¹ Mɔzyizi ylɔ kplé Izlayɛlivi lɛ bi bo ɖo na ye ɖɔmɔɖe: nu xe Mawu mavɔ mavɔ ɖɔ mi do na nɔ wa lɛ ɖe ɖie. ² Azan anyizɛn wɛ e na nɔ wa azɔm na, lo bɔ, azan canwe gɔɔ na nyi nu mimɛ na mi, sabaa, gbɔjɛzan lɔ, bɔ mi na de do vo na mawu mavɔmavɔ. Amade wa azɔn ɖe vlavo gbɛngbé lɔ, e na hui. ³ Mika na bɔ myɔɖo xwe mitɔn lɛ ɖekpekpe gbe ɖo gbɔjɛzan lɔ gbe a. ⁴ Mɔyizi ɖɔ na Izlayɛlivi lɛ bi keba ɖɔmɔde; nu xe mawu mavɔmavɔ ɖɔ mi na nɔ wa lɛ ɖe ɖie. ⁵ Mi sɔ ɖe sin nu xé mi ɖo lɛ ɖe wu, bo nă nă mawu mavɔmavɔ. amɛ xe ɖo jlo ɖagboe,bo na blo lɛ ɖe, yé nă hɛn nu alɔkpa alɔkpa lɛ wă nă mawu mavɔmavɔ ye na hɛn sika,subugan, ganvɛɛ. ⁶ Avɔ blɔdo, avɔ vɛɛ cɛcɛ, linlɔnvɔ ɖagboe ɖagboe kpo gbɔfunvɔ kpo. ⁷ Ye na hɛn agbogbasa xe e nu vɛɛ do de, agbasa hitli lɛ kpo kasyatin kpo. ⁸ Ami xe e na do kanlingbɛn lɛmɛ de, atinkɛn wanɖăgboe nɔ na amɛ ɖe, bo nahɛn celu wan lio lio ga. ⁹ Ye na hɛn akpɛn ɖagboe onisi wa ga kpo akpɛn devo lɛ kpo bɔ, e na to ɖo efodu lɔ kpo akɔntago lɔ kpo wu. ¹⁰ Alɔnuzɔnwatɔ xe ɖo mimɛ bɔ alɔ nu yetɔn mɛ asin na ganji lɛ ɖ kpoo na kple bo na blo nu xe mawu mavɔmavɔ ɖɔ e na blo lɛ ɖe bi. ¹¹ Nu xelɛ wɛ nyi mawu xwe lɔ: goxɔ lɔ, avɔ xe e na cɔn do lɛ, nuhɛnnu lɛ, axwlɛ lɛ,wɛn lɛ, dotin lɛ kpo afɔ lɛ kpo. ¹² Alɛnunuɖaka lɔ, kpotin untɔn lɛ, kpo avɔ xe e na cɔn do ɖe kpo. ¹³ Kplɔn lɔ kpo kpotin untɔn lɛ kpo,nu xe e nɔ zan ɖo kplɔn lɔ ji kɛ ɖe bi kpo akpomɛblo xe na sɔ xwlé mawu ɖe kpo. ¹⁴ Kanlingbɛnnu lɔ kpo nu xe e nɔ sɔ sɛ myɔ do nyi lɛ ɖe kpo, kanlingbɛn lɛ kpo zmi xe e na sɔ bɔ myɔ nyi ɖe kpo. ¹⁵ Vɔsisakpe xe ji e nɔ kɔn celu wan lyo lyo ɖo ɖe, kpo avɔ xe e ɖo ɖo goxɔ lɔ sin xɔlihɛnnu ɖe kpo. ¹⁶ Vɔsisakpe xe ji e nɔ mɛ vɔ te ɖe, kpo ganja untɔn xe e nɔ zan ɖo vɔsisakpe lɔ kɔn lɛ ɖe kpo, ayawagban lɔ kpo nu xe ji e nɔ nɔ ɖe kpo. ¹⁷ Avɔ xe e ɖe nu de mɛ bɔ e sɔ lilɛdo xwe lɔ lɛ ɖe kpo dotin yetɔn lɛ kpo, afɔtin lɛ kpo avɔ xe e do do agbo xwe lɔ tɔn nu ɖe kpo. ¹⁸ Gaxɔ lɔ sin so lɛ kpo xe sɔ lilɛdo xwe lɔ lɛ ɖe kpo,kpo kăn yetɔn lɛ kpo. ¹⁹ Kkpo azɔnwu xe nyi vɔsanu-xwlemawutɔ Aalɔɔn tɔn lɛ kpo, kpo awu xe nyi sunnu vi Aalɔɔ tɔn lɛ bɔ ye nɔ do bo nɔ wa sinsɛɛnzɔn yetɔn lɛ nyi de kpo ²⁰ Izlayɛli vi lɛ kpoo tɔnsin Mɔyizi ɖe xe na e ɖɔ xo ɖo te ɖe. ²¹ Nɛ gido mɛ ɔ, Izlayɛlivi xe ayi ɖɔ xo nă, bɔ ye ɖo jlo ɖagboe ɖe bi wa bo hɛn nu wa na mawu mavɔmavɔ nă e nă blo goxɔ xe mɛ mawu nă nɔ wă do go ye te ɖe nyi, kpo nu xe e na nɔ sɔ sɛn ɛ nyi ɖe kpo, kpo nu xe e nă sɔ tɔ awu vɔsanu xwlemawutɔ tɔn lɛ nyi ɖe kpo. ²² Sunnu kpo nyɔnu kpo wɛ wa;ye amɛ xe ɖo jlo dagbae ɖe bi wɛ hɛn nu xe e nɔ sɔ ɖo awu wu lɛ ɖe, tomɛganvi lɛ, alɔgan lɛ kpo kɔji lɛ kpo wa na mawu mavɔmavɔ. nu nɛlɛ kpo wɛ nyi sikanu-amɛ ɖokpo ɖokpo nɔ sɔ nă ale xe e nɔ blo gbɔn ɛ bó nɔ sɔ nu nă mawu mavɔmavɔ ɖé. ²³ Amɛ xe ɖo avɔ blɔdo, avɔ vɛɛ, avɔ vɛɛ cɛcɛ, linlɔnvɔ ɖadboe ɖagboe, gbɔfunvɔ, agbogbasa xe e si nu vɛɛ do ɖe kpo agbasa tlitli lɛ kpo bi hɛn wa. ²⁴ Amɛ xe sɔ subugan alo ganvɛɛ ɖo vo nă mawu mavɔmavɔ lɛ ɖe kpoo bɛ wă amɛ xe ɖo kasyatan bɔ e hɛn ɔ, e na zan nă xɔzɔn lɔ ɖe bɛ wă. ²⁵ Nyɔnu alɔnuzɔn wătɔ lɛ bi hɛn avɔ xe ye lun ɖe wă ye hɛn avɔ blɔdo ,avɔ blɔdo, avɔ vɛɛ, avɔ vɛɛ cɛcɛ, kpo linlɔnvɔ ɖagboe ɖagboé kpo. ²⁶ Nyɔnu alɔnuzɔn watɔ ɖevɔ lɛ xe nyɔ acɔ nyi lɛ ɖe, bo nyɔ avɔ lun ganji lɛ de kpoo wɛ lun gbɔfunvɔ. ²⁷ Gan xe ɖo togun lɔ mɛ lɛ ɖe hɛn akpɛn ɖagboe dagboe xe e nɔ ytɔ ɖɔ onisi ɖe, kpo akpɛn ɖagboe dagboe ɖe vo ɖee wă nă ẽ na to ɖo efodu lɔ kpo akɔntago lɔ kpo wu. ²⁸ Ye hɛn atinkɛn nyɔwan nyɔwan lɛ kpo ami kpo, bɔ e nă sɔ blo ami xe e nɔ do kanlingbɛn mɛ ɖe kpo ami xe nɔ si na amɛ bo nɔ can amɛ ɖo vo nă mi, kpo celu wan lyolyo kpo. ²⁹ Izlayɛlivi,sunnu kpo nyɔnu kpo xe ɖo jlo ɖagboe bo na jɔ fun do azɔn xe mawu mavɔmavɔ zɔn gbɔn Mɔyizi ji lɛ mɛ ɖe bi hɛn nu wa na mawu mawvɔmavɔ kpo ye lɔsu lɛ sin jlo kpo. ³⁰ Mɔyizi ɖɔ na Izlayɛlivi lɛ ɖɔmɔɖe mi na ny wɛ ɛ nyi ɖɔmɔɖe mawu mavɔmavɔ sɔ amɛɖe na azɔn nɛ ɔ: Besalɛli, wuifi vi,huu vivu lɔ wɛ; akɔta Judăa tɔn mɛ e jɔ te. ³¹ E nă ɛ yɛ mawu tɔn bɔ e gɔ ayi untɔn mɛ, bɔ e bi bo na mɔ nukunnu jɛ nu mɛ tawun, Ena nyɔ azɔn xwici xwici alɔkpa lɛ bi. ³² E blo bɔ e nyɔ tito lɛ blo, e nyɔ sika sin azɔ wa, bo nyɔ subugan kpo ganvɛɛ sin avɔn wa. ³³ E nyɔ akpɛn ɖagboe ɖagboe lɛ kpa, bo nyɔ to do na amɛ, e nyɔ atin kpa; na mi na ɖɔɔ, e nyɔ alɔnu zɔn lɛ bi wa. ³⁴ E na ɛ yɛ xe nɔ kplɔn nu amɛ ɖe,e nă yɛ ɖokpo nɛ lɔ ke oxoliyavu: oxoliyavu ɔ Axisa maki vi wɛ Akɔta dan tɔ mɛ wɛ e jɔ te . ³⁵ E na yẽ nunywɛ, bɔ e gɔ ayi yetɔn mɛ bɔ ye na nɔ wa azɔn alɔkpa alɔkpa lɛ bi ye na nɔ kpa akpɛn ɖagboe ɖagboe lɛ, ye na nɔ ɖe nu ɖo avɔ mɛ, ye na nɔ ko avɔ blodo lɛ, avɔ vɛɛ, avɔ vɛɛ cɛcɛ; ye na nɔ kó linlɔnvɔ, ye na nɔ lun avɔ, bo na nɔ wa azɔn atɛnmɛ atɛnmɛ alo ye na nɔ ɖe nu ma mɔ kpɔn tɔn.