¹ Moses wakaunka a kwaambila ba Israel boonse mazwi aaya. ² Wakati kuli mbabo, ''Ono ndaba a myaka iili mwaanda a makumi obile iya kuzhyalwa; mebo hyicicikonzhyi kuunka alimwi akupiluka; Mwami Leza wang'ambila kuti mebo, ''Webo totilanduke uyu mulonga Jordan. ³ Mwami Leza Leza wenu, ulaka musololela mwebo, ula nyonyoona mahyi oonse aya kuhvwa kumbele lwenu, alimwi mulakabanyanga bwami balo. Joshua, ulakamusololela mubweendelezhyi, umbona Mwami Leza mbwaakanana. ⁴ Mwami Leza ulakacita kuli mbabo mbuli mbwaakacita kubana Sihon alimwi a Og, bami ba Amorite, alimwi aku nyika iyabo, yalo njaaka nyonyoona. ⁵ Mwami Leza ulakabaaba kuli ndimwe, alimwi mwebo mulakabacita balo umbona mbwindaka mulailila. ⁶ Amuyume alimwi akuba aacamba cibotu, mutakanduki peepe, alimwi mutabi nomubayoowa balo, nkaambo Mwami Leza Leza wenu, walo ulwakwe ngonguwe ngomuya limwi; kunyina naya kumulekelezhya mwebo nokuba kumuhyiya pe.'' ⁷ Moses wakaita Joshua a kumwaambila walo kumeso aaba Israel boonse kuti, ''Webo koyuma alimwi akuba aacamba cibotu, akaambo kakuti webo ulaunka abantu aaba munyika iyo Mwami Leza njaaka konkezhya bahinhyiku babo kuti ulakabapa; webo ulakabacita kuti bayikone. ⁸ Mwami Leza, walo ulwakwe ngonguwe uuli kumusololela; ulakaba andiwe; kunyina naya kukulekelezhya webo nokuba kukuhyiya peepe; utabi mukandu, utabi notyompwa.'' ⁹ Moses wakalemba mulawo uyu a kuupa kubapaizhyi, balo abali mbana abaka Levi, abakali kunyamuna ibbokesi ilya cihvwuminano ica Mwami Leza; alimwi wakapa bulembo ubu mbubona bwa mulawo aku bakando ba Israel. ¹⁰ Moses wakabalailila balo akwaamba kuti, ''Kuhwumbwa nokwainda myaka iili ciloba ono kumamanino, a ciindi icibikilwe kuti nca kulekelelana zhyikwelete, lilya nokuli Ipobwe lya Mahvwuka, ¹¹ lilya bana Israel boonse nobaboola kulibonya kumbele ilya Mwami Leza Leza wenu mubusena ubo mbwayakusala ubwakubika chikombelo, mukaubale mulawo uyu kumbele ilya ba Israel boonse kabateelele mumatwi aabo. ¹² Kamubabunjika bantu, bamalombwana, bamakaintu, alimwi abaceya, alimwi a mweenzu uyo uuli mulukwakwa ulwa minzhyi yenu, kutewa balo bakateelele a kwiiya, alimwi akuti inga balalemekezhya Mwami Leza Leza wenu alimwi a kubamba mazwi oonse aali mu mulawo uyu. ¹³ Kamucita ubo kutewa abana babo, balo abatanakuzhyiba, bakonzhye kunhvwa alimwi a kwiiya kulemekezhya Mwami Leza Leza wenu, lyoonse mbuli mbomupona munyika iyo yalo njomulandukila kwitala lya Jordan kuti mwiihvwube.'' ¹⁴ Mwami Leza wakati kuli Moses, ''Bona, buzuba bulahyika webo noyelele kuhwa; mwiite Joshua alimwi mwamana mulibonye ulwenu mwebo mwihvwuka ilya kuswaanganina, kutewa mupe malailile walo.'' Moses alimwi a Joshua bakaunka a kulibonya ulwabo beni mulya mucihvwuka ica kuswaanganina. ¹⁵ Mwami Leza wakalibonya mulya mwihvwuka mumusemo waikumbi; musemo uyo waikumbi wakainhvwi amulyango ilya cihvwuka. ¹⁶ Mwami Leza wakati kuli Moses, ''Bona, webo ulakalala anhyi aba mauso; aba bantu mbobwene balaka buka alimwi akupupa mumicito mbuli ya muhvwuule kuyaa kukapaula ba leza beenzu balo abali kuli akati kabo uko kunyika nkobaya. Balo balaka nsowaila buyo mebo alimwi akutyolaula cihvwuminano icangu ncitwa kapangana ambabo. ¹⁷ Mpoona, mu buzuba ubo, bukali bwangu bulaka babukila kubalwana balo alimwi mebo ndakaba sowa. Ndakahyisa buhwu bwangu kuli mbabo alimwi balaka nyonyoonwa. Itenda zhyinji zhyinji alimwi a makatazhyo zhyila kabayana kuhiikila limwi bakaambe kuti mubuzuba ubo, 'Hena aya mapenzhyi taatu hyikila akaambo kakuti Leza wesu tacili akati kesu?' ¹⁸ Mahyimpe eeni mebo ndakahyisa buhwu bwangu kuli mbabo mubuzuba ubo nkaambo kazhyibyaabi zhyoonse nzhyobati kayanike bakacita, nkaambo bala kayanika baya ku tuleza tumbi. ¹⁹ Aboobo nkokuti kamuli lembela lwiimbo ulu nobeni alimwi mwamana mu bayiihye bantu ba Israel. Kamulubika mumilomo yabo, kutewa ulu lwiimbo lukabe kamboni wangu kubantu ba Israel. ²⁰ Nkaambo ndaakumana kubahyihya kunyika ilya njindaka konkezhya kupa kuli banhyiku babo, inyika iikunka mukupa a buci, alimwi baakumana kulya akukkuta akuzwidilila, ilyo bamana balaka tobela baleza bambi akubabelekela alimwi balaka nsapaula alimwi akutyola cihvwuminano cangu. ²¹ Ono kwaakuhyika bubyaabi bunji alimwi amakatazhyo atala ilya bantu aba, ulu lwiimbo lulakaambo kumbele lyabo mbuli kamboni (nkaambo talukalubwi kuhvwa ku milomo ya lunyungu lwabo). Nkaambo ndizhyi miyeeyo yoonse njobabamba sunu, nokuba hyitana akubahyihya balo munyika njindaka konkezhya kuli mbabo.'' ²² Aboobo Moses wakalemba lwiimbo ulu buzuba ubo mbubona akubayiihya balo bantu ba Israel. ²³ Mwami Leza wakapa Joshua mwana musankwa uwaa Nun malailile a kwaamba kuti, ''Koyuma alimwi akuba aacamba cibotu; nkaambo ndiwe ootilete bantu ba Israel munyika ilya njindaka konkezhya kuli mbabo, alimwi mebo ndakaba andiwe.'' ²⁴ Ono cakacitika kuti Moses naakamana kulemba mabala aa mulawo uyu mwibbuku, ²⁵ walo waka balailila bama Levite abakali kubweza ibbokesi lya cihvwuminano ica Mwami Leza, alimwi akwaamba kuti, ²⁶ Kamubweza ibbuku ili ilya mulawo alimwi mulibike zhyibambane kulubahvwu aibbokesi ilya cihvwuminano ca Mwami Leza Leza wenu, kutewa kali kamboni uumulwana mwebo. ²⁷ Nkaambo ndikuzhyi kupupa ukwabuzangi bwenu alimwi akuyuma inhyingo ukwenu; kamulanga, nincipona kwakaindi andimwe akuhyika sunu, lyoonse buyo muli bapahyi abazangila Mwami Leza; ino ono cilakaba buti ndahwa? ²⁸ Kamu ndibunjikila bakando boonse bamihyobo yenu, alimwi abahyi lutwe benu, kutewa mbandike mazwi aaya mumatwi aabo bamukamwini a kwiita izeulu alimwi ainyika kuti zhyipe bumboni ububalwana balo. ²⁹ Nkaambo ndizhyi kuti kwama luhwu lwangu mwebo mulaka maninina kumakulo akuleya kuhvwa munzhyila iyi njinda mulailila; lunyonyooko lulakaboola alindimwe kumazuba aaza kumbele. Ici cilakacitika akaambo kakuti mulakacita cibyaabi ku meso aa Mwami Leza, icakuti mulaka mukalazhya kuti anyeme kwiinda mu mulimo uwa matanhyi eenu.'' ³⁰ Moses wakainduluka kwaamba mumatwi aaimbungano yoonse yaba Israel mazwi aakali mulwiimbo ulu kuhyiikila oonse akamana.