¹ Njeeyi milawo iya bweendelezhyi alimwi a malailile njomutika kabambe munyika yalo Mwami Leza, walo Leza waba mauso,njakamupa mwebo kuti mwiihvwube, mazuba oonse ngo mupona ano anyika. ² Mu mahyimpe mulaka kanyonyoona masena oonse uko zhyihyi nzhyo muti kanyange buhvwubi mobakali kukombela tu leza twabo, atala lya malundu malanhwu, a tala lya tulundu, alimwi akunhyaa zhyisa zhyoonse izhyi hwuuka. ³ Mweelele kukolomona anhyi zhyipaililo zhyabo, kumwayaula macinda abo aa mabwe, alimwi akutenta zhyaanda zhyabo zhyiminina ka leza kakaintu Asherah. Mweelele kutema zhyintu zhyaku beza zhyatu leza twabo a kuyaya izhyina lyabo kuhvwa kubusena ubo. ⁴ Mwebo tamuka mukombi boobo Mwami Leza Leza wenu pe. ⁵ Pele kubusena uko kwalo Mwami Leza Leza wenu nkwasala kuhvwa ku mihyobo yenu kuti ahyimpike izhyina ilyakwe, ubo bulakaba mbobusena walo nkwaponena, alimwi uko nkukona mwebo nkomuli kuunka. ⁶ Nku kooko mwebo nkomuli kuleta zhyituulo zhyenu zhyakutenta, a miyasilo, azhya kumi, a milumbo iyakupa kwitanhyi lyako, zhyituulo zhya zhyihyomyo, milumbo iya kusanga omwini, alimwi aya butanga bwa ng'ombe alimwi abutanga bwa mbelele zhya kusomona. ⁷ Nku kooko kwalo nko muyakulida kumbele ilya Mwami Leza Leza wenu a ku kondwa ku zhyintu zhyoonse webo nzhyo kabika itanhyi ilyako kukwata, mwebo alimwi abang'anda zhyenu, uko Mwami Leza Leza wenu nkwa mulelekela. ⁸ Tamuka zhyiciti zhyoonse zhyintu nzhyo tucita kokuno sunu; ono muntu aumwi ucita buyo kuhwumbwa icabota mu meso aakwe mwini; ⁹ nkaambo tamuna kuhyika ku kulyookezhya, ku cikono calo Mwami Leza Leza wenu nca mupa. ¹⁰ Pele mwaunka kulanduka mulonga Jordan a kupona umo munyika yalo Mwami Leza Leza wenu njaacita kuti mwiikone, walo ula kamupa ku lyookezhya kuhvwa kuli bahyinkondo nyoko boonse aba muzhyingulukile kutewa mukapone mukabotu buyo. ¹¹ Kwamana kubusena ubo kwalo Mwami Leza Leza wenu mbwaya kusala kucita izhyina ilyakwe kuponena nkuko uko - kulya mulakaleta zhyoonse mebo zhyindamulailila: zhyituulo zhyenu izhyakutenta, miyasilo yenu, izhya kumi zhyenu, a milumbo iyakupa kwitanhyi ilyako, alimwi a milumbo iyakulisalila omwini iya zhyihyomyo nzhyomuya kuhyomya ku Mwami Leza. ¹² Mwebo mula kakondwa kumbele ilya Mwami Leza Leza wenu - mwebo, bana benu basankwa, bana benu bahyimbi, babelehyi benu balombwana, babelehyi benu bakaintu, alimwi amu Levite uyo uuli mu mulyango iwenu, nkaambo walo unyina cibeela nociba cikono akati kenu. ¹³ Amu kacenjele muli cenu kuti mutakabi nomupa cituuzhyo icakutenta kuhwumbwa abusena mbo mwabona; ¹⁴ pele nku kooko kubusena Mwami Leza mbwaya kusala bomwi akati ka mihyobo yenu kwalo nkomuya kupa zhyituulo zhyenu izhya kutenta, alimwi uko mwebo mulakacita zhyoonse nzhyi mulailila. ¹⁵ Pesi nokuba boobo, mwebo inga mwayaya alimwi akulya banyama mumona mumilyanga yenu, mbuli mbo muyanda, ka mutambula cileleko ica Mwami Leza Leza wenu kuli zhyoonse izhyo walo nzhyaka mupa; bantu batasalali ku mulawo alimwi a bantu basalala boonse inga balya ico, banyama abali mbuli bakonze alimwi anakahya. ¹⁶ Pele mwebo mutalyi bulowa; mubuleke bu poomokele anhyi kuhvwa mbuli meenzhyi. ¹⁷ Tamweelele kulya mu milyango yenu kuhvwa kuli zhyakumi izhya maila eenu, waini wenu mupya, mahwuta eenu, nokuba izhyakusomona zhya matanga aang'ombe zhyenu amatanga aa mbelele zhyenu; alimwi mwebo mutabi no mulya kuhwumbwa buyani bwa muyasilo antoomwe a cimwi icazhyihyomyo izhyo nzhyobamba, antela nozhyiba zhya mulumbo iwaku lyaaba omwini, nouba mulumbo uupewa kwitanhyi ilyako webo. ¹⁸ Anu kuti, mwebo mula kazhyilida kumbele ilya Mwami Leza Leza wenu mu busena ubo Mwami Leza Leza wenu mbwaya kusala - webo, mwana ako musankwa, mwana ako muhyimbi, mubelehyi wako mulombwana, mubelehyi wako mukaintu, alimwi amu Levite uyo uuli mu milyango yenu; mwebo mulaka kondwa kumbele lya Mwami Leza Leza wenu kuli nzhyoonse webo mpobika itanhyi lyako. ¹⁹ Ukacenjele ulwako omwini kutewa utakasowaili mu Levite kuhwumbwa kuti kocipona anyika iyako. ²⁰ Lilya Mwami Leza Leza wenu naya ku mukwazamunina minyinza yenu, umbona mbwaka muhyomenzhya mwebo, alimwi mwaamba kuti, 'Mebo nyanda kulya buyani,' nkaambo kakuti mukwete inkohya ya kulya buyani, inga mwalya buyani, umbona ubulombozhya buumi ubwako. ²¹ Kuti naa busena uko Mwami Leza Leza wenu nkwasala kuhyimpika izhyna ilyakwe kwayanika nkule kule a ndimwe, nkokuti mwebo mulaka yaya zhyimwi ing'ombe izhya mubutanga bwako alimwi aimbelele izhya mubutanga bwako ubo Mwami Leza mbwakupa webo, umbona mbwindaka mulailila mwebo,; inga mwazhyilya mumona mu milyango yenu, umbona ubulombozhya buumi bwako. ²² Umbona mbuli bakonze a banakahya mbobaliwa, nko kwaamba a mwebo mulakalya ica ncico; bantu bata salali ku mulawo alimwi a basalala abalo inga balya ica ncico umbona. ²³ Pesi amukabone mahyimpe kuti bulowa tii mwabulya, a kaambo ka kuti bulowa mbo buumi; mutakabulyi buumi antoomwe abuyani. ²⁴ Tamweelele kuya kubulya mwebo; amukabutilile anhyi ka bupoomoka kuhvwa mbuli meenzhyi. ²⁵ Tamweelele kuya kubulya mwebo, kutewa zhyintu zhyikeende kabotu kuli ndimwe mwebo, alimwi aku abana benu abaza munhyi ilyenu, lilya mwakucita zhyintu izhyilulume mumeso aa Mwami Leza. ²⁶ Pele zhyintu izhyizulilwa ku Mwami Leza izhyo nzhyomukwete aliwmi a milumbo iya zhyihyomyo zhyenu - mwebo mulakazhyibweza izhyi alimwi akuunka kubusena uko Mwami Leza nkwati kasale. ²⁷ Okulya mwebo mulakapa zhyituulo zhyenu izhya kutenta, buyani alimwi abulowa, a cipaililo ica Mwami Leza Leza wenu; bulowa ibwa miyasilo yenu bulakatika kupoomokela acipaililo ca Mwami Leza Leza wenu, alimwi mwebo mulaka bulya buyani. ²⁸ Kamubamba alimwi akuteelela kumazwi aya oonse nginda mulailila mwebo, kutewa zhyintu zhyeende kabotu a ndimwe alimwi a bana benu abaza munhyi lyenu kukabe kutamani, lilya nomwacita zhyintu zhyibotu alimwi a zhyiluleme mu meso aa Mwami Leza Leza wenu. ²⁹ Lilya Mwami Leza Leza wenu nakosola kukwihya zhyihyi kuhvwa kumbele ilyenu, lilya mwebo mwaakunjila kuya zhyibweza ndimwe, alimwi mwazhyibweza zhyihyi, alimwi akuponena munyika iyabo, ³⁰ amukacenjele kuli ndimwe nobeni kuti mutakacewi kukanka kubatobela balo, lilya baakumana kunyoonwa kuhvwa kumbele ilyenu - kucewa kuya kukuhvwuntauzhya tuleza twabo, kuceya kunjila kubuzya kuti, 'Ino zhyihyi izhyi zhyikomba buti baleza babo? ambebo ndakomba umbona.' ³¹ Mwebo tamweelele ku komba Mwami Leza munzhyila iyo pe, nkaambo zhyintu zhyoonse izhyisesemya ku Mwami Leza, zhyintu zhyatayandi walo - aba balo nzhyobakacita atu leza twabo; balo balakonzhya akutenta bana babo basankwa a bana babo bahyimbi mumulilo kupa tu leza twabo. ³² Kuhwumbwa coonse ncinda mulailila mwebo, amucibambe. Mutayungizhyi kuli ncico nokuba kukwihya kuhvwa kuli ncico.