¹ Mavɔmavɔ ɖɔxo na Mɔyizi boɖɔ : ² ɖɔxo na Izlayɛlivilɛ na ye nɛ lɛkɔ bo wa ɖo atɛnmɛ ɖo Pihaxiloti sin nukɔn ɖo atɛntɛnmɛ na Migidolu kpo axu lɔ kpo xe kpannukɔn Balu cefɔn ɖe flɛnnɛ wɛ mina ɖo atɛnmɛ ɖó ɖo axulɔ to . ³ Falawɔn naɖɔ ɖó Izlayɛlivilɛ ye ɖobu bowa ci zogbeji ⁴ Un na syɛn ayixa na Falawɔn , bɔ e na nya yeedo bɔ Falawɔn kpo ahwan untɔn kpo na zɔn bɔ gigo ce nayi aga bona gbakpe bɔ Ejipunulɛ na nywɛnyi ɖɔ nyɛ wɛ nyi mawu mavɔmavɔ lɔ bɔ Izlayɛlivilɛ blo mɔ pɛɛɛ . ⁵ ye ɖɔ na axɔsu Ejipu tɔn ɖɔ : togun lɔ hɔn . Nɛ lɔ Falawɔn kpo bɔdewutɔ untɔnlɛ kpo sin ayixa huzu kpanta togunlɔ . Bɔ ye ɖɔ nɔkɛnyixe miwa bojo Izlayɛli do bɔ yeɖido aleha hun din ɔ ye kasɔ nawa azɔn xe ye nɔ walɛ ɖe vna mii ba a e ? ⁶ Bɔ Falawɔn sɔnu na ahwansɔ untɔn kpo togun untɔn kpo bɔɖo wuɖeke ji . ⁷ E sɔ ahwansɔ kanweko donu ayizɛn bɔɖo ahwansɔ xeɖo Ejipu lɛɖe bi kpo bokalɛ ɖo ahwanfuntɔlɛ tawun . ⁸ Mavɔmavɔ syɛn ji na Falawɔn axɔsu Ejipu tɔn titewungbe bɔ e jɛ gido na Izlayɛlivilɛ Izlayɛlivilɛ zɔn alɔ ɖo aga bo tɔnsin tolɔ mɛ . ⁹ Ejipunulɛ jɛ gido na yee boɖo yeenya kpo sɔ yetɔnlɛ kpo ahwanfuntɔ , ahwansɔ sɔ akɛtɛ kpo ahwangbɛ Falawɔn tɔnlɔ bi kpo bɔ yebɔɖo yeewu ɖo fixe yeɖo atɛmɛ te ɖo axulɔ to ɖo pihayiloti kpaxwe kpannukɔn Baalu cefɔn . ¹⁰ Falawɔn sɛya yee bɔ Izlayɛlivilɛ ɖe nukun bo mɔɖɔ Ejipunulɛ ɖo gido na yee bɔ avivɔfun ɖaxo ɖe jɛ yeeji yekpa abobo syɛnsyɛn ɖaxo ylɔ mawu mavɔmavɔ . ¹¹ Ye ɖɔ na mɔyizi ɖɔ : yɔdo kaɖo Ejipu ă wɛzɔn bɔ minakuci zogbeji ii ? Nɔkɛ nyixe ablo xɛ mii ale boɖe miisin Ejipu tolɔmɛ ? ¹² Nuxe miɖo ɖɔ nawe san ɖe kɛnyi xe ă e ? Jo miido na mawa azɔn na ejipunulɛ ɖo nɛ nyɔ na mii hu ɖɔ minawa ku ɖo zogbe mɔkɛ mi ɖɔ nawe san a e ? ¹³ Mɔyizi yigbe na togunlɔ bo ɖɔ : nɔkpɔn mi na ɖibu bo minɔ atɛn mitɔnlɛ mɛ na mi a kpɔn alexe mawu mavɔmavɔ mahwlɛn migan gbwɛn ɖe ye ɖo Ejipunu xe mi ɖo mɔ ye xelɛ ɖe lɔ mi ka sɔ na mɔ yee kpɔn gbeɖe bă . ¹⁴ Mawu mavɔmavɔ lɔ nafun ahwan ɖo ta mitɔn mɛ milɛ mici xwii kpowun . ¹⁵ mavɔmavɔ ɖɔna mɔyizi ɖɔ nɔwutu axwa nɛlɛ ɖoɖi ɖɔxo na izlayɛlivilɛ na ye nɛ zinzɔnlin . ¹⁶ Hwi ɔ ze alɔnukpo towe yi aga bo drɛn alɔ towe ɖo axu lɔ ji bo nafan ɛn mɛ bɔ Izlayɛlivilɛ nagbɔn xuxutɛn ɖo axu lɔ tɛntɛn . ¹⁷ Un nasyɛn ayixa na Ejipunulɛ bɔ ye na jɛ gido na mi bo nabyɔ ɛ mɛ bɔ Falawɔn kpo ahwangbɛ untɔn bi kpo ahwansɔlɛ , ahwankɛkɛvilɛ nasɔ gigo ce doxlɛ . ¹⁸ Bɔ Ejipunulɛ na nywɛnyi ɖɔ nyɛ wɛ nyi mawu mavɔmavɔ ɖo gan xemɛ Falawɔn , ahwansɔ untɔnlɛ , kpo ahwankɛkɛvi untɔnlɛ kpo naɖe gigo ce doxlɛ ɖe ¹⁹ Awɛnsagun mavɔmavɔ tɔn xe ɖo nukɔn na Izlayɛlivilɛ ɖe wayici gido na yee bɔ akpɔkpɔ xeɖo nukɔn nayee ɖe wayici gido nayee . ²⁰ Ewayi nɔte ɖo atɛntɛn na Ejipunulɛ kpo Izlayɛlivilɛ kpo akpɔkpɔ lɔ do zɛnflun ɖo akpa ɖe bo! na hinhɔn akpa ɖe ɖo zanlɔ mɛ e na bɔ akpa awelɛ ɖe kakpewu sɛkpɔ ɖe ɖo zan bute lɔ mɛ ă ²¹ Mɔyizi drɛn alɔ untɔn ɖo axulɔ ji bɔ mawu mavɔmavɔ lɔ klɔn axu lɔ kpo jɛhɔn hwezɛtɛn tɔn xe vnyi ɖo zan lɔ mɛ kpo awusyɛn ɖaxo ɖe kpo ɖe bona bɔ axu lɔ xu bɔ asin lɔ ma . ²² Izlayɛlivilɛ byɔ axulɔ tɛntɛn anyigba xuxu bɔ asin lɔ huzu aglinkpa ɖo aɖisi kpo amyɔ kpo na yee ²³ Ejipuwnulɛ , ahwanhun Falawɔn tɔnlɛ , sɔ untɔnlɛ kpo ahwanwatɔlɛ kpo jɛ gido na yee ɖo axu lɔ tɛntɛn . ²⁴ Finfɔnmɛ futufutu wɛ mawu mavɔmavɔ nɔ akpɔkpɔ ɖaxo ɖemɛ kpo myɔ kpo e ɖe kɔ kpɔn ejipunulɛ bodɔn hwyanhwyan ɖaxo ɖe byɔ yeemɛ . ²⁵ E ɖe afɔ na ahwanhunlɛ blewun na alizinzɔn lɔ nɛvɛ ɛ zɔn na yee bɔ Ejipunulɛ gbɔboɖɔ myahɔn sin Izlayɛlivilɛ nukɔn ɖo mawu ɖo ahwanfun na yee kpanta Ejiputo ²⁶ Mawu mavɔmavɔ ɖɔna mɔyizi ɖɔ : drɛn alɔ towe ɖohlan axulɔ ji na asinlɛ nacɔn ejipunulɛ biji kpo ahwanhun yetɔnlɛ , ahwanwatɔ yetɔnlɛ kpo ji . ²⁷ Mɔyizi drɛn alɔ untɔn ɖo axu lɔ ji zanflun damɛ lɔ axu lɔ ɖe hɔnhlɔn untɔn kpo bɔ Ejipunulɛ jɛ hinhɔn ji bɔ mawu mavɔmavɔ do cɔcɔ na yee jɛ axulɔ tɛntɛn . ²⁸ Asinlɛ lɛkɔ bowa cɔn ahwankɛkɛvilɛ biji kpo sɔ kuntɔlɛ kpo ahwangbɛ Falawɔn tɔn xe jɛ gido na Izlayɛlivilɛ byɔ axulɔmɛlɛ ɖe amɛ ɖokpo lɔsu kakpoci agbɛ ɖo yeemɛ ă ²⁹ Vɔɔlɔ Izlayɛlivilɛ lɛ zinzɔnlin anyigba xuxu bo gbɔn axulɔ tɛntɛn bɔ asinlɛ blo aglinkpa ɖo aɖisi kpo amyɔ kpo na yee . ³⁰ Azan nɛlɛ ji lɔ mawu mavɔmavɔ hwlɛn Izlayɛlivilɛ sin Ejipunulɛ lɔmɛ bɔ Izlayɛlivilɛ mɔ ejipunu xe kulɛ ɖe ɖo axukɛnji . ³¹ Izlayɛlivilɛ mɔ alɔ syɛnsyɛn mavɔmavɔ tɔn kpannukɔn Ejipunulɛ bɔ togun lɔ ɖibusi mavɔmavɔ lɔ bɔ ye ɖinu na mavɔmavɔ kpo amɛsɛntɔ untɔn mɔyizi kpo .