¹ Piebi mani li naatuntunli Siyono juali po, teni mani ban gbadi li moe n joagadikaali po. Mi diebma yaaba kuli n digibi kelima Li Miali Diedo daali kpendi, li daali yeni nagini. ² Laa daali tie biigicianli ya daali, a tawala leni ku gbangbadigu daali. Li daali yeni kpendi nani mi yendanma n yendi a juana maama. Diidi ya nibuolu n tie na n yaba ki go pia u paalu maama. U buolu daa kpa tieni, u kan go tieni mo baa ya nifiima n baa hoadi ya siiga. ³ U nibuolu yeni liiga tie nani ya fantama n buondi yeni, u puoli mo nani ya mupieno n buondi, Hali ke u daa tagini mi diema den tie nani Edena koahamu yeni. U yaa tagini ki ban pendi, u yen ha u puoli po fanpienma yaama ya noalima n gundi. Liba ki cia u kani. ⁴ Yua n laa ku niligu yeni baa yeni baa yedi taami. Bi tiini nani bi tanjagiba yeni. ⁵ U fuugu tie nani ya toateliti n tiini a juana yuli po, ki tie nani mi fantama n yen sia ku muagu n yaa pudi maama yeni. Ki tie nani ya toagoli n pia u paaciamu ki bogindi bu toabu po. ⁶ Bi ya nagidi i nibuoli yen digibi, mu nunmu kuli yen gbidi. ⁷ Bi tiini nani a jakoanda yeni, bi do i bilini nani bi toatieba yeni, yua kuli kubi o sanu, oba kuli kan jadi ki ha u. ⁸ Baa pangi bi yaba, yua kuli kubi o sanu. Bi jaligidi ki pendi yaala n pangi ba, pu kuli kan fidi ki sieni ba bi cenli nni. ⁹ Bi yadi u dogu nni ki tiini i bilini po, ki do ti diedi, ki kua a diebona kani nani a concona yeni. ¹⁰ Bi ya nagidi ki tinga yen digibi,Tanpoli mo n begibi. U yienu leni o hmaalo biigi, a hmabila yenma mo n bodi. ¹¹ Li Miali Diedo kpaani o toagoli liiga, O toanagili yaba. Ya toagola n baa kuani o ñoabona yaba ki kandi ki pia u paalu mo. Li Miali Diedo daali tie dacianli ki go pia i jeje hali boncianla, hme n baa fidi ki cia? ¹² Moala Li Miali Diedo go yedi: 'Lebidi mani ki cua n kani leni yi pala kuli. Loli mani bu ñoabu, buudi mani ki mia nni sugili. ¹³ Da padi mani yi tiayiekaadi bebe ka, Se yi lebidi yi yama.' Lebidi mani ki cua mani Li Miali Diedo yi Tienu kani, Kelima o juogidi leni yi ki gba yi po mi niñima, ki pia li juunli leni li hanbili. O yen lebidi o yama ki cedi ki kan tieni wan den jagi ke o baa tieni o niba yaala.H ¹⁴ Hme n bani o ya kan gua ki lebidi o yantiali, ki seligi yi bonhanla. Yeni, yi baa fidi ki ya kpendinni Li Miali Diedo yi Tienu po bu paabu leni a ñincaba. ¹⁵ Piebi mani li naatuntunli, siyono nni, Bili mani u yogunu mi ñoalolima po, taani mani li taancianli. ¹⁶ Taani mani bi niba, Ki tieni taangagidikaali, Taani mani a nikpela, taani mani a bila, Baa ya bila n da haani. O pocaancalo n ña o dieduadili nni o pocaano mo n ña o gbandieli nni. ¹⁷ Li Miali Diedo naacenba, bi kopadicianba n sedi li janli leni li padibinbinli siiga ki buudi, ki yedi: 'Li Miali Diedo, faabi a niba. Han da cedi a niba n la i fe. Han da tuo ke i nibuoli n ya laa ti ki tua: Bi Tienu nan ye le?' ¹⁸ Li Miali Diedo bua o diema, O gbadi o niba po mi niñima. ¹⁹ O guani ba ki yedi: 'N go baa soani yi po halikama leni duvepaano leni mi kpama. Yi baa baa li kuli hali lan dagidi. N kan go cedi yin le i fe i nilanbuoli siiga. ²⁰ N baa deli ki foagidi leni yi nijienu po yibali. N baa deli ki bolini o mu tinkuonmu leni a tinwaga nni. O toatieba yaaba n ye liiga, n baa deli ki jiini ba puoli ñincianma nni, yaaba n ye puoli mo, n baa deli ki jiini ba puoli ñincianma nni, Bi kpiema nuulu baa gbieni mi fawaama. Bani yaaba n tieni mi biadima boncianla yeni juodima n yeni. ²¹ Fini, ki tinga han da jie liba, Mangi a pali hali boncianla, kelima Li Miali Diedo n tieni apo yaala kuli po. ²² Yinba ti moayandi, yin da jie, Kelima a yankpafuana baa bundi, i tiidi baa luoni i bonluonkaala. Bu kankanbu leni duven tibu baa luoni boncianla. ²³ Yinba Siyono yaaba mo, yin mangi mani yi pala, Kelima Li Miali Diedo yi Tienu po. O baa pa yi ki taaga ki yogunu ya pundi, O baa pa yi ki takpiaga leni ki tajuodikaaga Nani wan den tiendi maama u yogunu nni yeni. ²⁴ I jali baa gbie leni halikama, Ti tadiciandi baa gbie leni mi dapanma leni mi kpama. ²⁵ N baa lebidi yi po ya bina ke n den soani mu tonbiñaanmu yaa n daa pudi fiabi, Ke a dondoba, a tobiñaana leni a sidibila n den hmani ti kpaandi yeni. ²⁶ Yi baa je ki guo, Yi baa pagi Mini li miaali Diedo yi Tienu, Mini yua n tieni yi po li bonlidikaala. N niba mo kan go le i fe mo hali abada. ²⁷ Yeni, yi baa bandi ke n ye yinba Isalele yaaba siiga. Yi baa bandi ke Mini n tie Li Miali Diedo yi Tienu, Ke bontoala kuli ki ye ki tie Tienu se mini. N niba mo kan go le i fe hali abada.' ²⁸ Li yaapuoli n baa teni n fuoma n jiidi ki yayadi bi nisaaliba kuli po. Yi bijaba leni yi bisiaba baa pua sawli. Yi jakpela baa dangi ti dangidi. Yi jawaaba mo baa le li bonlekaala. ²⁹ Laa dana nni, n baa teni n fuoma n jiidi ki yayadi baa bi naacenba leni a potuada po. ³⁰ N baa teni li bonlidinkaala n tieni, Tanpoli leni ki tinga nni. Mi soama,mi fantama leni ku muñigbangbadigu baa tieni. ³¹ U yienu baa lebidi ki biigi. O hmaalo moko baa lebidi ki moandi nani mi soama yeni, hali ke Li Miali Diedo daali daa cua, ya dacianli n pia i jeje yeni. ³² Ama yua n jaandi ki mia Li Miali Diedo yeli nni kuli, baa faabi. Nani Li Miali Diedo n yedi maama: Bi nitianba Jelusalema nni baa ciadi, Min gandi yaaba baa cia. Kelima Siyono leni Jelusalema po kuli, bi nitianba baa sieni. Li Miali Diedo gandi yaaba mo baa ye yaaba n cia siiga.