¹ धन्य हयन यहोवा, जे हमार चट्टान हयन, ओन युद्ध के बदे हमरे हाथन के आउर लड़ाई के बदे हमरे उँगलियन क अभ्यास करावलन। ² ओन हमरे बदे करुणानिधान आउर गढ़, ऊँचा जगह आउर छुड़ावअवाला हयन ओन हमार ढाल आउर शरणस्थान हयन, जे जातियन के हमरे वश में कर देलन। ³ हे यहोवा, मनुष्य का हव की तू ओकर सुधि लेलअ, या आदमी का हव की तू ओकर कुछ चिंता करअल? ⁴ मनुष्य त साँस के जइसन हयन; ऊ सब क दिन बीतत परछाई के तरे हव। ⁵ हे यहोवा, अपने स्वर्ग के नीचे करके नीचे उतर आवा! पहाड़न के छूआ तब ओम्मे से धुँआ निकली! ⁶ बिजली कड़कड़ाके ओ सब के तितर-बितर कर द, आपन तीर चलाके ऊ सब के घबरा द! ⁷ आपन हाथ ऊपर से बढ़ाके हमके महासागर से बचावा, मतलब परदेसीयन के चंगुल से छोड़ावा। ⁸ ऊ सब के मुँह से त झूठ बात निकलअला, आउर ऊ सब के दहिना हाथ से धोखा क काम होला। ⁹ हे यहोवा, हम तोहरे स्तुति क नया गीत गाइब; हम दस तार वाला वीणा बजाके तोहार भजन गाइब। (प्रका 5:9, प्रका 14:3) ¹⁰ तू राजा लोग क उद्धार करअल, आउर अपने दास दाऊद के तलवार के मार से बचावअल। ¹¹ हमके उबारा आउर परदेसीयन के वश छुड़ा ल, जेकरे मुँह से झूठा बात निकलअला, आउर जेकर दहिना हाथ झूठ क दहिना हाथ हव। ¹² हमने क बेटा लोग जवानी के समय में पौधनके तरे बढ़ल हुअल होंवअ*, आऊर हमने क बेटीयन ऊ कोनावाला खंभा के तरे होंवअ, जवन महल बदे बनावल जाए; ¹³ हमने क खत्ता भरल रहअ, आउर ओम्मे हर तरह क अन्न रखल जाय, आऊर हमने क भेड़-बकरीयन हमने के मैदानन में हजारन हजार बच्चा पैदा करअं। ¹⁴ तब हमने क बैल खूब लदल हुएल होंवअ; हमने के न कऊनो विघ्न हो आउर न हमने क कहीं जाए के होवअ, आउर न हमने के चौकन में रोना पीटना होवअ*, ¹⁵ त ए दशा में जवन राज्य मौजूद हव उ केतना धन्य होई! जऊने राज्य क परमेश्वर यहोवा हयन, उ राज्य केतना ही धन्य हव!