¹ हे परमेश्वर, हमरे प्रार्थना के ओर कान लगावा; अऊर हमरे गिड़गिड़ाहट से मुँह मत मोड़ा! ² हमरे ओर ध्यान देके, हमके जवाब दा; विपत्तीयन के वजह से हम व्याकुल होत हई। ³ काहे कि दुश्मन कोलाहल, अऊर दुष्ट उपद्रव करत हयन; उ हमरे पे दोषारोपण करत हयन, अऊर क्रोध में आके सतावत हयन। ⁴ हमार मन भीतर ही भीतर संकट मे हव, अऊर मृत्यु क डर हमरे मे समा गयल हव। ⁵ डर अऊर कँप कँपी हमके पकड़ लेले हव , अऊर डर हमके जकड़ लेले हव । ⁶ तब हम कहली, "भला होत कि हमरे कबूतर के जइसे पंख होत त हम उड़ जाइत अऊर आराम पाइत! ⁷ देखा, फिर त हम उड़त-उड़त दूर निकल जाइत अऊर जंगल मे बसेरा लेइत, (सेला) ⁸ हम प्रचण्ड बयार अऊर आँधी के झोका से बचके कऊनो शरणस्थान मे भाग जाईत। " ⁹ हे प्रभु , ओनकर सत्यानाश करा, अऊर ओनके भाषा मे गड़बड़ी डाल दा; काहे कि हम नगर मे उपद्रव अऊर झगड़ा देखले हई। ¹⁰ रात-दिन उ सब ओनके शहरपनाह पे चढ़के चारो ओर घूमलन; अऊर ओनके भीतर दुष्टता अऊर उत्पात होवला। ¹¹ ओनके भीतर दुष्टता बसेरा डलले हव; अऊर अत्याचार अऊर छल ओकरे चौक से दूर नाहि होलन । ¹² जे हमार नामधराई करअलन उ दुश्मन ना रहल, नाहि त हम ओके सह लेइत; जे हमरे विरुद्ध बड़ाई मारअलन उ हमार बैरी ना हव, नाहि त हम ओसे छिप जाइत। ¹³ लेकिन उ त तोंही रहलअ जे हमरे बराबरी क मनुष्य हमार परममित्र अऊर हमार जान पहचान क रहलअ। ¹⁴ हमने दुनो जने आपस मे कइसन मीठा-मीठा बात करत रहे; हमने भीड़ के साथे परमेश्वर के भवन के जात रहे। ¹⁵ ओनके मृत्यु अचानक आ दबावअ; उ जिंदा ही अधोलोक मे उतर जाए; काहे कि ओनके घर अऊर मन दुनो मे बुराई अऊर उत्पात भरल हव*। ¹⁶ लेकिन हम त परमेश्वर के पुकारब; अऊर यहोवा हमके बचा लेईहन। ¹⁷ साँझ के, भोर के, दोपहर के, तीनो पहर हम दुहाई देब अऊर कराहत रहबला, अऊर ओन हमार शब्द सुन लेईहन। ¹⁸ जवन लड़ाई हमरे विरुद्ध मचल रहल ओसे ओन हमके कुशल के संगे बचा लेले हयन। उ सब त बहुतन के संगे लेके हमार सामना कइले रहलन । ¹⁹ परमेश्वर जवन आदि से विराजमान हयन इ सुनके ओनके उत्तर देइहन। (सेला) इ उ हयन जेकरे कऊनो बदलाव नाहि, अऊर ओनकरे मे परमेश्वर क डर हव ही नाहि। ²⁰ उ अपने मेल रखअवालन पे भी हाथ उठईले हयन, उ अपने वाचा के तोड़ देले हयन। ²¹ ओनके मुँह क बात त मक्खन के तरे चिकना रहल लेकिन ओनके मन मे लड़ाई क बात रहल; ओनकर वचन तेल से ज्यादा नरम त रहल लेकिन नंगा तलवार रहल। ²² आपन बोझ यहोवा पे डाल द ओन तोहके सम्भअलिहन; ओन धर्मी के कभो टलअ न देईहन। ²³ लेकिन हे परमेश्वर, तू उ लोगन के विनाश के गड़हा मे गिरा देबअ; हत्यारा अऊर छली मनुष्य अपने आधा उमर तक भी जीवित न रईहन। लेकिन हम तोहरे पे भरोसा रखले रहब।