¹ Li miali diedo den teni petueli bijua Joeli maadi ya maama n tie na: ² "Cengi mani line yinba a nikpela, Diadi mani yi tuba ki cengi yinba Juda yaaba kuli. Naani li bonbuolu kpa tieni yi yogunu bi yi yaajanba yogunu? ³ Yin togidi la yi bila, ke yi bila mo n togidi la bi bila, ke bi ya bila mo n togidi la ya nifiima n baa ŋoadi. ⁴ A sidibila n hmani yaala, A dondoba n hmani ki ha yaala, A tobiñaana n hmani ki dudi. A tobiñaana n hmani ki ha yaala, I naaci n hmani ki dudi. ⁵ Fundi mani yinba a dañogaada, yin mua mani boncianla. Kelima yi duven tiidi bonluonkaala luoma po yi baa luo mi dapanma. ⁶ U nibuolu baa n diema. U pia paalu kaa pia coali mo. U ñina tie nani li yangbanjali ñina yeni. ⁷ U nibuolu yeni bolini ti duven tiidi, ki jendijendi ti kankandi, ki kpabidikpabidi i ki tudi ki luni i, ki kogidi n duven tiidi dapoaga ki ki ha a dapiena. ⁸ Mua mani nani ya pocaano n mua o calo kuuma yeni. ⁹ Mi pienma pada leni a ñincaba pada bodi U Tienu diegu nni. Li miali Diedo naacenba, bi kopadicianba ye leni li paboanli. ¹⁰ I kuani jugi, ki tinga yema ki mani, kelima halikama biidi, O duvenpaano gbeni, mi kpama mo gbeni. ¹¹ Bi kpakpaaba gbani wudi, I duven tiidi kpakpaaba buudi halikama leni olije po, kelima i kuani bonluonkaala bia. ¹² Bu duven tibu kuodi, Bu kankanbu mali, Gelenadie tilondi leni ti kpakpaliti leni pomie tiidi, leni i kuani tiidi kuli mali. Bi nisaaliba pamanli gbeni. ¹³ Yinba bi kopadicianba, laa mani li paboanli tiadi ki biidi yi pala. Yinba yaaba n tuuni li padibinbinli kani, yin mua mani. Cua mani ku ñiagu ki duani ki laa li paboanli tiadi, kelima mi pienma pada leni a ñincaba bodi yi Tienu diegu nni. ¹⁴ Bili mani u yogunu ki loli bu ñoabu, taani mani taancianli. Taani mani a nikpela leni mi diema yaaba li Miali Diedo yi Tienu diegu nni. Kpaani ki mia mani li Miali Diedo Todima! ¹⁵ Hain, ya danbiadili n kpendi nne te? Li Miali Diedo Pabienli daali nagini, li kpendi leni U Paaciamu Kuli Daano n jagi ya bolinma. ¹⁶ Mi jiema bodi ti nunbu nni, li pamanli leni li pamankandikaali bodi U Tienu Diegu nni. ¹⁷ Li bonbulikaala kuodi ti jaabuodi nni, a senba tua bon kuoma, a buabuana baa ki mumudi kelima alikama gbeni. ¹⁸ Ti yandi n buudi maama ne te! I naakuli pua yaya lindi, kelima moahmankaadi ki ye, baa ti yanbidi mo ye leni fala ciamo. ¹⁹ Li Miali Diedo, n jigidi ki nua fine ki kpaani ki miadi a todima kelima mi fantama dini li yankpaafuali, u mupienu mo sia i kuani tiidi. ²⁰ Ti moayandi moko jigidi ki nua fine, kelima a ñinbuana ñuudi, mi fantama mo dini li yankaafuali.