¹ Moses wakeenda kutanta kuhvwa ku Moab kuya kumulundu wa Nebo, atala ilya mulundu Pisgah, walo uuli kulubahvwu lumwi lwa Jericho. Kulya Mwami Leza waka mutondezhya nyika yoonse ya Gilead yoonse mane kuhyiikila ku Dan, ² alimwi ainyika yoonse ya Naphtali, alimwi ainyika ya Ephraim a Manasseh, alimwi ainyika yoonse yaka Judah, kutola kulwizhyi lwa kumbo, ³ alimwi aku Negev, alimwi a misena yakwibanda ilya ku Jericho, aku Munzhyi wa Malala, mane kuya kuhyikila ku Zoar. ⁴ Mwami Leza wakati kuli nguwe, ''Iyi njenyika njindaka konkezhya kuli Abraham, akuli Isaac, alimwi akuli Jacob, kwaamba kuti, 'Mebo ndi Mwami Leza ndakaipa kulunyungu ulwenu.' Ndakuhvwumizhya webo kuti wiibone buyo a meso aako, pesi tokahyiki kulanduka kulya..'' ⁵ Aboobo Moses mubelehyi wa Mwami Leza, wakahwa nkukona okulya kunyika iya Moab, umbona izwi lya Mwami leza mbo lyaka hyomezhya. ⁶ Mwami Leza wakamuzhyika mulya mwibanda ku nyika ya Moab kulubahvwu lumwi ulwa Beth Peor, pesi kunyina uuzhyi cuumbwe cakwe mpocibele kuhyiikila sunu. ⁷ Moses kali a myaka mwaanda omwi amakumi obile yakuzhyalwa naakahwa; liso lyakwe linyina nolyakaleka kubonehya, antela mubili wakwe kumana insana. ⁸ Bantu ba Israel bakalila kulila Moses mulya mumisena iya Moab ukwa mazuba aali makumi otatwe, mpoona mazuba aalilwe ilyaa Moses akamana. ⁹ Joshua mwana uwaa Nun kazwile muuya wa busongo, akaambo kakuti Moses wakamubikile matanhyi aakwe ali nguwe. Bantu ba Israel bakali kumuteelela alimwi akucita izhyo Mwami Leza zhyakalailila Moses. ¹⁰ Takuna bele uumbi muhyinhyimi wiima mu Israel kuhvwa waawo uuli mbuli Moses, walo Mwami Leza ngwaakazhyiba buhyu abuhyu kubandika. ¹¹ Kunyina nokwakabele alimwi muhyinhyimi uumbi uuli mbuli nguwe mu zhyitondezhyo zhyoonse alimwi amu zhyigambyo zhyilya Mwami Leza nzhyaka mutuma kucita mu nyika iya Egypt, kuli Pharaoh, alimwi a kubabelehyi bakwe, a kunyika yakwe yoonse. ¹² Kunyina nokwakabele muhyinhyimi uuli mbuli nguwe mu nsana zhyoonse, milimo iiyoohya njaakacita Moses mumeso aaba Israel boonse.