¹ हे परमेश्वर, राजा के आपन नियम बतावा अऊर राजपुत्र के आपन धार्मिकता सिखावा! ² ऊ तोहरे प्रजा क न्याय धार्मिकता से करीहन अऊर दीन लोग के न्याय ठीक ठीक करीहन। ³ पहाड़न अऊर पहाड़ियन से प्रजा के बदे, धार्मिकता के जरिए शान्ति मिलल करी ⁴ उ प्रजा के दीन लोगन क न्याय करीहन, अऊर दरिद्रन लोगन के बचईहन; अऊर अत्याचार करअ वालन के चूर करीहन*। ⁵ जब तक सूरज अऊर चाँद बनल रही तब तक लोग तोहसे पीढ़ी दर पीढ़ी भय मानत रईहन। ⁶ उ घास के खूँटी पे बरसअ वाले मेंह, अऊर धरती के सींचअ वाले झाड़ियन के तरे होइहन। ⁷ ओनके दिनन में धर्मी लोग फुलिहन फलिहन,अऊर जब तक चाँद बनल रही, तबले शांति बहुत रही। ⁸ ओन समुन्दर से समुन्दर तक अऊर महानद से लेके धरती के छोर तक प्रभुता करीहन। ⁹ ओनके सामने जंगल के रहवाले घुटना टेकीहन, अऊर ओनकर दुश्मन धूल चटीहन। ¹⁰ तर्शीश अऊर द्वीप-द्वीप क राजा भेंट ले अइहन अऊर शेबा अऊर सबा दुनों क राजा उपहार लेके पहुँचइहन। ¹¹ सब राजा ओनके दण्डवत् करीहन, जाति-जाति क लोग ओनके अधीन हो जईहन। ¹² काहे कि ओन दुहाई देवअवाले दरिद्र क, अऊर दुःखी अऊर असहाय मनुष्य क उद्धार करिहन। ¹³ ओन कंगाल अऊर दरिद्र पे तरस खईहन अऊर दरिद्रन के प्राण के बचईहन। ¹⁴ ओन ओनके के प्राण के अत्याचार अऊर उपद्रव से छुड़ा लेईहन; अऊर उनकर लहू ओनकरे नजर में अनमोल ठहरी। ¹⁵ ऊ जिंदा त रही अऊर शेबा के सोना मे से ओके के दिहल जाई। लोग रोज ओकरे बदे प्रार्थना करीहन; अऊर दिन भर ओके धन्य कहत रईहन। ¹⁶ देश में पहाड़न के चोटीयन पे ढेर क अन्न होई; जेकर बाल लबानोन के देवदारन के तरे झूमीहन। अऊर नगर क लोग घास के तरे लहलहईहन। ¹⁷ ओनकर नाम सदा सर्वदा बनल रही; जबले सूरज बनल रही, तबले ओकर नाम रोज नया होत रही, अऊर लोग ओनके चलते अपना के धन्य गिनिहन, सब जाति ओनके धन्य कईहन। ¹⁸ धन्य हयन परमेश्वर यहोवा परमेश्वर, जे इस्राइल क परमेश्वर हयन। आश्चर्यकर्म केवल ओनही करअलन ¹⁹ ओनकर महिमायुक्त नाम हमेशा धन्य रही; अऊर पूरा धरती उनकर महिमा से परिपूर्ण होई। आमीन फिर आमीन। ²⁰ यिशै क बेटा दाऊद क प्रार्थना खतम भयल।