¹ Lefi buolu yua bonjaga den taa Lefi buolu yua bonpuoga. ² Laa pua den punbi ki mali bonjaga. O den la ke laa bonjaga, ki den wuoni o hali hmaali taa. ³ wan kan go den fidi ki wuoni o, o den taa ku baabuogu ki boali gu leni ya sinboanma n ñani ki tinga nni leni sintoama o den kpieni ki biga yeni ku baabuogu nni ki ban bili u kpenciamu ñinkunu kani. ⁴ Ki biga ciamo bonpuoga den se foagima, ki baa le yaala n baa tieni ki biga yeni. ⁵ falono bisali den gedi u kpenciamu po ki baan wali, o yegininlieba den gaandi ki baali u kpenciamu. O den la ku baabuogu ti kpenmuadi nni ki soani o tuonsoanlo n ban taa gu. ⁶ O den hoagidi gu ki sua ke ki biga ye lienni. O den tie bonjaga ke o buudi. Mi nihima den cuo o ke o yedi: O tie Ebilu yaaba biga! ⁷ Ki biga ciamo den yedi o bado bisalo: A bua ke min gedi ki ban lingi apo Ebilunba yaaba siiga ya pua n baa dindi o ki go haandi opo ga ? ⁸ Falono bisalo den yedi: Gedi. O jafaano den gedi ki ban yini ki biga naa. ⁹ falono bisalo den yedi: Ga ki biga ne, ki yaa haandi o npo, n baa pa ha a panpani. O pua yeni den ga ki biga ki ban haandi ga. ¹⁰ Ki biga n den fandi, o den taa ki gedini o Falono bisalo po. O den tua opo nani o bijua yeni. O den yini o Musa, kelima o den yedi: N den dadi ki ñani o mi ñima nni. ¹¹ Musa n den fandi, o den gedi okpiiba kani ki den laa bi tuonbiada. O den laa ke Ejipiti yua poa o kpiiba Ebilu yaaba siiga yendo. ¹² O den diidi ki lindi, kaa laa oba, o den kpa Ejipidi buolu yua ki wuoni o mi tanbiima nni. ¹³ Li danlieli o den ñani ki goadi, o den laa ke Ebilu yaaba siiga niba lie koani leni biyaba. O den yedi yua n pia i tagili yeni: Be yaa po ke a poa a kpiilo? ¹⁴ Laa joa den yedi o: hme dini a li bali ke han tua ti bujialo ? A tema ke a baa kpa nni nani han den kpa Ejipiti yua maama bi ? Musa den yedi: Laa pia kuli tema bi ga li bonla yeni laabaalo. ¹⁵ Faloni n den bandi yaala n tieni, o den lingi baa kpa Musa. Ama Musa den sani ki ñani Faloni kani ki gedi Madiana diema nni, ki pundi ki sedi li caali ¹⁶ kani. Madiana kopadiciamo den pia bisiaba lele. Bi den cua ki baa luuni mi ñima, ki gbieni ku ñintiagu ki ñuni bi baa yankulu. ¹⁷ Bi yankpaaba den cua, ki deli ba. Musa den fii ki koani leni bi yankpaaba yeni ki gaa ba, ki ñuni bipo bi yankulu. ¹⁸ Ban den guani ki kuni bi baa Lewuyeli kani, o den yedi ba: Be yaa po ke yi kpeni dinla tonma? ¹⁹ Bi den goa ki yedi: Ejipiti yua koani ki ga ti bi yankpaaba nuu nni, o go luuni tipo mi ñima ke, ke u yankulu ñuni. O den yedi o bisiaba: ²⁰ O ye le? Be yaa po ke yi haa laa joa li caali po? Ban yini mani o ke wan cua ki je leni ti. ²¹ Musa den tuo ki baa kali laa joa deni, o den taa o bisalo Sofola ki puni o ke o tua o pua. ²² Sofola den mali bonjaga, Musa den yini o Gelisoma, kelima o den yedi: N tie caano ki ye mi dielanma nni. ²³ Lan den waagi boncianla, Ejipiti bado den ti kpe, Isalele yaaba den buudi kelima bi yonbidi yaa po, bi yonbidi n den teni ke bi buudi ya bubula den doni ki pundi hali U Tienu kani. ²⁴ U Tienu den gbadi bi bubula ki tiadi o hantaado po, wan den kuani yua leni bi yaajanba Abalahama, Isaaka leni Jakoabo. ²⁵ U Tienu den noali Isalele yaaba, ki gbadi bipo mi nihima.