¹ Utisi diema nni den pia joa ba ke bi yi o Joba. laa joa den tie papiendaano ki go tiegi; o pia U Tienu fangili, kaa tiendi yaala n bia mo. ² O den mali bonjala lele leni bonpola taa. ³ O den pia yanbidi tudalele (7000) yoyuodi tudataa (3000) naakpakpaadi tudili (1000) ŋunñoe kobimuu, o tuonsoanba den yabi hali boncianla. laa joa den tie nicianmoano puoli yaa diema yaaba kuli siiga. ⁴ O bijaaba den yen caa biyaba denpo ki tiendi u badu bi ñiali nni, ki yen soani ban yini bi naataanpola ban taani ki jee ki go ño leni ba. ⁵ laa dana yaa pendi, Joba yen yini o bila ki gagidiki ŋanbiba, o yen yagidi ki fii ki padi bi kuli yendo yendo po li padijuukaali; kelima Joba yen yedi o pali nni: daalinba li fidi ke n bijaba tieni ti tuonbidi ki tudi U Tienu po bi pala nni. li tie yene ke Joba den maani ki tieni yogunu kuli. ⁶ Danyenli U Tienu bila den cua Li Miali Diedo nintuali, Sutaani moko den cua ki sedi bi siiga. ⁷ Li Miali Diedo den buali Sutaani: A ñani le yo? Sutaani den goa ki lebidi Li Miali Diedo ki yedi: n daa li goadi n goada yo ki gangi ki lindi ki tinga. ⁸ Li Miali Diedo den yedi Sutaani: A faami ki laa n naacemo Joba? nilo baa kuli ki da leni O ki tinga po; O tie papiendaano ki go tiegi mo, ki fangi U Tienu, waa tiendi kuli yaala n bia. ⁹ Sutaani den goa ki yedi Li Miali Diedo: naani li tie fanmi fanmi yaa po yo ke Joba fangi U Tienu? ¹⁰ naani ŋaa kubi o, wani leni o diegu, leni wan die yaala kuli kaa? A seligi o nii tuonli, o yankuli mo wuli ki ladi gbie mi diema kuli nni. ¹¹ Ama ŋan tandi A nuu ki sii wan pia yaali kuli n bani cain ke o baa teli a nintuali ki soli ŋa. ¹² Li Miali Diedo den yedi Sutaani: diidi, wan die yaali kuli n ŋaala a nuu nni; ama ŋan da sii wani oba. lanwani Sutaani den fuadi ki ñani Li Miali Diedo nintuali. ¹³ Danyenli Joba bi jaaba leni o bi siaba den dii ki go ñu duven bi kukuli kpelo joa o deni, ¹⁴ ke o tondo den cua Joba kani ki yedi o: i ne bi ko bu kpaabu ke i ŋunñoe baali ba, ¹⁵ ke Sabena diema yaaba cua ki baa ba, ki taa ti yandi, ki go kpa bi naacenba leni mu jugisiemu. mini bebe n sani ki ciadi, ki cua ki baa pa ŋa laabaali. ¹⁶ Hali ke o daa den maadi ki gbeni, ni toa den cua ki yedi: U Tienu fantama ñani tanpoli ki jiidi ki sia ki bolini ti yandi leni bi naacenba kuli. mimi bebe n ciadi ki cua ki baa pa ŋa laabaali. ¹⁷ O moko ki den maadi ki gbeni, ke ni toa den cua ki yedi: Kalide diema yaaba caga taa, bi cua ki baa ti yuoyuodi po ki taa di, ki go kpa bi naacenba leni mu jugisiemu. Mini bebe n ciadi ki cua ki baa pa ŋa laabaali. ¹⁸ Waa den maadi ki gbeni, ke ni toa moko cua ki yedi: a bijaba leni a bisiaba bi ye bi kuli kpelo denpo joa, ki di ki go ŋu duven ke; ¹⁹ ku tafaciaangu ñani mi fanpienma po ki cua pua ki gula li dieli yeni goanaada ke li baa ki liba bi nipanba yeni po, ke bi kuli kpe. mini bebe n ciadi ki cua ki baa pa ŋa laabaali. ²⁰ Lanwani Joba den fii ki sedi, ki padi o liadicianli, ki go koagidi o yuli; ki den gbaani tii po; ²¹ Ki yedi: N ñani n naa tugu nni mubile, n go baa guani ki tinga nni mubili. Li Miali Diedo teni, Li Miali Diedo go gaa; Li Miali Diedo yeli n baa ti kpiagidi! ²² Laa bonli kuli nni Joba naa den tieni tuonbiadi, waa den maadi ki yedi bonbiadili baa kuli U Tienu po.