¹ सचों मे इस्राएल बदे मतलब शुद्ध मन वालन के बदे यहोवा भला हयन। ² हमार डग त उखड़अ चाहत रहल, हमार डग फिसल जाए वाला रहल। ³ काहेकि जब हम दुष्टन के कुशल देखत रहली, त ओह घमंडीयन के विषय डाह करत रहली। ⁴ काहे कि ओह लोग के मौत में वेदनाएँ ना होला, लेकिन ओनकर ताकत अटूट रहअला। ⁵ उ लोग के दुसर मनुष्य नियन कष्ट ना होला; अऊर दुसर मनुष्य के तरे ओह लोग पे विपत्ति ना पड़अला। ⁶ ए वजह से अहंकार ओनके गले क हार बनल हव; ओनकर ओढ़ना उपद्रव हव। ⁷ ओनकर आँख में चर्बी झलकअला, ओनके मन क भावना उमड़ला। ⁸ उ ठट्ठा मारअलन, अऊर दुष्टता से हिंसा क बात बोलअलन; उ डींग मारअलन। ⁹ मानो उ लोग स्वर्ग में बईठ के बोलअलन अऊर उ धरती में बोलत फिरअलन। ¹⁰ ए बदे ओनकर प्रजा लउट आई, अऊर उनके भरल प्याला क पानी मिली। ¹¹ फिर उ लोग कहलन कि, “परमेशवर कईसे जानअलन? का परमप्रधान के कुछो ज्ञान हव?" ¹² देखा, ई दुष्ट लोग हयन; तबो हमेशा आराम से रहके अऊर धन सम्पत्ति बटोरत रहअलन। ¹³ निश्चय हम अपने दिल के बेकार में शुद्ध कइली अऊर अपने हाथन के निर्दोषता में धोले हई; ¹⁴ काहेकि हम हर दिन मार खात आयल हई अऊर रोज भोर के हमार ताड़ना होत आयल हव। ¹⁵ अगर हम कहले होइत, हम अईसन कहब, त देखा हम तोहरे संतानन के पीढ़ी के साथे छल करित, ¹⁶ जब हम सोचअ लगली कि एके कइसे समझी, त ई हमरे जीवन में बहुत कठिन समस्या रहल, ¹⁷ जब तक कि हम परमेश्वर के पवित्रजगह में जाके उ लोगन के नतीजा के ना सोचे। ¹⁸ निश्चय तू ओह लोग के फिसलन वाला जगह पर रखअलअ; अऊर गिरा के सत्यानाश कर देलअ। ¹⁹ उ लोग पल भर में कइसे उजड़ गयल हयन! उ मिट गईलन, उ घबरात-घबरात, नाश हो गयल हयन। ²⁰ जइसे जागल आदमी सपना के तुच्छ जानअला, ओइसहीं हे प्रभु, जब तू जगबअ, त ओके छाया के तरे समझके तुच्छ जनबअ। ²¹ हमार मन कड़वा हो गयल रहल, हमार अन्तःकरण छिद गयल रहल, ²² हम अबोध अऊर नासमझ रहली, हम तोहरे सामने पागल जानवर के तरे रहे। ²³ तब भी हम लगातार तोहरे साथे रहली; तू हमार दाहिना हाथ पकड़ले रहलअ। ²⁴ तू सम्मति देते हुए, हमार मार्गदर्शन करबअ, अऊर तब हमार महिमा करके हमके अपने लग्गे रखबअ। ²⁵ स्वर्ग में हमार अऊर के हव? तोहरे संगे रहते हुए हम धरती पे अऊर कुछ नाही चाहित। ²⁶ हमार दिल अऊर मन दुनों त हार गयल हव, लेकिन परमेश्वर हमेशा के बदे हमार भाग अऊर हमरे दिल क चट्टान बनल हयन। ²⁷ जे तोहसे दूर रहअलन उ त नाश होइहन; जे केहु तोहरे खिलाफ व्यभिचार करअला, ओके तू विनाश कर देलअ। ²⁸ लेकिन परमेश्वर के लग्गे रहअ, ईहअ हमरे बदे भला हव; हम प्रभु यहोवा के आपन शरणस्थान मनले हई, जेसे हम तोहरे सब कामन क वर्णन करी।