¹ Pele bantu ba Israel bakabihya ku makani aazhyintu nzhyo bakasaala zhyitondwa. Achan mwana musankwa uwaa Karmi walo kali mwana wa Zabdi mwana musankwa uuzhyalwa kuli Zerah, walo Zerah waku muhyobo waka Judah, wakabweza zhyintu zhyimwi zhyitonda zhyakabilwe ambali kuti zhyakunyonyoona, alimwi bukali bwa Mwami Leza bwakabatenta amulilo bantu ba Israel. ² Cakali kuti Joshua wakatuma bantu kuhvwa ku Jericho kuya ku Ai, cihyi cakali munhyimunhyi aku Beth Aven, kwiwe lya Bethel. Wakabaambila kuti, ''Kamuya alimwi akweena kulangalanga nyika iyo.'' Mpoona balombwana bakaunka oko akweena kulangalanga kahyi ka Ai. ³ Nobakapiluka kuli Joshua, bakamwaambila kuti, ''Utabatumi bantu boonse kuya kulwana Ai. Kotuma buyo bamalombwana bankondo abali zhyuulu zhobile buyo naa zhyuulu zhyotatwe kwamana kuti baunke kuyakulwana Ai. Utakatazhyi bantu boonse kuya kupengana mu nkondo, nkaambo bantu baku Ai mweelwe mbahyoonto. ⁴ Nkaambo kaako kwakasalwa buyo bamalombwana abali zhyuulu zhyotatwe kuya kunkondo, pesi aaba bantu bakaakutiya kulwana munkondo kubalombwana baku Ai. ⁵ Bamalombwana baku Ai bakayaya balombwana bahyika ku makumi otatwe acisambomwe nabakali kubakangaanya kuhvwa kumanjililo amunzhyi kuhyikila kumigonti iihyiwa mabwe, alimwi akubayaya bamwi mbuli mbobakali kutiya kuselemuka mulundu. Myoyo yabantu yakanyebuluka alimwi akuba mbuli meenzhyi. ⁶ Mpoona Joshua wakakwamuna zhyisani zhyakwe mumause. Walo a bakando ba Israel bakali waala mahvwu amitwe yabo alimwi akuhvwundama mumause a bukali anhyi kumbele lya bbokesi ilya Mwami Leza, bakahyite kooko mane kuhikila mangolezhya. ⁷ Mpoona Joshua wakapaila waamba, ''Akaka, Mwami Leza Mwami, nkaambo nzhyi ncobaletela kwitala lya mulonga Jordan bantu aaba kayi? Hena nkuti utwaabe mumatanhyi abana Amori kuti batuyaye swe? Anu notwakaba buyo akuyeeya kwaandeene alimwi katukkala buyo kwitala lyakokuya a Jordan! ⁸ Mwami, ng'ambe nzhyi, kakuli ono bana Israel balukanka munsoni cakubapa iyinuma bahinkondoma? ⁹ kaiyi bana Canaani alimwi abantu boonse ba munyika ino balakaateelela aya. Balatuhyinguluka swebo a kutucita kuti bantu bamunyika yoonse bakalilube izhyina lwesu ilikwete mpuwo imbotu ndyookatupa webo. Ono ulacitanzhyi kusumpula izhyina lyako likwete bulemu?'' ¹⁰ Mwami Leza wakaamba kuti kuli Joshua, ''Nyamuka ima! Nkaambo nzhyi ncohvwuntama abuhyu bwako ulilele anhyi? ¹¹ Bana ba Israel babihya. Basotoka cihvwuminano cilya ncindakabalailila. Babba zhyintu zhyimwi zhyitonda zhyakabikilwe amabali. Babba alimwi akuhyisa cinyonyoono cabo kwiinda mukubika zhyisaalo zhyabo basanganya azhyintu izhyabo. ¹² Nkikaako, bantu ba Israel tabakonzhyi kwiima kubuhyu bwaba hinkondonyina. Bakatiya kulwana nkondo abahinkondonyina matako mpalubilo akaambo kakuti ulwabo balo babikwa amabali kuti banyonyoonwe. Mebo nhyikabi limbi andimwe cita muzhyinyonyoone izhyo zhyintu zhyitonda zhyakeelele kunyonyoona, pesi mwebo mucizhyikwete akati kenu nkozhyili. ¹³ Nyamuka ima! Kobasalazhya bantu kuli ndime alimwi akubaambila kuti, 'Amulisalazhye lwenu nobeni kulibambila bwa cihwumo. Nkaambo Mwami Leza, Leza wa Israel waamba kuti, ''Kuli zhyintu zhybikilwe amabali zhyitonda zhyakunyonyoona izhyiciliko akati kenu, webo o Israel. Tamucikonzhya kwiima abahinkondonyoko cita mane kuhyiikila muzhyikwihye akati kenu zhyintu zhyoonse zhyitondwa zhyiciliko zhyakabikwa amabali kuti nzhyakunyonyoona.'' ¹⁴ Bwaakuca mahwumohumo, mweelele kulibonya akuliiminina kumbele ilyangu abamwi mumuhyobo wabo. Muhyobo uyo mebo ndi Mwami Leza ngwitikasale acisolo ulakaswena ahwaahwi mumikowa yabo. Mukowa uyo mebo ndi Mwami Leza ngwitikasale acisolo ulakaswena ahwaahwi mukwahyi amukwahyi. Uyo mukwahyi mebo ndi Mwami Leza ngwitikasale acisolo ulakaswena ahwaahwi muntu omwi omwi. ¹⁵ Cilakacitika kuti uyo muntu utikasalwe mucisolo alimwi nguukwete zhyintu izhyo izhyitondwa zhyakabikilwe ambali kuti nzhyakunyonyoona, uyo ulakatentwa, walo ulwakwe alimwi azhyintu zhoonse nzhyakwete, nkaambo watyola cihvwuminano cangu ndi Mwami Leza alimwi wacita cinyonyoono icisampuzhya mu Israel.''' ¹⁶ Ono, Joshua wakahwuma kubuka mahwumohumo akubaleta bana Israel munhyimunhyi, muhyobo a muhyobo, alimwi muhyobo wa Judah wakasalwa ansolo. ¹⁷ Joshua wakaileta mikowa iyaa Judah munhyimunhyi, alimwi mukowa uwaba Zerahite wakasalwa ansolo. Wakaleta munhyimunhyi mukowa woonse waba Zerahite muntu a muntu, akuyanika kuti Zebdi wakasalwa ansolo. ¹⁸ Limwina wakaleta mukwahyi uwaka Zabdi munhyimunhyi, muntu omwi omwi, mpoona Achan mwana musankwa waka Karmi, Karmi mwanamusankwa waa Zabdi, Zabdi mwana musankwa uzhyalwa mumukowa waba Zerahite kuli Zerah, kuhvwa kumuhyobo waka Judah, wakasalwa ansolo. ¹⁹ Mpoona Joshua wakaamba kuti kuli Achan, ''Mwanaangu, lemeka Mwami Leza, Leza waba Israel, akupa kulumbaizhya kuli nguwe. Ndalomba ndaambile ncocita. utandihisi pe.'' ²⁰ Achan wakamuhvwwila Joshua, ''Mahyimpe, mebo ndamubihyila Mwami Leza, Leza wa Israel. Nceeci ncindakacita: ²¹ Nondakabona akati azhyintu zhyotwakasaala cibaki cimwi cibotu caku Babylon, mali myaanda yobile yama shekeli ansiliva, a cikoto cangolide iilema makumi osanwe aama shekeli, ndakazhyiyanda aku zhyibweza. zhyilihyisilwe mumahvwu mukati lya cihvwuka cangu, alimwi amali kunhyi lyancico. ²² Joshua wakatuma batumwa, balo abakalukanka kuya mwihvwuka alimwi momwakali zhyintu. Nobakakapula, bakazhyiyana zhyilihyisilwe mwihvwuka lyakwe, alimwi ainsiliva kunhyi. ²³ Bakazhyibweza zhyintu kuhvwa akatikati ikacihvwuka a kuzhyileta kuli Joshua akubantu boonse ba Israel. Bakahyikuna anhyi kumbele lya Mwami Leza. ²⁴ Mpoona Joshua, a bantu boonse ba Israel mbocakali limwi, bakatola Achan mwana wa Zerah, ainsiliva, acibaki, acikoto ca ngolide, bana bakwe basankwa a bahimbi, ing'ombe zhyakwe, imbongolo zhyakwe, imbelele, acihvwuka cakwe alimwi azhyoonse nzhyakakwete, alimwi bakabatola mane kwibanda lya Achor. ²⁵ Mpoona Joshua wakati, ''Nkaambo nzhyi ncotupenzhyela? Mwami Leza ayebo ulakupenzhya bwasunu.'' Bana Israel boonse bakamuhwusa mabwe walo. Mpoona bakahwusa mabwe kuliboonse akubatenta amulilo. ²⁶ Atala lyakwe bakalundika mulwi mukando wamabwe uuciliko akuhyikila sunu. Mwami Leza wakakwihya bukali bwakwe ubutenta. Aboobo izhyina lyabusena ubo bwiitwa kuti cibanda ca Achor kuhyiikila sunu.