rö̧rö̧ ttö̧o̧cui̧'o̧mȩnä̧ ka̧ra̧ i̧äre surojuoepurö, ja̧'hua̧ta̧'a̧nö 'corupäioca'a jöttö'inä 'corupättö'inä, jahuanö jo̧mȩnämä ji̧yȩtȩ'i̧nä̧ ro̧ȩcuä̧mä̧ jui̧a̧tä̧ ö̧jä̧cua̧. ³ Ja̧'hua̧nö jo̧mȩnä käcua̧ räopäcua'a ä'canä ja̧u̧ doächöttömä, ja̧u̧tä̧ ja̧'a̧ cu̧ä'ö i̧cuäjimä pättäcua̧. Näu̧cuä̧rä̧cuä̧huä̧ i̧sa̧mä suronä jȩpu̧ önäu̧cuä̧ji̧mä imitacuapäö ja̧'a̧. Ja̧u̧ ppa̧huä̧dä̧ji̧ juia'a jöttömä, churutä micuänä iyö icuähua̧ päi'äcua̧ önäu̧cuä̧ji̧ micuähuomȩta̧. ⁴ I̧sa̧ ö̧nä̧u̧cuä̧cu̧ru̧ a̧cua̧rö'rö u̧ju̧nä̧rö̧ttö̧mä, päcäyärö jö̧ttö̧'inä burrorö jö̧ttö̧'inä ovejarö jö̧ttö̧'inä ja̧u̧mä ta̧ju̧ru̧ jo̧mȩ imitäcuä'cua̧. ⁵ Ya̧tȩ ä̧ji̧mu̧ päcäyö̧rö̧ 'toecuoca'a u̧ju̧nä̧ra̧'a̧ u̧va̧ pättänä ka̧ra̧ iättättö cuätö, ttu̧ru̧cua̧mä suronä jȩttä̧ji̧mä̧ chutä uva iättättö adicuomȩttö̧ aditö ppa̧cua̧dö̧anö ja̧'a̧. ⁶ Ocurä cuähuä ochanä'inä o̧tȩnäa'inä jareönä pättä o̧tȩ jö̧ cu̧nä̧cuo̧mȩinä yoähuächö huoöttömä,ttö̧ja̧sa̧ ocurä rä̧dȩta̧ji̧mä̧ toeäaji micuämä iso päiönä imitähuäcua̧. ⁷ Ya̧tȩ u̧borö pärätä'inä umu jähuä'inä iyöttömö ojusode ppeyänä kö̧rö̧ hua'adö ötiyarö pä'ö ja̧'hua̧nö ja̧'a̧nä juodettö ttö̧nä̧u̧cuo̧mȩnä̧mä̧, nä̧u̧cuä̧rö̧'rö̧ ttö̧'o̧cui̧'o̧menämä, pidemä micuähuomettö̧'i̧nä̧ abonänö todäre jo̧mȩ päi'önä imitäcua̧'cua̧. ⁸ Näu̧cuä̧rö̧rö̧ ttö̧o̧cui̧o̧ca̧'a̧ jo̧mȩnämä, ja̧'hua̧nö jö̧ttö̧mä isode u̧ru̧cua̧tä̧ i̧'cha̧ päö ja̧'a̧ hueähuä ruhuotö ttä'ca jo̧mȩ jahuätötä tottarö päö ippeyänä kö̧ umu jähuä mea̧'ja̧päö. ⁹ Ji̧yȩtȩttö̧ huȩnȩ jö̧ ötö'cömä, päcäyä jö̧ttö̧'inä, mu̧rö̧ba̧ jö̧ttö̧'inä, pujä̧ti̧yu̧ jö̧ttö̧'inä, koro juäi toeäji jöttö̧o' inä ka̧ra̧ ya̧tȩtö̧ päöttömä: "Piyȩmä ttö chiäre ", hueähuä huȩnȩ aditätömä jahuätö pättö ttäju̧cua̧ päö jina'a̧. Juorötä jahuätörö ä̧ju̧cu̧ pidetä ja̧'a̧ päö tticua päö. Ja̧u̧ jahuätö ttö̧o̧cui̧ä̧cu̧mä micuähuomettö̧'inä abonänö todäre jo̧mȩ päi'önä imitäacua̧ ippeyänä kö̧rö̧mä. ¹⁰ Ya̧tȩ ippeyänä kö̧rö̧ iyöttömä asnorö'inä, päcayärö'inä, ovejarö'inä ka̧ra̧ i̧sa̧rö̧'i̧nä̧ tta̧huä̧ra̧ pä'ö hue'öttömä ja̧u̧ päjí 'corujuo'ächöttö'inä 'tahuipöttö'inä ko̧ro̧nö̧mä̧ tottöjuiyönä ttö̧nä̧u̧cu̧ttu̧mä̧, ¹¹ ta̧ju̧cuäyotö pättäcuotö TTÖ̧Ä̧NÄ̧HUA̧ ä'cajo̧mȩttö̧, ujutu ta̧ju̧huotömä tippayänä kö̧ ö'äremä me'o̧co̧tö̧ pjätöjä. Ja̧u̧ u̧ru̧hua̧mä̧ ja̧'hua̧nö̧tä̧ ja̧'a̧cua̧ pä̧cua̧ ja̧'hua̧nö̧ ja̧'a̧nä̧ ka̧ra̧'i̧nä̧ pä'äji jä̧ji̧ta̧'a̧nö̧ jȩa̧ pä'ömä juiyäcua'a. ¹² Ja̧'hua̧nö̧ ja̧'a̧nä̧ ttö̧nä̧u̧cuä̧ji̧tö̧mä̧, ka̧ra̧mä̧ pa'ajita'anä suronä päi'äji aditö icu iyö'anä ja̧'a̧ u̧ru̧hua̧rö̧. ¹³ Ja̧u̧ äjicuä̧cuä̧hua̧rö̧ de'a i̧sa̧ cuä'ö sesepö icuäjitömä, ja̧u̧ tta̧'a̧rö̧mä̧ i̧jȩpa̧ pä'ö ja̧'a̧ jua'a 'cuäopäjimä. Ja̧u̧mä̧ i̧mi̧töjui̧yä̧cua̧ ja̧u̧ de'a i̧sa̧ sesepö iucuäjimä. ¹⁴ Ya̧tȩ ttö̧ja̧sa̧ ippeyänä kö̧ ä̧ji̧mu̧ttö̧ pärou ȩmö̧ttö̧mä̧ ja̧u̧ ȩmä̧jä̧cu̧ 'tahuipönä ko̧ro̧nö̧mä̧ korupäi'öttömä̧ u̧ru̧hua̧ toächomettö̧, ja̧u̧ pärohuäjimä pä'äji jä̧ji̧ta̧'a̧nö̧ aditö u̧ju̧nä̧cua̧ suronä päi'äjimä. ¹⁵ Ja̧'hua̧nö̧ ja̧'a̧nä̧ u̧ru̧hua̧ jȩnȩtä̧ ö̧jö̧ttö̧mä̧, ja̧u̧ pärohuäjimä mitocö jä̧cua̧; Ä̧ji̧cuä̧cuä̧hua̧ päroutä i̧yä̧hua̧ jö̧ttö̧mä̧, i̧mi̧tä̧cua̧ pärou micuähuometä̧. ¹⁶ Ya̧tȩ isaju uborö jerupajuru oborädöttömä ja̧u̧mä̧ pätecuächö, ja̧'hua̧nö̧ ja̧'a̧nä̧ jahuäjucu ä'öttömä, ja̧u̧mä̧ isopäi'onätä̧ irecua päi'önö ȩmä̧cua̧ ö'cähuätö ttimita pä'ö pätetö ku̧nä̧huo̧mȩ jö̧ta̧'a̧nö̧. ¹⁷ Jahuäju kä'o ja̧u̧ru̧ iyä pä'ö juiyöttömä, ja̧u̧ ubomä pärätä i̧mi̧tä̧cua̧ uborö jerupajuru mitähuome jö̧ ta̧'a̧nö̧. ¹⁸ Chu̧mä̧ri'änä̧tä̧ kä̧ju̧mä̧ kö̧jö̧ juiyö'anö ja̧'a̧. ¹⁹ Ya̧tȩ i̧sa̧cu̧ ä'ömä cuä'ö tticuapä'ötä pätecuächö. ²⁰ Ya̧tȩ Ö̧Ä̧NÄ̧HUA̧ huocotörö ku'icu iyähuä iyöttömä iyöttömä ja̧u̧mä̧ si'epö i̧cuä̧huä̧tä̧ jä̧cua̧. ²¹ Ko̧ro̧jä̧ tö̧ja̧sa̧rö̧mä̧ amäcö aditö usuräunämä jȩcu̧'ä̧, ucu'inä Egiptorȩjȩ ra̧'a̧ttö̧mä̧ ko̧ro̧jä̧ ttö̧ja̧sa̧ ki̧nö̧jä̧. ²² Amäcö juäi aditö kusuräunämä jȩcu̧'ä̧ recuarö'i̧nä̧ ja̧hua̧ta̧'a̧nö̧ rȩyo̧rö̧'i̧nä̧. ²³ Amäcö juäi aditö kusuräunä jȩcu̧'ä̧u̧ TTÖ, TTÖ̧Ä̧NÄ̧HUA̧RÖ̧ pä̧i̧cu̧nä̧ jättepöttömä, isopäi'önä jahuätö huottömä chä̧ju̧cuä̧cua̧sä̧. ²⁴ Ttö chamisurächi'äcua'a ja̧'hua̧nö̧ päi'omenä ucuturu curä'chunä cuä'ö chi̧cuä̧cua̧sä̧; ttirecuamä recua juojäcuaju ja̧'hua̧ta̧'a̧nö̧ tti̧tti̧mu̧'i̧nä̧ rreyotö juottäcuotö. ²⁵ ya̧tȩ chu̧mu̧huäyotöttö usurä isarö pärätä ö'oräuttumä, pärocuähuä i̧sa̧ 'cua̧rö̧nä̧ yabucu imitönä jȩcu̧'ä̧. ²⁶ 'ca̧tä̧cuä̧hua̧tä̧ cu'oräuttumä, kä̧hua̧ räopäcua'a ä'canä ppa̧cuä̧di̧pa̧ pä'ö ja̧'a̧, ja̧huä̧ta̧mä̧ ji̧ta̧tȩtä̧ ja̧'a̧ttö̧ juäocua pä'ömä; ²⁷ Ja̧huä̧ta̧tä̧ ja̧'a̧ cuidepänä juäcuocunä ppä̧dä̧ta̧ ja̧'a̧ttö̧. ¿Ti̧tä̧ ko̧ro̧ta̧nä̧ juä'ocu cuä'a'a jä̧ttö̧? ja̧u̧ ttörö juo'öttäömä, ttömä chä̧ju̧cuä̧cua̧sä̧ jua'amä re toäcuähuä i̧sa̧ cha'attö. ²⁸ TTÖRÖMÄ surojönä pä'ä'chömä cucuocuätucuä, Diorömä, ötahuiyänä ruhuo hue'ätörö'inä. ²⁹ Ttiäre iyähuä cuiyätucuoca'a jö̧nä̧mä̧ jȩcu̧'ä̧tu̧cuä̧ iyätucui ppätta cuähuä u̧huä̧ju̧mä̧ uva isoyä pä̧i̧'ö̧nä̧ 'cuȩcuä̧huo̧mȩtö̧mä̧. TTÖRÖ iyi cui̧tti̧mu̧ttö̧ ä̧cuo̧mȩnä̧ i̧sa̧rö̧. ³⁰ Ja̧'hua̧ta̧'a̧nö̧tä̧ jȩcu̧'a̧ cuä̧ji̧mö̧ bueyetö̧ttö'inä jja̧'hua̧ta̧'a̧nö̧ ovejatö̧ttö̧'i̧nä̧. Ji̧mu̧tȩ ta'arenö mo̧ro̧ jo̧mȩ tö̧jä̧cuo̧tö̧ tta̧ju̧cu̧mä̧, ja̧'hua̧nö̧ ja̧'a̧nä̧ ji̧mu̧tȩ huäba'acuä mo̧ro̧ päi'omenä TTÖRÖ cuiyajá. ³¹ Ucutumä ttöttö 'quȩ'ȩcuo̧tö̧tä̧ huotöjä. Ja̧'hua̧nö̧ ja̧'a̧ttö̧ de'a i̧sa̧ yö̧yö̧pö̧ icuäcuru idepä'inä cucuätucuä. Ja̧'hua̧nö̧ jo̧ca̧'a̧ jö̧ttö̧mä̧, ä̧hui̧ri̧tö̧ ttucua pä'ötä iyätucui.