¹ Jitä ttö̧ja̧ tu̧mu̧ to̧mu̧rȩnö̧ ja̧'a̧nä̧ tti̧ä̧pu̧ttö̧ ji̧mu̧tȩnö̧ 'cuä'o'önä, koromuttö̧ huäbochecuänö a̧'ȩ pä'iomenä Josafat, Juda ru̧hua̧ hueinö pänä, Joramä, Acab i̧tti̧ ji̧na̧'a̧, ja̧u̧nu̧ pä̧nä̧ cä̧mä̧di̧nö̧do ruhuo huea pä'ö Israeel ttö̧ja̧rö̧ Samarianä ca̧cuä̧tö̧rö̧; ² ja̧u̧mä̧ ruhuonä hueinödo tu̧mu̧ tu̧mu̧ to̧mu̧rȩnö̧ ja̧'a̧nä̧ tti̧jä̧pu̧ttö̧ to'cherenö a̧'ȩ jo̧mȩnä̧. Ja̧u̧ ru̧hua̧mä̧ Tu̧ru̧hua̧ Tö̧ä̧nä̧hua̧ ä'ca jo̧mȩttö̧ suronä jȩpi̧nö̧do, ja̧hua̧'a̧nö̧ ja̧'a̧nä̧ Jä'o jua̧ jȩji̧nö̧'a̧nö̧mä̧cö̧; ja̧u̧mä̧ Jä'o jȩi̧nö̧ ro̧ö̧ Baalrö huä̧mȩ kuicu iyähuä ido'qui aditinö pporö icuinödo. ³ Ja̧hua̧nö̧ jo̧mȩnä̧ ja̧u̧mä̧ Roboa, suranä jeinö a̧'cua̧ huȩnä̧ri̧nö̧do, Nabal i̧tti̧mä̧, tide ji̧na̧'a̧ttö̧ Israel ttö̧ja̧ Tu̧ru̧hua̧ Tö̧ä̧nä̧hua̧rö̧ suronä jȩttö̧nä̧ jȩpi̧nö̧mä̧ ja̧u̧ta̧'a̧; ja̧u̧mä̧ jahuättömä ti'ipächocöpinödo. ⁴ Jitämä, mesanä Moab ra̧hua̧mä̧ oveja̧tö̧rö̧ puttädö yoecuä ru̧hua̧ ji̧na̧'a̧. Ja̧u̧tä̧ iyäcua'a ji̧na̧'a̧ Israel ru̧hua̧rö̧ 100.000 mil oveja̧tö̧rö̧ ja̧hua̧ta̧'a̧nö̧ tuhuo'che'inä, 100,00 milnö ovejatö̧ ppo̧'ä̧tö̧rö̧. ⁵ Ja̧hua̧nö̧ ja̧'a̧nö̧ ja̧u̧nö̧ o'comenä Acabmä huaö icuinödo, ja̧u̧ Moab ru̧hua̧mä̧ Israel ttö̧ja̧ Tu̧ru̧hua̧ a̧bo̧'cha̧ pä'inödo. ⁶ Ja̧hua̧nö̧ jo̧mȩnä̧ Joramä ru̧hua̧mä̧ Samaria jaropi'inödo ji̧yȩnö̧ pä̧nä̧ Israel ttö̧ja̧rö̧ curä rohuäu 'tti̧cha̧ pä'öupporädä pä'ömä. ⁷ Ja̧u̧mä̧ ya̧tȩrö̧ hueinödo Josafatrö jiähuaja pä'ö, Juda ru̧hua̧rö̧, pä'inödo: "Ja̧u̧ Moab ru̧hua̧mä̧ ya̧bo̧'cha̧ päiäji. ¿Ucumä ttöcu cuichäcuä'ai̧, Moabrö curä rohuäu ticuarö pä'ö?" Josafat adätinödo: a̧'a̧ ttö chi̧'chä̧cua̧sä̧. Ttömä ucu jö̧ta̧'a̧nö̧tä̧ hua̧sä̧, ttö chu̧mu̧huä̧yotömä ucu cumuhuäyotöta'anö huotö, chä̧ji̧mu̧ cuhuayutumä ucu cuä̧ji̧mu̧ ta'anötä̧ huotö". ⁸ Ja̧hua̧nö̧ jo̧mȩnä̧ pä'inödo ja̧u̧mä̧: "ti̧mä̧ mä̧nä̧mä̧ ttötipacua jä̧ttö̧ ujutumä?" Josafat ädätinödo ja̧u̧mru̧: "Edom mänämä 'chä̧nö̧ rȩjȩ dauhuiyä jui̧yä̧jä̧ mä̧nä̧mä̧". ⁹ Ja̧hua̧nö̧ ji̧yä̧u̧mä̧ Israel ruhuotömä, Juda'inä, Ja̧hua̧ta̧'a̧nö̧ Edomttö̧ 'chi̧nä̧tö̧do i'quicha̧jä̧mä̧nä̧ so̧bu̧cuä̧nö̧ jȩpu̧ tu̧mu̧ ji̧mu̧tȩnö̧ ja̧'a̧nä̧ ko̧ro̧mu̧tö̧ tocherenö mo̧ro̧ jomenä. Pocuipocotö pinätö̧do ajiya curä ruhuä ttahua pä'ö'inä, ca̧hua̧yu̧tu̧ ttahua pä'ö'inä, korotö dea ruhuä ttahua pä'ö'inä. ¹⁰ Ja̧hua̧nö̧ ji̧yä̧cu̧ Israel Tu̧ru̧hua̧mä̧ pä'inödo: "¿Däje jä̧'ä̧ttö̧ pi̧yȩmä̧? ¿Huopäjätö jä̧di̧ Tu̧ru̧hua̧ Tö̧ä̧nä̧hua̧rö̧ huä̧mȩtu̧cuä̧ ruhuotörö Moab u̧mu̧nä̧ ma̧tö̧nä̧ päiönä? ¹¹ Ja̧hua̧nö̧ ja̧'a̧nä̧ Josafamä pä'inödo: ¿Pȩnȩmä̧ toadi̧ Tu̧ru̧hua̧ i̧huȩnȩ jiacuähuä ttö̧ja̧sa̧mä̧, ja̧u̧ru̧ jä'epu tä̧ju̧cua̧nö̧ ja̧'a̧ tta̧'a̧nö̧ pä'a jä̧ pä'ö Tu̧ru̧hua̧ Tö̧ä̧nä̧hua̧mä̧ ja̧u̧nä̧ kä̧nö̧? Ya̧tȩ Israel ttö̧ja̧ Tu̧ru̧hua̧ u̧mu̧huä̧ya̧ pä'inödo: Josafat i̧tti̧tä̧ "Eliseotä pȩnȩtä̧ kö̧mä̧, ja̧u̧tä̧ ji̧na̧ Elias u̧mu̧nä̧ ajiya cä'epu toinömä". ¹² Josaf pä'inödo: "Tu̧ru̧hua̧ Tö̧ä̧nä̧hua̧ i̧huȩnȩ ja̧u̧nä̧tä̧ ka̧'a̧". Ja̧hua̧nö̧ jo̧mȩnä̧ Israel ru̧hua̧'i̧nä̧, Josafat'inä ja̧hua̧ta̧'a̧nö̧ Edom ru̧hua̧ päji'inä mejähuinätö̧do ja̧u̧ ö̧jo̧mȩ. ¹³ Eliseo pä'inödo Israel ru̧hua̧rö̧ "¿ Däje tochacu päcua'ajä̧ttö̧ ucumä? Täi cuä'o, cua̧ju̧ 'quiänä̧hua̧ jiacuähuä huȩnȩ ttö̧ja̧sa̧rö̧". "Ja̧hua̧nö̧ päcu Israel ttö̧ja̧ ttu̧ru̧hua̧ pä'inö ja̧u̧ru̧: "Isocö̧, dä̧bu̧ pä'ö Tu̧ru̧hua̧ Tö̧ä̧nä̧hua̧ huopäji pitö huämetucuä ruhuotörö jäbecuänö jö̧nä̧ Moab u̧mu̧nä̧". ¹⁴ Eliseo ädätinö: "Iso pä'ömä curä ruhuotö Tö̧pnä̧hua̧ Tö̧ä̧nä̧hua̧mä̧ ku̧, chi̧jä̧pu̧nä̧ chö̧jä̧cua̧ ä'canä, isopä'inä jȩä̧cuä̧huä̧ jö̧ttö̧mä̧ Josafat a'ca jo̧mȩ ucuotö kä̧mä̧dö̧ jä̧pä̧ji̧sä̧, Juda ru̧hua̧rö̧'i̧nä̧ ttömä täcö to̧chä̧ri̧yä̧cua̧sä̧ ji̧yȩtȩ'i̧nä̧ jicuä'opumä, topu'inä tochiya'anö hua̧sä̧. ¹⁵ Ja̧hua̧nö̧ ja̧'a̧mä̧ i'cächiyittö ra̧huä̧huä̧ ttö̧ja̧sa̧rö̧. "Ja̧hua̧ta̧'a̧nö̧ 'cuäopina̧'a̧do arpa 'po̧rä̧rä̧cuä̧huä̧'i̧sa̧ u'poromenä, Tu̧ru̧hua̧ Tö̧ä̧nä̧hua̧ u̧mu̧nä̧ ichi'ina Eliseorö: ¹⁶ Ja̧u̧ päinödo: "Tu̧ru̧hua̧ Tö̧ä̧nä̧hua̧mä̧ pä'ö pi̧yȩ: "Rö̧ä̧nä̧ ähuiyä sa'ätucui pi̧yä̧ mȩji̧yä̧ ajiya juä̧ja̧nä̧ auhuiyä päiacua'anö". ¹⁷ Tu̧ru̧hua̧ Tö̧ä̧nä̧hua̧mä̧ pi̧yȩ pä'öto: "ucutumä to'cuiyäcuotöjä ajiya isoppa'inä, ja̧hua̧ta̧'a̧nö̧ yoriso tocuiyäcuotöjä ajiya icha'inä ja̧hua̧nö̧ ja̧'a̧nä̧ pȩnȩ muä'quiyu kada'ca mejinä aje tö̧ä̧nä̧ suädiäcua'a pä̧cä̧yö̧'i̧nä̧ ja̧hua̧ta̧'a̧nö̧ dearuhuä'inä o'catoinä ttacuacuotö. ¹⁸ Pi̧yȩmä̧ Tu̧ru̧hua̧ Tö̧ä̧nä̧hua̧a'cattömä jeruhuococu. Ja̧u̧mä̧ Moabrö cujuruhuätucunä jȩä̧cua̧. ¹⁹ Ucutumä ötahuiyä curohuähuätucua pä'ö ttoepu cuicuäcuotöjä kiyäbi tto̧ȩcuä̧ro̧mȩ'i̧nä̧ ja̧hua̧ta̧'nö̧ ya̧'a̧tȩ ötahuiyä pu̧nä̧, o'ca juiyönä dauhuiyä adiumä cuiö cuicuäcuotöjä; ajehuiyä ou du̧mä̧rö̧ cuicuäcuotöjä ja̧hua̧ta̧'a̧nö̧ rȩjȩ cuähuä cu̧nä̧huä̧jä̧mä̧ ppo̧ö̧ i̧nä̧huiyä surojuo cuȩpä̧cuo̧tö̧jä̧ rȩjȩmä̧". ²⁰ Ja̧hua̧nö̧ jo̧mȩnä̧ yo̧i̧mo̧ro̧ pä'ö mo̧ro̧ päiamä, Tu̧ru̧hua̧rö̧ tta̧cua̧ huȩnä̧rö̧ ku icu iyähuä pä̧nä̧mä̧, ichina'ado ajiyamä Edomcuttö̧, ajiyamä suädi'ina'ado. ²¹ Jitämä o'catoinä Moabita, ttö̧ja̧mä̧ a̧ju̧cui̧nä̧tö̧do o'catoinä ruhuotö rohuäu ichätö pä'ö jahuätörö; jahuätömä ca̧ca̧cui̧pi̧nä̧tö̧do ji̧nä̧yo̧mȩtȩ, o'catoinä curä röhupu 'ca̧tä̧cuä̧huä̧, ja̧hua̧ta̧'a̧nö̧ ko̧ro̧ jä̧cu̧ bo̧ȩcuä̧ro̧mȩ ttoepinätö̧do. ²² Jahuätömä yo̧ä̧sa̧ ja̧'a̧nä̧ pä'ö mo̧ro̧ päia'a porächinätö̧do ja̧hua̧ta̧'a̧nö̧ kä̧hua̧mä̧ kä̧dȩpi̧na̧'a̧do ajiyanä. ji̧yȩnö̧mä̧ moabitamä jitötä ttö̧jo̧mȩ pä̧tȩcuä̧nö̧ topinätö̧do ajiya, tottomenä rö̧ä̧nä̧ tuchuoja jä̧i̧nö̧'a̧nö̧ rö̧ä̧nä̧ cuocua'a. ²³ Jahuatömä huopinätödo: "¡Poyamä ttucuojatä ja̧'a̧!" isopäi'önä ruhuotömä cuä'äu jȩpu̧ ti̧cuä̧jä̧u̧ ja̧'a̧, ja̧hua̧ta̧'a̧nö̧ jitötä ka̧ra̧ ka̧ra̧cu̧ cuäu icuähuä jä̧tö̧ ja̧'a̧! ¿Ja̧hua̧nö̧ ja̧'a̧ jitämä, Moab'ra'a, tö̧nä̧u̧cua̧ ti̧'chä̧tu̧cua̧! ²⁴ Ji̧yȩnö̧mä̧ jahuätömä ichinätö̧ Israel ttö̧ja̧cua̧jä̧ rȩjȩnä̧, Israelitamä ttieruhua'a̧ra̧'a̧ ja̧hua̧ta̧'a̧nö̧ ttoepu rohuäu icuinätö̧do Moab ttö̧ja̧rö̧, ja̧hua̧ta̧'a̧nö̧ ttä'cattömä ttö̧ji̧pa̧ pä'ö ti'ipächinätö̧do. Jahuätö curä ruhuä Israel ttö̧ja̧mä̧ ȩmi̧pi̧nä̧tö̧ Moab ttö̧ja̧rö̧mä̧ rȩjȩnä̧tä̧, cuä'äu icuinätö̧ jahuätörö. ²⁵ Israel ttö̧ja̧mä̧ ötahuiyä siepö icuinätö̧, ja̧hua̧ta̧nö̧ rȩjȩ adiu ttorämemä, ya̧cu̧nä̧ u̧mä̧tö̧mä̧ i̧nä̧du icuähuinätö̧do cuähuä ppuruhua pä'ö cu̧nä̧huo̧mȩmä̧ surojuoä'chönä. Jahuätötä ajiya duboriyu'inä joepu icuinätö̧ ja̧hua̧'a̧ta̧nö̧ dauhuiyä cu̧'u̧ icuinätö̧. Yo̧mȩtȩtä̧ tuina'ado Kir Haresetä inädutä rötipinätödo juȩnȩmä̧. Ja̧hua̧nö̧ ja̧'a̧nä̧ curä rohuäcuähuä ttö̧ja̧tä̧ 'torupanä 'po'äuicu jȩpu̧ icuinätö̧. ²⁶ Ji̧yȩnö̧ ru̧hua̧ Mesamä Moabrö topinö täcö curämä ttihueyecuä ja'a päinö, ja̧u̧ ȩmi̧nö̧ 700nö huotörö curä icuiätörö mänä 'cuiätö päiönä Edom ru̧hua̧ ö̧jo̧mȩ jubu päiönä, ja̧hua̧nö̧ ja̧'a̧nä̧ jahuätömä hueyecuinätödo. ²⁷ Ja̧hua̧nö̧ huecuäji'ca̧mä̧ i̧tti̧ ä'canä i̧sa̧rö̧ ȩmi̧nö̧, ja̧u̧tä̧ ji̧na̧'a̧ ja̧u̧ o'comenä huea'anö huinömä, ja̧hua̧ta̧'a̧nö̧ ku icu iyähuä iya'a päinödo curä rohuähuätörö to̧ȩpä̧rä̧bi huä̧mȩttö̧. Ja̧hua̧nö̧ jo̧mȩnä̧ Israel ttö̧ja̧rö̧ rö̧ä̧nä̧ ro̧huä̧ri̧nä̧tö̧do ji̧na̧'a̧do ja̧hua̧ta̧'a̧nö̧ Israel curä ttö̧ja̧mä̧ ru̧hua̧ Mesarö jaropinätö̧do. Jaropiäjo'cottö ppa̧'a̧chi̧nä̧tö̧do ta̧mu̧mä̧ tti̧rȩjä̧ra̧'a̧.