¹ Bi ne n tie Isalele bila yaaba n den yegi leni bi Ba Jakobo ki kua Ejibiti diema, bani leni bi diedi nni yaaba kuli. lan tie: ² Lubena, Simeyono, Lefi, Juda, ³ Isakala, Sabulono, Benjamina, ⁴ Dana, Nefitali Gada, leni Asela. ⁵ Yaaba n den ñani Jakobo yaa niini kuli den taani ki fii niba piilele. laa yogunu den sua ke Josefi ye Ejibiti. . ⁶ Josefi leni o kpeliba, leni laa nifiima kuli den kpe. ⁷ Isalele yaaba den maa ki pugidi hali boncianla. bi den yaabidi ke bi paalu mo pugidi bonŋanla. bi yabidi ki gbieni mi diema. ⁸ Badicaano den dini li bali Ejibiti diema nni, yua n kaa den bandi Josefi. ⁹ O den yedi o niba: diidi mani Isalele yaaba tua yaa niba n yaba ki cie ti, ki go pia u paalu ki cie ti. ¹⁰ Cedi mani tin wani ba ke ti fani ki cieba, tin teni ban da go yabidi ki pugini, lani, baa toabu yaa tieni ban da taani leni ti yibalinba ki koani ki paadi ti ki yuandi ki ña mi diema. ¹¹ Bi den dini yaaba n yaa gobidiba li tuonli nni, ki bua ban yaa wangidi ba fala leni a tuonpaala. yene, ke bi den maa Pitoma leni Lamisesa dogi, yii den tie Falono ŋalimandogi. ¹² Ama baa leni ban den faligidi ba bi den go li baa maa ki pugidi boncianla, hali ke Ejibiti yaaba den cili ki nani ba. ¹³ Lan yaapo Ejibiti yaaba den mabinba ki pugini leni a tuonpaala. ¹⁴ Bi den paagi bi yema leni yaa tuona n pia fala. ti tandi tuonli leni li tankonbuali, leni i kuani yaa tuona. li den tie leni tugimoangu yo ke bi den teni ke bi tuuni ki laadi laa fala buolu. ¹⁵ Ejibiti bado go den maadi leni yaa Madimaani puoba n maandi Ebulu yaaba puoba, yendo den yi Sifila o lielo mo den yi Pua. ¹⁶ O den yedi ba: yi yaa baa maani Ebulu yaaba puoba, yaa yogunu ke la ke bi baa maa, li sua ke li tie bonjaga yin teni kan kpe; ama li tie bonpuoga yin cedi kan yaa ye. ¹⁷ Ama bi Madimaani puobi yeni den pia U Tienu fangili , baa den tieni o bado n yedi ba yaala. bi den cedi a bonjala ke bi ye. ¹⁸ Ejibiti bado den yini bi Madimaani puoba yeni ki yedi: be yaa po ke yi tieni yeni, ki teni a bonjala ke bi ye? ¹⁹ Bi Madimaani puoba den guani Falono ki yedi o: li tie kelima Ebulunba yaaba puoba naa ta leni Ejibiti puoba; bi pia u fidu bonŋanla, bi yen maa hali o madimaanpua daa ki cua. ²⁰ U Tienu den tieni li ŋanbili bi Madimaapuoba yeni po ke bi go den pugidi ki yaabidi. ²¹ Nani bi Madimaapuobi yeni den ba U Tienu fangili, U Tienu den seligi bi diedi. ²² Lan wani Falono den ñani li naa ñoabonli o niba kuli po ki yedi: bi yaa mali bonjaga yin lu ga u kpenciamu nni ama li tie bonpola yin cedi ban yaa ye.