¹ Ocazias a̧ju̧ Ataliamä ki̧tti̧ 'corupäia'a topinäju̧do ja̧ju̧mä̧ yotäcu ä̧rä̧mi̧ö̧ ru̧hua̧ juȩi̧pa̧ i̧tti̧mu̧rö̧ cuä'u icuinäjö̧. ² Ja̧hua̧nö̧ ja̧'a̧ Josabamä Joram ittiju ji̧na̧'a̧, Ocazia ö̧ja̧huaju, Ocazias i̧tti̧ Joasrö ȩmo̧po̧'ö̧ icuinäcu ruhuotö jueipätö cuä'ö tticuomȩtä̧ päi'a'a ä̧'ä̧huo̧ca̧ jacuä dajö icuinö däjö icuinö, ja̧hua̧nö̧ ja̧'a̧ttö̧ cuä'ö icuocotö pi̧nä̧tö̧. ³ Joasmä Josabacutä Dios ojusode jacuä dajähuächinätö̧ 'cotö ki̧nä̧tö̧ ji̧mö̧tȩttö̧ yautenö a̧'ȩ jo̧mȩnä̧ juäjattö ruhuaju Atalia huejö pänä ji̧na̧'a̧. ⁴ Ji̧mö̧tȩ koromotönö todärenö päiomenä Joiadamä hueinö jittähuaja pä'ö, cienö jo̧mȩnä̧ tturuhuotörö'inä, hueähuä ttö̧ja̧rö̧'i̧nä̧, to̧ä̧rä̧cuä̧huä̧ ttö̧ja̧rö̧'i̧nä̧ o'catoinärö doädinö Dios ojusode jacuä, jatucu pa'anötä̧ ja̧cua̧'a̧ pä'ö ku̧ni̧nö̧, Dios ojusode jacuättö isonö ucuocuähuänätä̧ pä'ähuinätö̧. Ja̧u̧nö̧ o'comenä ru̧hua̧ i̧tti̧rö̧ i̧jȩpi̧nä̧u̧. ⁵ Ja̧u̧mä̧ hueönö pä'inä̧u̧, "pi̧yȩ ja̧'a̧t'ó jȩcuä̧tu̧cuä̧cuä̧mä̧. ucutu huäbodäcuänä 'que'ecuotöttömä sabado mo̧ro̧ petecuächatömä ru̧hua̧ hueode tta̧cuä̧rä̧cuo̧tö̧jä̧. ⁶ Korotö huäbodäcuänä 'que'ocuo̧tö̧mä̧ apate dȩa̧'a̧cy kä̧tȩmä̧ cu̧jä̧tu̧cua̧. Korotö huäbodäcuänä 'quȩ'ȩcuo̧tö̧mä̧ tta̧huä̧rä̧cuä̧huä̧ ttö̧ja̧ ttojusode abodenä to̧cuä̧rä̧cuo̧tö̧jä̧. ⁷ Korotö todäre jo̧mȩ 'cä̧'ȩcuo̧tö̧mä̧ sabado mo̧ro̧ aditocotömä, ru̧hua̧cu̧tä̧ Dios ojusode tta̧tta̧rä̧cuo̧tö̧. ⁸ Korotömä ru̧hua̧ ippeyenä sobucuächönä cu̧jä̧tu̧cua̧, cu̧mu̧tu̧cu̧nä̧mä̧ cu'upä o'cä chu̧huä̧rä̧nö̧, ka̧ra̧rö̧'i̧nä̧ isahuänä doächörömä, cuä'ö cuicuätucuaja, ru̧hua̧ doächomenä'inä, rä'epomenä'inä ja̧u̧cu̧tä̧ cujä̧tu̧cua̧ja̧. ⁹ Ja̧hua̧nö̧ ja̧'a̧ cienö pö̧nä̧ hueähuä ttö̧ja̧ päjätömä Dios i̧huȩ jiäcuähuä'i̧sa̧ hueäjita'anö jȩpi̧nä̧tö̧. Tttömuhuäyotö pönärö̧ ȩmi̧nä̧tö̧, adicuocö mo̧ro̧ ttaditacuotörö'inä, adicuäcä mo̧ro̧ ttaditiyäcuptörö'inä, o'catoinä Joida ä'ca jo̧mȩ 'chä̧hui̧'i̧nä̧tö̧. ¹⁰ Ja̧u̧nö̧ o'comenä, Dios i̧huȩn jiäcuähuä i̧sa̧ Joidamä, cienö pö̧nä̧rö̧ hueähuä ttö̧ja̧ päjätörö, dacuodiyä'inä curä obi'inä, David mi̧nä̧ iäre ji̧nö̧ Dios ojusodenä dajö icuinö iyächinö. ¹¹ Tta̧hua̧rä̧cuä̧huä̧ ttö̧ja̧ päjätömä, ttu̧mu̧nä̧ curä rohuäcuahuä 'chuä̧rä̧nö̧mru̧hua̧ ojusode sobucuächönä, ku icu iyähuome tö'cöhuächönä isähuänä ka̧cuä̧mi̧nä̧tö̧, ttuhuo̧ ja̧'a̧cu̧'i̧nä̧, ttö'ohue ja̧'a̧cu̧'i̧nä̧. ¹² Ja̧u̧nö̧ o'comenä Joidamä; ru̧hua̧ Joas i̧tti̧rö̧ o'ö chi̧nö̧, ja̧u̧ru̧mä̧ coronä isobö'inä iyinäcu. Ja̧u̧nu̧ o'comenä unä a̧dȩja̧ uhuäninäcu, ru̧hua̧ ö̧ja̧ pä'ö, o'catoinä ttu̧mu̧ 'pȩ'ö̧ esehuinätö̧ pa̧'a̧nö̧ pä'ö kä̧nö̧ ¡iacuarä kä̧hui̧ ru̧hua̧! ¹³ Ataliamä ttahuäräcuähuä̧ ttö̧ja̧'i̧nä̧ ötahuiyä ttö̧ja̧'i̧nä̧ pä̧i̧cu̧nä̧ huotta'a ä̧ju̧cu̧, Dios ojusodera'acu 'chä̧hui̧'i̧nä̧ju̧. Toja pä'ö. ¹⁴ Ja̧rȩpa̧ ru̧hua̧rö̧ ttö̧hua̧na̧'a̧ tojomenä 'chiecuäca jäyä ö̧ja̧'a̧ topinäju̧, ihueye jȩttä̧i̧jä̧nö̧tä̧, tta̧huä̧rä̧cuä̧huä̧ tturuhuotö'inä, trompeta ppö'ähuä ttö̧ja̧'i̧nä̧ ru̧hua̧ ippeyenä ka̧cui̧nä̧tö̧. O'catoinä ttö̧ja̧ juäjänä kä̧tö̧mä̧ ri̧ä̧nä̧ esehuinätö̧, trompetiyu'inä ppö'inätö̧ ja̧u̧nö̧ o'comenp Ataliamä kö̧'ca̧ta̧hua̧tä̧ sȩro̧cu̧ icu huopö kä̧nö̧ pä'inäju. ¡Suronä jȩcuä̧tu̧cuä̧cu̧sä̧ suronä jȩcuä̧tu̧cuä̧cu̧sä̧! ¹⁵ Ja̧u̧nu̧ o'comenä Dios i̧huȩnȩ jiäcuähuä i̧sa̧ Joidamä Dios ojusode jacuättö cuä'ö ttticuiyarö pä'ömä ku'cocö pinö, tta̧hua̧rä̧cuä̧huä̧ ttö̧ja̧ tturuhuotörö juene ka̧cuä̧tö̧rö̧ hueinö cumuhuäyotö tohuärenä kä̧nö̧ tta̧'a̧rä̧tö̧ru̧mä̧ rä'opö icuätucui juoröttö ya̧tȩ ruäreö ö̧jö̧ttö̧mä̧ curodänä cuä'ö cuicuätucuäröja. ¹⁶ Ja̧hua̧nnö̧ ja̧'a̧ chuädo poö ru̧hua̧ ojusodecu cahuäyotönä rättepäijätecuttö cuä'ö tticuinäcuä̧. ¹⁷ Ja̧u̧nu̧ o'comenä, Joidamä iso jö̧nä̧ pä'ö ku̧na̧hua̧nä̧ Dios ä'ca jo̧mȩttö̧ pinö, ru̧hua̧'i̧nä̧, ttö̧ja̧'i̧nä̧ Dios umuhuäyotö ja̧ pä'ö, ja̧hua̧ta̧nö̧, ru̧hua̧ ä'cattö'inä ttö̧ja̧ ttäcattö'inä iso jö̧nä̧ ucuocuähuänä pä'inö. ¹⁸ Ja̧hua̧nö̧ ja̧'a̧ttö̧, o'catoinä ttö̧ja̧mä̧ dios baal ojusodera'a 'chänö jȩpö̧ icuinätö̧ ja̧hua̧ta̧'nö̧ dios baalrö ku icu iyähuä o'ca'inä, a̧'cua̧jui̧yä̧ tätö, ku̧nä̧huä̧ o'ca'inä cuäcuäpö jȩpö̧ icuinätö̧, Matánrö dios baal pä'ö huȩnȩ jiäcuähuä i̧sa̧rö̧'i̧nä̧ cuä'ö icuinätö̧ ku icu iyähuä ä'ca jo̧mȩttö̧, ja̧u̧nö̧ o'comenä Joidamä. ¹⁹ Joidamä ötahuiyä ttö̧ja̧rö̧'i̧nä̧ cienö pö̧nä̧rö̧ hueähuä ttö̧ja̧rö̧'i̧nä̧, tta̧huä̧rä̧cuä̧huä̧ ttö̧ja̧rö̧'i̧nä̧, jahuätö o'catoinä ru̧hua̧rö̧ o'ipö 'chi̧nä̧tö̧ Dios ojusodettö, tta̧huä̧rä̧cuä̧huä̧ ttö̧ja̧ ttojusode ä'canätä cuä'oiö ru̧hua̧ ojusodera'a 'chi̧nä̧tö̧. Jua'attö Joamä ruhuottö ttö̧i̧nä̧'ca̧nä̧ pä̧mä̧di̧nö̧. ²⁰ O'catoinä ötahuiyä ttö̧ja̧mä̧ esehuinätö̧, ötahuiyämä a̧'cua̧ttä̧ jö̧nä̧tä̧ ji̧na̧'a̧. Ataliarö ru̧hua̧ ojusodera'attö curodänä cuä'ö tticuaja'attö. ²¹ Joa hueö ö̧jä̧mä̧di̧nö̧ pä̧nä̧mä̧ ttö̧jä̧pö̧ttö̧nö̧ todärenö a̧'ȩtä̧ ku̧nä̧ri̧nö̧