¹ Pa̧'a̧nö̧ ji̧na̧'a̧ tu̧ru̧hua̧ Dios Elíasrö isoppa kärähuoppanä mo̧ro̧jä̧ra̧'a̧ cäepäcua'a ä'canä, Elíasmä 'chi̧nö̧ Eliseocu Gilgalttö rä'opö. ² Elías pä'inö Eliseorö: "Pi̧nȩtä̧ ki̧'i̧pi̧, ttömä chu̧ru̧hua̧ hueäjäcusä Betelra̧'a̧ chi̧'cha̧ pä'ö." Ja̧hua̧nö̧ päcu Eliseo ädätinö: "Iso päi'önä chu̧ru̧hua̧mä̧ kö̧, ucu cu̧jö̧ ta̧'a̧nö̧, ja̧hua̧nö̧ ja̧'a̧nä̧ ucurumä icuipocösä." Ja̧hua̧nö̧ ja̧'a̧ttö̧ ta̧ju̧cuäyotö 'chi̧nätö̧ Betelra̧'a̧. ³ Dios päji huȩnȩ jiäcuähuä ttö̧ja̧ tti̧tti̧mö̧ ju̧huȩnȩ Betelnä ka̧cuä̧tö̧mä̧ Eliseo ö̧jo̧mȩ 'chä̧nö̧ pa̧'a̧nö̧ pä'inä̧tö̧: "¿Ucumä huo̧jua̧jä̧ tä̧ji̧ jitä pi̧yȩ mo̧ro̧ tu̧ru̧hua̧ Dios ucu cu̧ru̧hua̧rö̧ ȩmi̧pä̧cua̧'a̧mä̧? Ja̧hua̧nö̧ pättäcu Eliseo ädätinö: "A̧'a̧, huo̧jua̧sä̧, ja̧hua̧nö̧ ja̧'a̧nä̧ cucuocuätucuä ja̧u̧ juäimä." ⁴ Elías pä'inö Eliseorö: "Eliseo, pi̧nȩtä̧ ki̧'i̧pi̧, ttömä chu̧ru̧hua̧ hueäjäcusä Jericó'ra̧'a̧ chi̧'cha̧ pä'ö." Ja̧hua̧nö̧ päcu Eliseo ädätinö: "Iso päi'önä chu̧ru̧hua̧mä̧ kö̧, ucu cujö̧ ta̧'a̧nö̧, ja̧hua̧nö̧ ja̧'a̧nä̧ ucurumä icuipocösä." Ja̧hua̧nö̧ ja̧'a̧ttö̧ jahuätö 'chi̧nä̧tö̧ Jericó'ra̧'a̧. ⁵ Ja̧hua̧nö̧ ja̧'a̧ Dios päji huȩnȩ jiäcuähuä ttö̧ja̧ tti̧tti̧mö̧ ju̧huä̧nȩ Jericónä̧ ka̧cuä̧tö̧mä̧ Eliseo ö̧jo̧mȩ ichö pä'inätö: "¿Ucumä huo̧jua̧jä̧ tä̧ji̧ jitä pi̧yȩ mo̧ro̧ tu̧ru̧hua̧ Dios ucu cu̧ru̧hua̧rö̧ ȩmi̧pä̧cua̧'a̧mä̧?" Eliseo ädätinö: "A̧'a̧, huo̧jua̧sä̧, ja̧hua̧nö̧ ja̧'a̧nä̧ ja̧u̧ juäimä cucuocuätucuättö päinä̧u̧." ⁶ Ja̧hua̧nö̧ jä̧ji̧ o'ca'a Elías pä'inö̧ Eliseorö: Pi̧nȩtä̧ ki̧'i̧pi̧, ttömä chu̧ru̧hua̧ hueäjäcusä Jordán'ra̧'a̧ chi̧'cha̧ pä'ö." Ja̧hua̧nö̧ päcu Eliseo adätinö: "Iso päi'önä chu̧ru̧hua̧mä̧ kö̧, ucu cu̧ju̧ta̧'a̧nö̧, ja̧hua̧nö̧ ja̧'a̧nä̧ ucurumä icuipocösä." Ja̧hua̧nö̧ ja̧'a̧ttö̧ ta̧ju̧cuäyotö 'chi̧nä̧tö̧. ⁷ Ja̧hua̧nö̧ jä̧ji̧ o'ca'a cincuentanö̧ huotö Dios päji huȩnȩ jiäcuähuä ttö̧ja̧ tti̧tti̧mö̧'i̧nä̧ 'chä̧nö̧ jahuätö ttä'ca jo̧mȩ otonänö ka̧cuä̧mi̧pi̧nä̧tö̧; jahuätö ta̧ju̧ huotö Jordán aje jäyoto ttö̧ja̧cuä̧ma̧'a̧nä̧. ⁸ Elías ö̧'ca̧tä̧huä̧ta̧ huä̧mȩ i̧sä̧ta̧ ȩmo̧po̧'ö̧ to̧rä̧dä̧ji̧'ca̧ ajenä cuä'inö. Ja̧hua̧nö̧ cuäomenä ajemä kä'cotonä 'toi'ina̧'a̧ kara'anä'i̧nä̧, kara'anä'i̧nä̧ jö̧nä̧, ja̧hua̧nö̧ ja̧'a̧ jahuätö ta̧ju̧cuäyotö rȩjȩ aje jo̧ä̧jä̧nä̧ 'cuä'opinätö. ⁹ Ja̧hua̧nö̧ 'cuättopäji o'ca'a, Elías pä'inö Eliseorö: "Jä'epittö däje jȩchä̧cua̧'a̧ ja̧ pä'ö ucuttu 'quä̧dȩcuä̧chä̧cua̧'a̧ ä'canä." Ja̧hua̧nö̧ päcu Eliseo ädätinö: "Ucuotönö jädepäcujä cua̧'cua̧ru̧hua̧ ucunä kä̧'i̧ji̧mä̧ ttönä ö̧jä̧mä̧dö̧nä̧ cuiyattö pä'ö." ¹⁰ Elías ädätinö: "Juiyo 'quiyome päte'ö jäcuepäcusä. Ja̧hua̧nö̧ ja̧'a̧nä̧ iso päi'önä ttömä ucucu chö̧jä̧'i̧jo̧mȩttö̧ 'cä̧di̧pä̧cho̧mȩnä̧, jäcuepäjimä 'cuäopäcua'a, ja̧hua̧nö̧ ja̧'a̧nä̧ jo̧ca̧'a̧ jö̧ttö̧mä̧ ji̧yä̧cua̧'a̧." ¹¹ Ja̧hua̧nö̧ ucuocuäyotö tti̧'cha̧'a̧nä̧ carucä ocurä cuoäcä cahuayu̧tu̧ dottäcä i̧jȩcuä̧chi̧na̧'a̧, ja̧hua̧nö̧ päi'omȩnä̧ ta̧ju̧cuäyotö ttö̧ja̧cuä̧'i̧jo̧mȩttö̧ 'cä̧'ȩcuä̧chi̧nä̧tö̧ ya̧cu̧ pö̧nä̧, ja̧hua̧nö̧ ja̧'a̧ Elíasmä isoppa kärähuoppanä mo̧ro̧jä̧ra̧'a̧ cä'ecuächinö. ¹² Ja̧hua̧nö̧ ja̧'a̧ topö Eliseo pä̧icu̧nä̧ huopö pä'inö: "¡Cha̧mo̧nä̧ chä'o, cha̧mo̧nä̧ chä'o, Israel ttö̧ja̧ ttöcaruquiyä'i̧nä̧, ttö̧ja̧'i̧nä̧ ttä̧ji̧mö̧ ca̧hua̧yu̧tu̧'i̧nä̧!" jö̧nä̧. Ja̧u̧mä̧ juhua'a yabo topocö pinö Elíasrömä. Ja̧hua̧nö̧ ja̧'a̧ chutä ö̧'ca̧tä̧huä̧ta̧ ko̧'ä̧dä̧cuä̧u̧ icu seropö icuinö to̧ta̧rȩnä̧ päi'önä. ¹³ Ja̧hua̧nö̧ jȩpä̧ji̧'ca̧ Elías ö̧'ca̧tä̧huä̧ta̧ huä̧mȩ i̧sä̧ta̧ mo̧ä̧cho̧mȩttö̧ ȩmi̧pö̧, o'ca'acu ppa̧'ä̧chö̧ Jordán aje jäyoto 'chä̧hui̧'ö̧ kä̧mä̧di̧nö̧. ¹⁴ Elías ö̧'ca̧tä̧huä̧ta̧ huä̧mȩ i̧sä̧ta̧ mo̧ä̧cho̧mȩttö̧ ȩmä̧ta̧ jä̧ta̧nä̧ ajenä cuä'ö kä̧nö̧ pä'inö: "¿To ö̧jä̧ chu̧ru̧hua̧, Elías ö̧ä̧nä̧hua̧ Dios'mä?. Ja̧hua̧nö̧ pä'ö kä̧nö̧ ajenä cuäomenä, ajemä kä'conä 'to'i'ö bahuecuächina̧'a̧, ja̧hua̧nö̧ ja̧'a̧ Eliseo 'cuä'opinö ya̧nä̧jijä̧ra̧'a̧. ¹⁵ Dios päji huȩnȩ jiäcuähuä ttö̧ja̧ tti̧tti̧mö̧ Jericónä ka̧cuä̧tö̧mä̧ aje ya̧nä̧ji̧jä̧nä̧ kä̧nö̧ ja̧hua̧nö̧ jȩa̧'a̧ topö̧, pä'inä̧tö̧: "¡Iso päi'önä Elías a̧'cua̧ru̧hua̧ pä'ijimä Eliseonä kö̧ jitämä!" Ja̧hua̧nö̧ ja̧'a̧ tö'cönä̧nö̧ 'chä̧hui̧'ö̧ tti'ä rȩjȩ becuächönä jȩpö̧ ucuotö jȩpi̧nä̧tö̧ ja̧u̧ru̧. ¹⁶ Jahuätö pä'inä̧tö̧ ja̧u̧ru̧: "Topi, ucu cu̧mö̧huäyotö juruhuätö ka̧cuä̧tö̧ pi̧nȩmä̧ cincuentanö̧ huotö. Jätepäcujä, ja̧'a̧tä̧ tocu'atö pä'ö ucu cu̧ru̧hua̧ Elíasrö usu ti̧'cha̧'a̧nä̧, Dios a̧'cua̧ru̧hua̧mä̧ Elíasrö ȩmi̧pö̧ möä'cara̧'a̧ jö̧ttö̧'i̧nä̧ meje'cara̧'a̧ jö̧ttö̧'i̧nä̧ icuipäji a̧'cua̧ra̧'a̧. Ja̧hua̧nö̧ pättäcu Eliseo ädätinö: "Isocö, tti̧'cha̧ pä'ö huecuhuätucuätö." ¹⁷ Ja̧hua̧nö̧ ja̧'a̧nä̧ jahuätömä juhua'a yabocutä jä̧ttȩpä̧rä̧cu̧, Eliseo pä̧i̧nä̧u̧: "Ja̧hua̧nö̧ jö̧ttö̧mä̧ hue'ätucuitö tti̧'cha̧." Ja̧hua̧nö̧ pä̧u̧ jahuätö hue'inä̧tö̧ cincuentanö huotö u̧mä̧tö̧rö̧ Elíasrö usu tti̧'cha̧ pä'ö, huäbodäcuä mo̧ro̧ ttusa'anä po̧cui̧po̧co̧tö̧ pinätö. ¹⁸ Jahuätö ppa̧'ä̧chi̧nä̧tö̧ Eliseo ö̧ja̧'a̧ Jericó ötahuiyära̧'a̧, ja̧hua̧nö̧ ja̧'a̧ jahuätörö pä'inö: ¿Uturumä ji'ähuocö päjisä tä̧ji̧: cui'chä̧tu̧cuä̧ pä'ömä?". ¹⁹ Ötahuiyä ttö̧ja̧mä̧ Eliseorö ji'ähuinä̧tö̧: "Topi, jitämä pi̧yȩ jitähuäcujä iso päi'önä ötahuiyämä adiu aditö ku̧nä̧hua̧'a̧ ka̧'a̧ tocu'omȩnä̧mä̧, ja̧hua̧nö̧ ja̧'a̧nä̧ ajiyamä suraja'a, rȩjȩ'i̧nä̧ cuähuä ppuruhuoca'a. Ja̧hua̧nö̧ pättäcu ²⁰ Eliseo ädätinö: Ja̧hua̧nö̧ jö̧ttö̧mä̧ 'cächätucui i̧so̧'ta̧ ja̧rȩo̧'ta̧, 'cäruhuäbö'i̧nä̧ ju̧huo̧'ta̧nä̧ ȩca̧'a̧nä̧," ja̧hua̧nö̧ ja̧'a̧ chutä päji ta̧'a̧nö̧ 'cächö ttiyinäcu̧. ²¹ Eliseo ajiya adihuoya ȩmi̧pö̧ u̧mi̧ rä'opächö 'cäruhuäbö ȩni̧nö̧ juhuoyanä, ja̧hua̧nö̧ ja̧'a̧ pä'inö: "Chu̧ru̧hua̧mä̧ pa̧'a̧nö̧ pä'ö: 'Ttötä poya ajiya aditö icusä. Jitä poröttö kä̧mä̧dö̧ juhua'a̧ yabocumä hua'are'inä̧ juiyäcua'a̧, rȩjȩttö̧mä̧ pä'äji jä̧'i̧ji̧'a̧nö̧ cuähuä u̧huä̧ju̧ huä̧jö̧ juiyä'iji'anömä ji̧yä̧cua̧'a̧." ²² Ja̧u̧nu̧ pä̧nä̧ Eliseo ucuocuinomȩttö̧ kä̧mä̧dö̧ jitä pi̧yȩ mo̧ro̧ jobu ajiyamä aditö icuähuoyatä päi'inoya. ²³ Ja̧u̧nu̧ o'ca'a juhuoröttö rä'opächö Eliseomä 'chi̧nö̧ Betel'ra̧'a̧. Mä̧nä̧nä̧ i̧'chomȩnä̧ korotö ju̧huä̧nȩ ötahuiyä möäyotö rä'opö suronä pä'ö ya̧'ä̧huä̧'chi̧nä̧tö̧ ja̧u̧ru̧; jahuätö pä'inätö: "¡Topätucui, böo'i̧sa̧ uhuo'che jui̧'a̧rö̧,-topätucui böo'i̧sa̧ uhuo'che jui̧'a̧rö̧,! jö̧nä̧. ²⁴ Ja̧hua̧nö̧ pättä'chäcu o'ca'acu kärächi'ö ni̧'ä̧chi̧pö̧ topinö: Ja̧hua̧nö̧ topö kä̧nö̧ suronä pähuä pä'inö u̧ru̧hua̧ Dios i̧mi̧nä̧. Ja̧hua̧nö̧ ja̧'a̧ osotö̧ nä̧tö̧ ta̧ju̧ de'attö rä'oi'ö jahuätö möäyotö 42 nö̧ huotörö yö̧yö̧pö̧ icuinätö. ²⁵ Ja̧hua̧nö̧ jä̧ji̧ o'ca'a, juhuoröttö rä'opö Eliseo 'chi̧nö̧ Carmelo möä'cara̧'a̧, juhuoröttö täcö ppa̧'ä̧chi̧nö̧ Samaria rȩjȩra̧'a̧.