¹ Mpoona bami boonse abakali kuhvwa kwitala lya mulonga Jordan kunyika iya tulundu, alimwi aku nyika yamisena kutobelezhya inkomwe ya lwizhyi lwa Great Sea kutozhya ku Lebanon - ba Hittite, ba Amorite, ba Canaanite, ba Perizzite, ba Hivite, alimwi aba Jebusite - ² aba boonse bakabungana ulwabo beni antoomwe mu muzeezo omwi, uwaku buhya inkondo kulwana Joshua a Israel. ³ Ilyo bantu baku Gibeon nobakanhvwa icakacita Joshua kubana Jericho alimwi aku Ai, ⁴ bakacita a muyeeyo wa lweeno. Bakaunka mbuli kuti mbatumwa buyo. Bakabweza masaka makulukulu a kwaabika a mbongolo zhyabo. Alimwi bakabweza inkomo zhyakaindi zhyibikila waini izhyikulukulu, zhyamazaapila, alimwi izha kugambaika. ⁵ Bakasama mpato zhakaindi alimwi izhyakulungilila kumatende aabo, alimwi akusama zhyisani zhyakaindi, izhyikulumpele. Izhyakulya zhyoonse muzhyibikilo zhyabo zhyakali zhyiyumu a kulyaanga cikoto koto. ⁶ Mpoona bakaunka kuli Joshua munkambe ku Gilgal akwaamba kuti kuli nguwe alimwi akubalombwana ba Israel, ''Swebo twahvwa mumuhyinzo mulanhwu kweenda kuhvwa kucihyi cakule, ono nkokuti kobamba cihvwuminano andiswe.'' ⁷ Balombwana ba Israel bakaamba kuti kuba Hivite, ''Ambweni mwebo muhvwa kuhwaahwi andiswe. Mbobuti mbotunga tulabamba cihvwuminano andimwe?'' ⁸ Balo bakaamba kuti kuli Joshua, ''Swebo tuli babelehyi bako.'' Joshua wakabaambila balo, ''Ino ndimwe bani kaiyi? Nko kuli nkomwakahvwa?'' ⁹ Balo bakaamba kuti kuli nguwe, ''Swebo tobabelehyi bako twaboola okuno kuhvwa kunyika iya kulekule, nkaambo kaimpuwo ya Mwami Leza Leza wenu. Twakateelela impuwo ya twaambo tukwatikizhya nguwe alimwi akukwatikizhya zhyintu zhyoonse nzhyakacita mu Egypt - ¹⁰ alimwi azhyintu zhyoonse walo nzhyakacita ku bami bobile ababa Amorite kulubahvwu lumwi lwa mulonga Jordan - kuli Sihon mwami wa Heshbon, alimwi akuli Og mwami wa Bashan wakali ku Ashtaroth. ¹¹ Bantu bakando besu alimwi a kuti, 'Kamubweza bulilu mbomukonzhya kunyamuna ubwakulya mu lweendo. Kamuya mukaswaangane ambobo a kwaamba kuti kuli mbabo, ''Swebo tuli babelehyi benu. Amubambe cipangano andiswe.'' ¹² Ici nce cinkwa cesu, icakacili ku kasaala bantu boonse bamucihyi cesu bakatwaambila notwakacibweza kuhvwa mumaanda eesu bulya buzuba notwakakanka lweendo lwakuza kuli ndimwe. Pesi ono, langa, cinkwa cakayuma alimwi calyaanga zhyikoto. ¹³ Utu tukomo utwa waini twakali tupya notwakabika waini, alimwi langa, ono tula sweka. Zhyisani zhyesu aimpato zhyesu zhyakulumpala nkaambo ka lweendo lulanhwu topu.''' ¹⁴ Aboobo ba Israelite bakabweza zhyimwi nzhyobakakwete abo bantu, pesi banyina nobaka buzhya cakucita ku Mwami Leza kuti abape malailile. ¹⁵ Joshua wakabamba luumuno ambabo alimwi aku bamba cihvwuminano ambabo, kuti babaleke bapone. Abalo basololi babantu bakacita cikonke kuli mbabo. ¹⁶ Nakwakainda mazuba otatwe ba Israel kumana kubamba cihvwuminano ici ambabo, bakaza kubazhyiba kuti balya bantu bakali bahyi munzhyinyina alimwi akuti bakali kuhvwa munhyimunhyi. ¹⁷ Mpoona bantu ba Israel bakaunka mu lweendo akuhyika ku minzhyi yabo mubuzuba bwatatu. Minzhyi yabo yakali ngo Gibeon, Kephirah, Beeroth, alimwi a Kiriath Jearim. ¹⁸ Bantu ba Israel banyina nobaka balwana nkaambo ka kuti basololi babo bakabambile cikonke ambabo kumbele ilya Mwami Leza, Leza wa Israel. Buleya boonse bwakali kutongooka kukwatikizhya bamasololi babo. ¹⁹ Pesi balo bamasololi boonse bakaambila bantu boonse, ''Twakabamba cikonke kukwatikizhya mbabo ku Mwami Leza, Leza wa Israel, aboobo ono inga tatubalwani. ²⁰ Mbobuya mbotuti cite kuli mbabo: Kuleya bukali ubunga bulatuhyikila swebo akaambo ka cikonke ncotwakacita kuli mbabo, tulabaleka buyo bapone.'' ²¹ Bamasololi bakaambila bantu babo kuti,''Kamubaleka buyo kabapona.'' Aboobo, bana Gibeoni bakaba bahyi kucaba inkuni alimwi akuteka meenzhyi kubana Israeli boonse, umbona bamasololi mbobakaamba kukwatikizhya mbabo. ²² Joshua katuma kuti baitwe aku baambila kuti, ''Ninzhyi ncomwa katucenga swebo nomwakaamba kuti, 'Tuhvwa kulekule andimwe', kakuli muhvwa buyo kokuno akati kesu? ²³ Ono a kaambo kaceeci, mwebo mwatukwa alimwi bamwi benu bali kuli bazhyike lyoonse, bazhyike baku caba inkuni alimwi akuteka meenzhyi aaku ng'anda ya Leza wangu.'' ²⁴ Baka muhvwiila Joshua a kwaamba kuti, ''Nkaambo swebo toba belehyi bako twa kaambilwa kuti Mwami Leza Leza wenu wakalailila mubelehyi wakwe Moses kuti akamupe inyika yoonse mwebo, alimwi a kubayaya bantu boonse abahvwa munyika iyi njobwene - aboobo swebo twakakanduka kuyoowa ku maumi eesu nkaambo ka ndimwe. Aka nka kaambo ncotwakacitila cintu ici. ²⁵ Ono, bona, ulitukwete mu nsana zhyako. Kuhwumbwa ncotibone kukubotela a kululama kutucita swebo, kocita buyo.'' ²⁶ Aboobo Joshua wakabacitila ceeci: Wakaba hvwuna kuhvwa ku kweendelezhyewa aabantu ba Israel, icakuti bantu ba Israel banyina noba kabayaya pe. ²⁷ Ubo buzuba Joshua wakacita bana Gibeoni kuba bahyikucaba inkuni alimwi akuteka meenzhyi kutekela buleya, alimwi acipaililo ca Mwami Leza, akuhikila sunu, ku busena ubo Mwami Leza mbwasala.